جۇما, 8 ماۋسىم 2012 7:42
ەل ىسىنە قاتىسىپ, مەملەكەتتىك جاۋاپتى قىزمەتتەردە جۇرگەنىمە, شەتەلدىك ساپارلارعا شىعا باستاعانىما تالاي جىل بولسا دا قازاقستانعا ەش جولىم تۇسپەي جۇرگەن ەدى. ازەربايجان مادەنيەتىنىڭ قازاقستانداعى كۇندەرى ارقاسىندا استانانى العاش رەت كورۋ مۇمكىندىگىنە يە بولدىم. «ءجۇز رەت ەستىگەننەن ءبىر رەت كورگەن ارتىق» دەگەن ءسوز راس. قاي ەلگە بارعاندا دا سول جەردەن كورەرمىن دەگەنىڭدى ويشا ەكشەيسىڭ, كەيدە كورگەنىڭ ويلاعانىڭنىڭ ورەسىنەن تابىلماي جاتاتىنى دا بولادى. ءبىز ەلدىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ باستاماسىمەن, باسشىلىعىمەن جاڭا استانا سالىنعانىن, ونداعى ساۋلەت ونەرىنىڭ دەڭگەيى جوعارى ەكەنىن جاقسى بىلەمىز. ايتسە دە وسىندا كەلگەلى بەرى مەنىڭ كورگەنىم ويلاعانىمنان دا اسىپ ءتۇستى.
جۇما, 8 ماۋسىم 2012 7:42
ەل ىسىنە قاتىسىپ, مەملەكەتتىك جاۋاپتى قىزمەتتەردە جۇرگەنىمە, شەتەلدىك ساپارلارعا شىعا باستاعانىما تالاي جىل بولسا دا قازاقستانعا ەش جولىم تۇسپەي جۇرگەن ەدى. ازەربايجان مادەنيەتىنىڭ قازاقستانداعى كۇندەرى ارقاسىندا استانانى العاش رەت كورۋ مۇمكىندىگىنە يە بولدىم. «ءجۇز رەت ەستىگەننەن ءبىر رەت كورگەن ارتىق» دەگەن ءسوز راس. قاي ەلگە بارعاندا دا سول جەردەن كورەرمىن دەگەنىڭدى ويشا ەكشەيسىڭ, كەيدە كورگەنىڭ ويلاعانىڭنىڭ ورەسىنەن تابىلماي جاتاتىنى دا بولادى. ءبىز ەلدىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ باستاماسىمەن, باسشىلىعىمەن جاڭا استانا سالىنعانىن, ونداعى ساۋلەت ونەرىنىڭ دەڭگەيى جوعارى ەكەنىن جاقسى بىلەمىز. ايتسە دە وسىندا كەلگەلى بەرى مەنىڭ كورگەنىم ويلاعانىمنان دا اسىپ ءتۇستى.
استانا ناعىز وسى زاماننىڭ قالاسى, ونىڭ جوسپارلانۋى, تۇرعىزىلۋى, ساۋلەتىنىڭ ەرەكشەلىگى قازاق حالقىنىڭ, بارشا قازاقستاندىقتاردىڭ زاڭدى ماقتانىشى. بۇكىل تۇركى الەمى قۇرمەت تۇتاتىن قازاقستان پرەزيدەنتى نۇرسۇلتان نازارباەۆتىڭ بۇل جوباسى – جاسامپازدىق جوبا. قازاقستاندى جيىرما ءبىرىنشى عاسىرداعى ادامزات وركەنيەتىنىڭ الدىڭعى شەبىنە الىپ شىعاتىن ءىرى ءىس. ءبىز تۇڭعىش پرەزيدەنتتىڭ مۋزەيىندە نۇرسۇلتان نازارباەۆتىڭ ونەگەلى ءومىر جولىمەن تانىسىپ, تاۋەلسىز مەملەكەت قۇرۋدىڭ جاي-جاپسارىنان جان-جاقتى حاباردار بولدىق. قازىرگى تاڭدا قازاقستاننىڭ الەم الدىندا ابىرويى اسقاقتاپ تۇرعانىندا ەل باسشىسىنىڭ ەڭبەگى ەرەكشە ەكەنىن ناقتى سەزىنە تۇستىك. استانا جۇرتشىلىعىنىڭ وكىلدەرىمەن ءسويلەسكەنىڭىزدە ولاردىڭ وتانشىلدىعى, ەرتەڭگى كۇنگە سەنىمى رازى ەتپەي قويمايدى. بۇل مەملەكەتتىڭ كەلەشەگىنىڭ كەمەلدىگىنىڭ دالەلى.
نۇرسۇلتان ءابىش ۇلىنىڭ ازەربايجاننىڭ باسشىلىعىمەن قاي كەزدە دە جاقسى قارىم-قاتىناس جاساپ, اتا-بابالارىمىزدان اۋىسقان دوستىق ءداستۇرىن جەمىستى جالعاستىرىپ كەلە جاتقانى بەلگىلى. ءبىز قازاق باۋىرلارىمىزدىڭ جاناشىرلىعىن بۇرىن دا تالاي سەزىنگەنبىز. باكۋ اسپانىنا بۇلت ءۇيىرىلىپ, كەشەگى كەڭەستىك كەزەڭنىڭ زورلىعى باتقان تۇستا اتاقتى قازاق اقىنى ولجاس سۇلەيمەنوۆتىڭ, ءوزى ىستىعى كوتەرىلىپ, قاتتى اۋىرىپ تۇرعانىنا قاراماستان, باكۋگە ۇشىپ كەلگەنىن, حالىقتىڭ جىگەرىن كوتەرەتىن جالىندى ءسوز سويلەگەنىن ءبىز ەشقاشان ۇمىتپايمىز. ءبىز كەڭەس وداعىنداعى ءامىرشىل-اكىمشىل جۇيەگە العاش قارسى شىققان, ۇلتتىق نامىس تۋىن الدىمەن جەلبىرەتكەن قازاق جاستارى, ءبىزدىڭ باۋىرلارىمىز بولعانىن دا ماقتان ەتەمىز.
ازەربايجان مادەنيەتىنىڭ قازاقستانداعى كۇندەرى سياقتى يگىلىكتى ءىس-شارالار الداعى كەزدە دە جۇيەلى ۇيىمداستىرىلىپ تۇرۋعا ءتيىس. وسى كۇندەردە ءوزىمنىڭ ارىپتەسىم – قازاقستان رەسپۋبليكاسى مادەنيەت جانە اقپارات مينيسترلىگىنىڭ جاۋاپتى حاتشىسى جاننا قۇرمانعاليەۆامەن, پرەزيدەنت اكىمشىلىگى ىشكى ساياسات ءبولىمى مەڭگەرۋشىسىنىڭ ورىنباسارى الىبەك اسقاروۆپەن, «ەگەمەن قازاقستان» گازەتىنىڭ پرەزيدەنتى ساۋىتبەك ابدراحمانوۆپەن, تۇركى اكادەمياسىنىڭ پرەزيدەنتى شاكىر ىبىراەۆپەن پىكىرلەسكەنىمدە مادەني بايلانىستاردىڭ كوكجيەگى كەڭەيە تۇسەتىنىنە كوزىم جەتتى.
ءبىر كاسپيدىڭ ەكى بەتىن جايلاعان قوس حالىقتىڭ عاسىرلار بويعى دوستىعى باياندى جالعاس تابۋىن تىلەيمىز.