الماتىدا قوعام قايراتكەرى, ۇلاعاتتى ۇستاز, قازاق كسر-ءنىڭ ەڭبەك سىڭىرگەن عىلىم قايراتكەرى, تاريح عىلىمدارىنىڭ دوكتورى, پروفەسسور جۇنىسبەك جۇمابەكوۆ 1975-1980 جىلدار ارالىعىندا تۇرعان اباي داڭعىلىنداعى ءۇيدىڭ قابىرعاسىنا مەموريالدىق تاقتا ورناتىلدى.
الماتى قالاسى مادەنيەت باسقارماسى باستىعىنىڭ ورىنباسارى دانيار اليەۆ بيىل قالا اكىمشىلىگى 19 قوعام قايراتكەرىنە ەسكەرتكىش تاقتا اشۋ تۋرالى شەشىم قابىلداعاندىعىن جانە وسى تىزىمدەگى عالىم جۇنىسبەك جۇمابەكوۆتىڭ ورنى ەرەكشە ەكەندىگىن اتاپ ءوتتى. مەموريالدىق تاقتانى اشۋ قۇرمەتى قازۇپۋ رەكتورى تاكير بالىقباەۆ پەن عالىمنىڭ زامانداسى پەرنەبەك مومىنوۆكە, قىزى دانا جۇنىسبەكقىزىنا بەرىلدى. عالىمنىڭ شاكىرتى, پوفەسسور تالاس وماربەكوۆ تالىمگەرىنىڭ جوعارى ادامگەرشىلىك جانە عالىمعا سىڭىرگەن ەڭبەگىنە توقتالىپ ءوتتى.
جۇنىسبەك جۇمابەكوۆتىڭ 1974-1980 جىلدارى اباي اتىنداعى قازۇپۋ رەكتورى بولعان كەزىندە وقۋ ورنىن دامىتۋداعا قوسقان ۇلەسى ەرەكشە. عالىمنىڭ يگى ىستەرى ۋنيۆەرسيتەت تاريحىندا تۇبەگەيلى وزگەرىستەرگە, ءبىلىم بەرۋدەگى ساپالىق كورسەتكىشتەرگە قول جەتكىزۋ جولىنداعى جانە ستۋدەنتتەردىڭ مادەني-تۇرمىستىق جاعدايلارىن جاقسارتۋعا ارنالعان ءىس-شارالاردىڭ قولعا الىنۋىمەن ەرەكشەلەنەدى. جۇنىسبەك جۇمابەكوۆ وتكەن عاسىردىڭ 70-80-جىلدارىندا قازاقستاندىق عىلىم الەمىندە اسا تانىمال تۇلعا بولۋىمەن قاتار جوعارى وقۋ ورىندارىنىڭ قىزمەتىن شەبەر ۇيىمداستىرۋشىسى دا بولا ءبىلدى.
سالتاناتتى شاراعا قاتىسقان عالىمنىڭ تۋىستارى مەن زامانداستارى تالانتتى عالىم, قوعام قايراتكەرى, شەبەر ۇيىمداستىرۋشى جايىندا ءوز ەستەلىكتەرىمەن ءبولىستى.
ەلۆيرا سەرىكقىزى,
«ەqemen Qazaqstan»
الماتى