مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن ء«تۇن قۇدايى» ءفيلمى Bengaluru International Film كينوفەستيۆالىنىڭ Asian Cinema Competition اتتى كونكۋرستىق باعدارلاماسىنا قاتىسادى. اتالعان كينوفەستيۆال اقپاننىڭ 21- 28 ارالىعىندا ءۇندىستاننىڭ كارناتاكا شتاتىنداعى بانگالور قالاسىندا وتەدى.
ايتا كەتسەك, بانگالور قالاسى – ۇندىستانداعى كينو ءوندىرىسى بويىنشا ەڭ الدىڭعى قاتارداعى ورتالىقتارىنىڭ ءبىرى. جىل سايىن بۇل قالادا 200-گە جۋىق فيلمدەر جارىققا شىعادى, ولاردىڭ كوبى حالىقارالىق كينوفەستيۆالدەردە بيىكتەردەن كورىنىپ, كينوسىنشىلاردىڭ جوعارى باعاسىنا يە بولعان تۋىندىلار.
ء«بىزدىڭ فيلم ميفولوگيالىق نەگىزدە زاماناۋي الەمدى ابستراكتى سيۋجەت رەتىندە ۇسىنادى. ەجەلگى دۇنيەتانىمدى قازىرگى لوگيكالىق كوزقاراسپەن اۋىستىرساق نە بولار ەكەن دەگەن فانتازيالىق ويدان تۋعان تۋىندى. سوندىقتان دا ماعان وسى تۇرعىدان كورسەتۋگە قىزىق بولىپ كورىندى. فەستيۆالدىڭ باستالعانىن اسىعا كۇتىپ ءجۇرمىن, مەنىڭ ويىمشا باعدارلاماسى قىزى بولاتىن سەكىلدى», - دەيدى رەجيسسەر ءادىلحان ەرجانوۆ.
ەستەرىڭىزگە سالا كەتسەك, ء«تۇن قۇدايى» ءفيلمى 40-ماسكەۋ حالىقارالىق كينوفەستيۆالىنىڭ نەگىزگى كونكۋرسى شەڭبەرىندە كورسەتىلگەن بولاتىن. سونداي-اق اتالعان كينوتۋىندى پاريجدە وتكەن L’Etrange Festival جانە رەسەيدەگى «كراي سۆەتا» كينوفەستيۆالدەرىندە كورسەتىلدى. ودان بولەك, ء«تۇن قۇدايى» ءفيلمى يندونەزيادا وتكەن Jogja كينوفەستيۆالىنىڭ «ازيالىق فيلمدەر» بايقاۋىنا جانە 14-ش.ايمانوۆ اتىنداعى حالىقارالىق كينوفەستيۆالىنە قاتىسقان بولاتىن.
Bengaluru International Film Festival كينوفەستيۆالىندە ازيالىق جانە ءۇندى فيلمدەرىنە ارنالعان ەكى كونكۋرستىق باعدارلاما بار. سونىمەن قاتار, فەستيۆال شەڭبەرىندە كونكۋرستان تىس «الەمدىك پانوراما» باعدارلاماسى, سونداي-اق, فيپرەسسي جانە نەتپاك قازىلار القاسى جۇمىس ىستەيدى. بيىل فەستيۆال شەڭبەرىندە ينگمار بەرگماننىڭ رەتروسپەكتيۆاسى (مەتردىڭ 100 جىلدىعىنا وراي) جانە ماحاتما گانديدىڭ ءومىرى تۋرالى باياندايتىن ء(ۇندى ساياسي جانە قوعام قايراتكەرىنىڭ 150 جىلدىعىنا وراي) فيلمدەردىڭ رەتروسپەكتيۆاسى ۇيىمداستىرىلعان.
حالىقارالىق كينوفەستيۆالدەردە تانىلعان فيلمدەرگە ارنالعان «الەمدىك پانوراما» كونكۋرستان تىس باعدارلاماسى اياسىندا «قازاقفيلم» كينوستۋدياسىنىڭ تاعى دا ءبىر تىڭ تۋىندىسى – رەجيسسەر ەمير بايعازين تۇسىرگەن «وزەن» ءفيلمى كورسەتىلەدى.
ايگۇل احانبايقىزى,
«ەگەمەن قازاقستان»
الماتى