سەنات وتىرىسىندا دەپۋتات ءالىمجان قۇرتاەۆ پرەمەر-مينيستر ب.ساعىنتاەۆتىڭ اتىنا دەپۋتاتتىق ساۋال جولدادى.
«2020 جىلى ۇلى دالانىڭ ۇلى تۇلعاسى, ۇلتىمىزدىڭ ماقتانىشى - ءابۋ ناسىر ءال-فارابي بابامىزدىڭ 1150 جىلدىق مەرەيتويى تويلانادى. وسىعان وراي, مادەنيەت جانە سپورت مينيسترلىگى ايرىقشا داتانى يۋنەسكو دەڭگەيىندە تويلاۋعا ارەكەت ەتۋدە. وتەتىن ءىس-شارالاردىڭ ءتىزىمى جاسالىپ, تياناقتى دايىندىق جۇرگىزىلىپ جاتىر. ارينە, بۇل وتە قۇپتارلىق جاعداي. بۇعان قوسا, كەيىنگە قالدىرۋعا بولمايتىن بىرنەشە ماڭىزدى ماسەلەلەردى شەشۋىمىز قاجەت», دەلىنگەن دەپۋتاتتىق ساۋالدا.
بۇدان ءارى ءالىمجان قۇرتاەۆ سيرياداعى سوعىستىڭ توقتاۋىنا بايلانىستى جانە 1150 جىلدىقتىڭ قارساڭىندا, ياعني, 2019 جىلى ءال-فارابي اتىنداعى ماۆزولەيدىڭ قۇرىلىسىن تولىقتاي اياقتاۋ كەرەك ەكەنىن ايتادى.
«2006 جىلعى سيرياعا بارعان ساپارىمىزدا ءال-فارابي بابامىزدىڭ ماۆزولەيىنىڭ كوشىرمەسىن اكەلدىك. بۇگىنگى كۇنى سول كوشىرمەنىڭ ۇلگىسىمەن ماۆزولەيدى سالۋ كەزەك كۇتتىرمەيتىن يگىلىكتى ءىستىڭ ءبىرى بولۋى ءتيىس. مۇنداي قادام وتىرار-تۇركىستان وڭىرىندە مادەني ءتۋريزمدى دامىتۋعا ۇلكەن سەرپىن بەرەرى ءسوزسىز», دەلىنگەن دەپۋتاتتىڭ ساۋالىندا.
سونداي-اق دەپۋتات ءال-ءفارابيدىڭ ەڭبەكتەرىن اۋدارۋدى ۇسىندى.
«بۇگىنگى كۇنگە دەيىن بىزگە 100-دەن استام شىعارمالارى ءمالىم. الايدا ولاردىڭ بار-جوعى 20 شاقتىسى عانا قازاق جانە ورىس تىلدەرىنە اۋدارىلعان. ولاي بولسا, قالعان ەڭبەكتەرىن اۋدارۋ ءىسىن قولعا الۋىمىز كەرەك. مىسالى, سيريا ساپارىنان اكەلىنگەن «ەكى ۇلى يمامنىڭ ءتاپسىرى», ء«ال-ءفارابيدىڭ لوگيكاسى», ء«ال-ءفارابيدىڭ عىلىم جانە تاربيە تۋرالى ەڭبەكتەرىنە تالداۋ», ء«ال-فارابي», ء«ال-فارابي جانە ىزگى قالالار», ء«ال-ءفارابيدىڭ فيلوسوفيالىق كوزقاراس تۋرالى», ء«ال-فارابي مەن ءال-كينديدىڭ تەرمينولوگيالىق ەنتسيكلوپەدياسى» جانە ءاز-زاھير بەيبارىس سۇلتان تۋرالى «تەڭىز ماملۇكتەرى» اتتى تۋىندىلار قازاق جانە اعىلشىن تىلدەرىنە اۋدارىلىپ, ۇلتىمىزدىڭ جانە الەمنىڭ وقىرماندارىنىڭ ورتاق قازىناسىنا اينالسا نۇر ۇستىنە نۇر بولار ەدى» دەلىنگەن ءا.قۇرتاەۆتىڭ دەپۋتاتتىق ساۋالىندا.
بۇدان ءارى ول عۇلامانىڭ ءومىر تاريحى مەن شىعارماشىلىعىن تۇتاس سيپاتتايتىن ء«ال-فارابي ەنتسيكلوپەدياسىن» دايىنداۋدى, بابامىزدىڭ ومىرىنەن دەرەكتى فيلم ءتۇسىرۋدى, استانا مەن تۇركىستان قالالارىندا ءال-فارابي ەسكەرتكىشىن ورناتۋعا بارىنشا قولداۋ كورسەتۋ كەرەك ەكەنىن ءسوز ەتتى.