تاياۋدا «استانا» حالىقارالىق قارجى ورتالىعىنىڭ ۇزدىكسىز كاسىبي ءبىلىم بەرۋ بيۋروسى قارجى سالاسى بويىنشا ارنايى كۋرستار وتكىزىپ, سىناقتان سۇرىنبەي وتكەندەرگە ءتيىستى سەرتيفيكات تاپسىرعان بولاتىن. قارجى ورتالىعى سەرتيفيكاتىنىڭ بەدەلى وتە جوعارى سانالادى, سەبەبى ول حالىقارالىق دەڭگەيدەگى بىلىكتى مامان اتانۋعا جول اشادى.
احقو اكادەميالىق قارجى سالاسىنىڭ ءتۇرلى باعىتتارى بويىنشا 215 گرانت بولگەن ەكەن. وسى گرانتقا قول جەتكىزگەن تالاپتى جاستاردىڭ ءبىرى – الماتىلىق ادىلبەك رىسقۇلوۆ.
ءال-فارابي اتىنداعى قازاق ۇلتتىق ۋنيۆەرسيتەتىنىڭ مەحانيكا-ماتەماتيكا فاكۋلتەتىنىڭ تۇلەگى, قارجى سالاسىنا دا ماماندانىپ, ۇلتتىق بانكتىڭ ماگيستراتۋراسىن تامامداعان.
– «الماتى» وڭىرلىك قارجى ورتالىعىندا يسلامدىق قارجىنى دامىتۋ باسقارماسىندا جۇمىس ىستەپ ءجۇرىپ, ءۇشىنشى ماماندىق رەتىندە پاكىستانداعى Al-Huda Center of Islamic Banking and Finance ۋنيۆەرسيتەتىن ءتامامدادىم. ماماندىعىما قاتىستى نەگىزگى كاسىبي جولىم وسىدان كەيىن باستالدى, – دەيدى قارجىگەر.
ءتۇرلى بانكتەر مەن ساقتاندىرۋ مەكەمەلەرىندە ەڭبەك ەتكەن جاس مامان – قازىرگى تاڭدا «Al-Sakr Finance» اق يسلامدىق قارجى كومپانياسىندا دەپارتامەنت باستىعى. ادىلبەك باسقاراتىن دەپارتامەنت تاۋەكەل مەنەدجمەنتى مەن شاريعات تالاپتارىنىڭ ساقتالۋ ماسەلەلەرىنە جاۋاپ بەرەدى.
قارجى سالاسىندا ءبىراز تاجىريبە جيناعان, ساراپشى رەتىندە دە تانىلىپ قالعان ماماننىڭ حالىقارالىق سەرتيفيكاتقا نە ءۇشىن قىزىعۋشىلىق تانىتقانىن سۇراعان ەدىك.
– ۇلتتىق بانك ماگيستراتۋراسىنىڭ تۇلەگى بولعاندىقتان, حالىقارالىق كاسىبي سەرتيفيكاتتاردىڭ قانشالىقتى ماڭىزدى ەكەنىن جاقسى بىلەمىن. بىلتىر احقو بيۋروسى جايلى ەستىپ, ويلانباستان وقۋعا ءوتىنىم جازدىم. قازىر 2 باعدارلامانى: يسلام قارجىسىنىڭ تيىمدىلىگى (IFQ) مەن قارجىلىق تاۋەكەلدەر مەنەدجمەنتىن (FRM) ءتامامدادىم, – دەيدى.
ايتۋىنشا, العاشقى باعدارلامانىڭ ەمتيحانىندا بالدىڭ 80 پايىزىن جيناپتى. بۇل رەتتە يسلامي قارجى سالاسىنا قاتىستى ءبىلىمى مەن 8 جىلدىق ەڭبەك ءوتىلىنىڭ كوپ كومەگى ءتيىپتى. FRM ەمتيحانى ءبىرشاما قيىنعا تۇسكەن.
– بوس ۋاقىتىمنىڭ ءبارىن دايىندىقپەن وتكىزدىم. ءتىپتى, كۇندەلىكتى تۇرمىس-تىرشىلىكتى جيىپ قويدىم دەسەم بولادى. وتباسىلى ادام ءۇشىن بۇدان اسقان قيىن دۇنيە جوق. دەمالىس كۇندەرى, ءتىپتى 8 ساعاتتان ارتىق ۋاقىتتى ەمتيحانعا ارنادىم. ەگەر جالپىلاي ەسەپتەسەك, اپتا سايىن 40 ساعاتتان ارتىق ۋاقىت كەتتى, – دەيدى بۇل تۋرالى ول.
قارجىگەر يسلام بانكتەرىنىڭ بارلىق پرينتسيپتەرى شاريعاتقا ساي كەلەتىنىن ايتادى. وندا ءبىرىنشى كەزەكتە وسىمقورلىققا تىيىم سالىنعان.
– شاريعاتتا كەز كەلگەن قارىزدىڭ مىندەتتەمەلەرى وعان قاتىسى بار تالاپتار تاراپىنان تولىق ورىندالۋى ءتيىس. ەگەر كليەنتتەردىڭ ءبىرى قانداي دا ءبىر سەبەپپەن بەرەشەگىن وتەي الماسا, يسلام كومپانيالارى ونىڭ جاعدايىنا تۇسىنىستىكپەن قاراۋعا مىندەتتى. الايدا, كليەنت جاعدايى بولا تۇرىپ نەسيەنى وتەمەسە, باس ساۋعالاۋعا تىرىسسا, الاياقتىق ارەكەتتەر جاساسا, وندا كومپانيا سول ەلدەگى زاڭنامالار مەن شاريعاتتىڭ نەگىزىندە سوتقا جۇگىنۋگە, بەرەشەكتى تولىعىمەن قايتارىپ الۋعا قۇقىلى. تاعى ءبىر ايتا كەتەرلىگى, باسقا بانكتەر كليەنتتەرگە سالىناتىن ايىپپۇلدىڭ نەعۇرلىم كولەمدىرەك بولعانىنا مۇددەلى, سەبەبى ونى تابىستىڭ ءبىر كوزى رەتىندە قاراستىرادى. ال يسلام بانكتەرى ءۇشىن ايىپپۇل سالۋ قاراپايىم تارتىپتىك شارا سانالادى, ونى بانك قايىرىمدىلىق ماقساتقا جۇمساۋعا مىندەتتى, – دەيدى قارجىگەر.
ادىلبەكتىڭ پايىمداۋىنشا, ادامنىڭ تابىسقا جەتۋىنىڭ كىلتى – وزىنە جوعارى تالاپ قويۋ جانە ماقساتقا ۇمتىلۋ. ونسىز قانداي دا ءبىر تابىسقا جەتۋ مۇمكىن ەمەس. ول الداعى ۋاقىتتا بيۋرونىڭ يسلامدىق قارجى سالاسىنا قاتىستى باعدارلامالارىن وقۋدى ودان ءارى جالعاستىرۋعا نيەتتى.
ارنۇر اسقار,
«Egemen Qazaqstan»