اۋىل جولدارىنا اقشا كەرەك - سەناتور باتىس قازاقستانداعى جولدارعا قارجى سۇرادى

ء«بىزدىڭ وسى دەپۋتاتتىق ساۋالىمىزعا نەگىز بولعان ماسەلە وڭىردە بولىپ, تۇرعىندارمەن بولعان كەزدەسۋلەردە ۇنەمى ايتىلىپ, جازىلىپ جۇرگەن وبلىس اۋماعىنداعى جول ماسەلەسى.وبلىستىق جانە اۋداندىق ماڭىزى بار جولداردىڭ جاقسى جانە قاناعاتتانارلىق جاعدايى 28,7% قۇرايدى. بۇل رەسپۋبليكا بويىنشا ەڭ تومەنگى كورسەتكىش» دەلىنگەن دەپۋتات ساۋالىندا.

سونىمەن قاتار ەربولات مۇقاەۆ بۇگىنگى كۇنى باتىس قازاقستان وبلىسىنىڭ 12 اۋدانىنىڭ 3 اۋدانى وبلىس ورتالىعىمەن اسفالتبەتوندى قاتتى جولمەن مۇلدەم قامتىلماعان (ولار كازتالوۆ, جانىبەك جانە بوكەي ورداسى اۋداندارى) اتىپ كورسەتتى.

«2018 جىلدىڭ مامىر ايىندا ەلباسى جۇمىس ساپارىمەن بقو بارعان ساپارىندا قازتالوۆ, جانىبەك جانە بوكەي ورداسى اۋداندارىنىڭ ورتالىقتارىن وبلىس ورتالىعىمەن بايلانىستىرۋ ءۇشىن ۇزىندىعى 245 كم قۇرايتىن «كازتالوۆ-جانىبەك-رف شەكاراسى» جانە «ونەگە-بيسەن-سايقىن» اۆتوجولدارىن اسفالتبەتوندى جولمەن 2019-2020 جىلدار ارالىعىندا قامتۋ قاجەتتىلىگى تۋرالى قاتاڭ تاپسىرما بەرگەن بولاتىن. وسىعان بايلانىستى جوبانى ىسكە اسىرۋ ءۇشىن 2019 جىلعا 3,7 ملرد تەڭگە مولشەرىندە قاراجات قاراستىرىلدى. وزىڭىزگە بەلگىلى ەلباسى ۇكىمەتتىڭ كەڭەيتىلگەن وتىرىسىندا كوپتەگەن جولداردىڭ ىسكە قوسىلعانىن ايتا كەلە, حالىق ءوز اۋىلىنا دەيىنگى جولدىڭ جاسالعانىن كورمەيىنشە ول رەسپۋبليكا كولەمىندەگى جاسالعان جولداردى سەزىنبەيتىنىن باسا ايتقان بولاتىن», دەدى ول.

وسىعان بايلانىستى دەپۋتات اتالعان ءۇش اۋدانعا باراتىن نەگىزگى جولداردىڭ بويىندا ورنالاسقان ەلدى مەكەندەردىڭ كىرەبەرىس جولدارىندا قاتتى اسفالتبەتوندى جابىندىمەن توسەپ كۇردەلى جوندەۋ جۇرگىزۋدى سۇرادى.

«كۇرەجولدىڭ بويىندا اتالعان ءۇش اۋداننىڭ 20 شاقتى ەلدى مەكەندەرى ورنالاسقان. ولاردىڭ جولدان ارا-قاشىقتىقتارى 4-تەن 20 كم-عا دەيىنگى ارالىقتى قۇرايدى. وسى كوتەرىلگەن ماسەلەنىڭ كەزەك كۇتتىرمەيتىن وزەكتىلىگىنە بايلانىستى, جوعارىدا كورسەتىلگەن مالىمەتتەردى نەگىزگە الا وتىرىپ, كۇرە جولدارعا شىعاتىن كىرەبەرىس جولداردى جوندەۋدى رەسپۋبليكالىق بيۋدجەت ەسەبىنەن قارجىلاندىرىلۋىنا ءوز تاراپىڭىزدان ىقپال جاساۋىڭىزدى سۇرايمىز», دەلىنگەن ب. ساعىنتاەۆتىڭ اتىنا جولداعان دەپۋتاتتىق ساۋالىندا.