قازاقستان رەسپۋبليكاسى قارۋلى كۇشتەرىنىڭ وكىلدەرى تۇرىك رەسپۋبليكاسىنىڭ كارس پروۆينتسياسىندا ءوتىپ جاتقان «كىش-2019» بىرىككەن كوپۇلتتى جاۋىنگەرلىك وقۋ-جاتتىعۋىندا تاجىريبە الماسادى.
وقۋ-جاتتىعۋدىڭ نەگىزگى ماقساتى-اسكەرلەردىڭ جاۋىنگەرلىك دايىندىعىن جانە بولىمشەلەردىڭ وتتى مۇمكىندىكتەرىن باعالاۋ, بولىمشەلەردى ۇيلەستىرۋ جانە قىسقى جاعدايلاردا ماتەريالدىق-تەحنيكالىق قامتاماسىز ەتۋدى ۇيىمداستىرۋ, سونداي-اق قىسقى جاعدايلاردا قارۋ-جاراق پەن اسكەري تەحنيكانىڭ جاڭا ۇلگىلەرىنىڭ جاۋىنگەرلىك مۇمكىندىكتەرىن سىناۋ بولىپ تابىلادى.
قازاقستان قارۋلى كۇشتەرىنىڭ بولىمشەلەرى وقۋ-جاتتىعۋ بارىسىندا ەلدى مەكەندە جانە تاۋلى جاعدايلاردا اۋە دەسانتتارىن قولدانا وتىرىپ جالپى اسكەري شابۋىل وپەراتسياسىن جۇرگىزۋ جانە اسكەري اۆياتسيانى اتىس قولداۋ بويىنشا ءىس-قيمىلداردى پىسىقتايدى.
ايتا كەتەيىك, «كىش-2019» بىرلەسكەن كوپۇلتتى جاۋىنگەرلىك وقۋ-جاتتىعۋدىڭ بەلسەندى كەزەڭى 21 اقپاندا وتەدى. وقۋ-جاتتىعۋلارعا ءازىربايجان, بانگلادەش, بولگاريا, بوسنيا جانە گەرتسەگوۆينا, ۇلىبريتانيا, گرۋزيا, قازاقستان, كاتار, كۋۆەيت, كوسوۆو, نورۆەگيا, يتاليا, ساۋد ارابياسى جانە تۇركيا اسكەري قىزمەتشىلەرى قاتىسادى.