قاراعاندىداعى قايعىلى وقيعا: قاتارداعى جاۋىنگەردىڭ قازاسىنا كىم كىنالى؟

الايدا, 18  جاستاعى ءالىبيدىڭ ەت جاقىندارى مۇنداي اقپاراتقا سەنىمسىزدىك تانىتىپ وتىر. مىسالى, مارقۇمنىڭ اناسى مايگۇل الىپباەۆا بۇل وقيعا شىندىعىنىڭ بۇركەمەلەنىپ وتىرعانىن ايتادى.

– وتكەن سەنبى كۇنى عانا تەلەفون سوقتى. وتە كوڭىلدى بولاتىن, جايدارى داۋىسپەن ءوزىنىڭ حال-جاعدايىنىڭ جاقسى ەكەنىن ايتتى. وزىنە قول سالدى دەگەندەرگە سەنبەيمىن. بالام اسكەرگە ءوز ەركىمەن كەتكەن بولاتىن. كىنالىلەردى تاۋىپ, جازاسىن بەرسىن, – دەيدى ايدىڭ كۇننىڭ امانىندا بالاسىنان ايىرىلىپ قالعان انا.

ءالىبي ساپا اسكەر قاتارىنا الماتى وبلىسىنان شاقىرىلعان ەكەن. كومانديرلەرى مەن قارۋلاستارىنىڭ ايتۋىنشا, ول ۇنەمى جايدارى جۇرەتىن, پەيىلى اق جىگىت بولعان. ال ەندى وسىنداي قايعىلى جاعدايعا اكەلگەن سەبەپتى ەشكىم تاپ باسىپ ايتا الماي وتىر. ساربازدىڭ اسكەري قىزمەتتىڭ اۋىرتپاشىلىعى جايلى نەمەسە قارۋلاستارىمەن ارادا قانداي دا ءبىر كيكىلجىڭنىڭ بولعانى  تۋرالى جان بالاسىنا شاعىمدانعان جەرى جوق ەكەن. ءتىپتى, ول اجەسىنە جازعان حاتىندا اسكەري ءومىردىڭ وزىنە ۇنايتىنىن, وسىندا كەلىسىم شارت بويىنشا قالۋدى نەمەسە بورىشىن وتەگەننەن كەيىن وقۋعا ءتۇسۋ جايىن ويلاستىرىپ جۇرگەنىن ايتقان.

ءالىبي ساپانىڭ ءولى دەنەسى ءوزى تۇرعان №9 پوستتاعى قاراۋىل مۇناراسىنان تاڭعى ساعات 7-دەن 40 مينۋت وتكەندە تابىلعان. ساربازدىڭ مىندەتى – ەڭبەكپەن تۇزەۋ مەكەمەسىندە جازاسىن وتەپ جۇرگەندەر جۇمىس ىستەيتىن وندىرىستىك نىسانداردى كۇزەتۋ بولعان ەكەن.

اتالعان اسكەري ءبولىمنىڭ باسشىلارى بۇل توتەنشە وقيعاعا «سۋيتسيد بولۋى ىقتيمال» دەگەن باعا بەرىپ وتىر. ماسەلەن, №6505 اسكەري ءبولىم كومانديرىنىڭ مىندەتىن اتقارۋشى ازامات سماعۇلوۆ بىلاي دەيدى:

– قاتارداعى جاۋىنگەر ساپا كۇزەت ورنىندا وزىنە اۆتومات كالاشنيكوۆتەن وق اتىپ, يەگىنىڭ استىنان جارالاپ, سۋيتسيد جاسادى دەگەن جورامال بار. سارباز كۇزەت ورنىندا اسكەري قىزمەتىن اتقارۋ كەزىندە جالعىز بولعان. ول الماتى وبلىستىق قورعانىس ىستەرى جونىندەگى دەپارتامەنتتەن كەلگەننەن بەرگى ۋاقىت ىشىندە بەلگىلەنگەن ءتارتىپ بويىنشا ارنايى دايارلىقتان, وقۋ بەكەتىنە بەيىمدەلۋ كەزەڭىنەن وتكەن.

جالپى, №6505 اسكەري بولىمدە مۇنداي توتەنشە وقيعانىڭ بولىپ وتىرعانى جالعىز بۇل عانا ەمەس. ماسەلەن, وسىدان بەس جىل بۇرىن 19 جاستاعى سارباز مىرزاباي ساپارباەۆ تا قاراۋىل مۇناراسىندا اتىلىپ ولگەن بولاتىن.

ۇلتتىق ۇلاننىڭ قىرشىنىنان قيىلعان ساربازى ءالىبي ساپانىڭ مۇردەسى تۋعاندارىنا تاپسىرىلادى. ال ولار بولسا, تەرگەۋ-تەكسەرۋ امالدارىنىڭ ادىلەتتى تۇردە جۇرگىزىلۋىن تالاپ ەتىپ وتىر.

توتەنشە وقيعا وزىنە-ءوزى قول سالۋ ما الدە اسكەري بورىشىن وتەۋشى ءوزىن بايقاماي اتىپ الدى ما, مۇنىڭ بارلىعىنىڭ اق-قاراسىن اسكەري-تەرگەۋ باسقارماسىنىڭ تەرگەۋ-جەدەل توبى انىقتايتىن بولادى.

قايرات ءابىلدا,

«ەگەمەن قازاقستان»

قاراعاندى وبلىسى