«بىرگە بارايىق» جوباسىنىڭ ءتورتىنشى سانىن كوپ ادامعا كەرى اسەرىن تيگىزىپ جۇرگەن ادەتتەردەن ارىلۋعا ارناعىمىز كەلەدى. ونىڭ نەگىزگى سەبەبى دە جوق ەمەس, بۇل – ءبىزدىڭ قانىمىزعا سىڭگەن قاسيەت.
ادەتتە قازاقى قاۋىم پسيحولوگتىڭ الدىنا بارىپ, كومەك سۇراۋدى ەرسى كورەدى. الايدا بۇگىندە ونى قالىپتى قابىلدايتىنداردىڭ قاتارى كوبەيگەن. وسى ەكى تاراپقا دا پايدالى بولاتىن ورتالىقپەن جاقىندا تانىستىق. استاناداعى «ونەر شەبەرحاناسى» دەپ اتالاتىن ورتالىق وسى جىلدىڭ باسىندا ەرەسەكتەرگە ارناپ ارت-تەراپيا توبىن اشقان. ارت-تەراپيا تۋرالى ءجيى ەستىگەن بولارسىز, بىراق كوبىنە بالالارعا ارنالعان دەگەن ۇعىم قالىپتاسقان.
ولاي ەمەس, ويتكەنى ەموتسيا كەز كەلگەن ادامدا بار. جانە ونى سىرتقا شىعارۋ بارلىعىمىزعا قاجەت. ورتالىق ديرەكتورى, پسيحولوگ جادىراگۇل جيەنعازيەۆا: ء«بىزدىڭ مەنتاليتەتتە قۋانعانىڭدى كوپ كورسەتۋگە بولمايدى, كوز تيەدى. قايعىرعانىڭدى بىلدىرۋگە بولمايدى, وسال دەپ ويلايدى. ال سەزىمدى, ەموتسيانى, ءتىپتى ايتايىن دەگەن ءسوزدى ىركىپ, ىشتە ساقتاۋ كۇيزەلىسكە الىپ كەلۋى مۇمكىن. بۇدان بولەك, بىزدەگى ەرلى-زايىپتىلاردىڭ اجىراسۋىنىڭ كوپتىگىنە ءبىرازىمىز ءمان بەرە بەرمەيتىن ءبىر سەبەبى – جۇپتاردىڭ شۇيىركەلەسپەۋى. ويىن ايتپاۋ, قالاۋىن بىلدىرمەۋ, ءسوزىن جەتكىزبەۋ تۇسىنىسپەۋشىلىكتى تۋدىرادى», دەيدى. ونىڭ ايتۋىنشا, ەرەسەكتەرگە ارنالعان توپ تاجىريبەسىندەگى كەزدەسكەن جۇپتاردىڭ جانە ءوزىن تانۋعا ۇمتىلعىسى كەلەتىن جانداردىڭ نيەتىنەن سوڭ اشىلعان.
ەرەسەكتەرگە ارنالعان ارت-تەراپيا توبىندا سەنبى-جەكسەنبى سايىن ءارتۇرلى ويىن-ساۋىق ورىندارىندا, كەڭسەدە, ساياباقتا تانىمدىق, دامىتاتىن, جان دۇنيەنى تىنىشتاندىراتىن جانە ءوزىڭىز بىلمەگەن جاڭا قىرىڭىزدى اشۋعا مۇمكىندىك بەرەتىن ويىندار, تاپسىرمالار, پىكىر الماسۋلار ۇيىمداستىرىلادى. استانالىقتار مەن قالا قوناقتارىنا: «ونەر شەبەرحاناسى» «ارناۋ» تۇرعىن-ءۇي كەشەنى, 6-كەڭسەدە ورنالاسقان. ال وزگە وڭىردەگىلەر ارت-تەراپەۆت نەمەسە پسيحولوگ ماماندارىنا قولقا سالسا بولادى.
ايدانا شوتبايقىزى,
«Egemen Qazaqstan»