«وي-پىكىرلەر ءتۇنى» – الەمنىڭ تۇكپىر-تۇكپىرىندە قازىرگى زامانعى وزىق ويعا جانە حالىقارالىق دەڭگەيدە وي-پىكىرلەر الماسۋعا ارنالعان, فرانتسۋز تىلىندە سويلەيتىن بارلىق مەملەكەتتەردە كەڭىنەن تانىمال الەمدىك دەڭگەيدەگى ءىس-شارا. زاماناۋي ماڭىزدى ماسەلەلەردى تالقىلاۋعا زياتكەرلەردىڭ, عالىمداردىڭ, سۋرەتشىلەردىڭ, سونداي-اق قوعام قايراتكەرلەرىنىڭ باسىن قوساتىن شارا اياسىندا قاتىسۋشىلار پىكىر الماسىپ, يننوۆاتسيالىق تەحنولوگيالارمەن بولىسە الادى.
«وي-پىكىرلەر ءتۇنى» حالىقارالىق ءىس-شاراسى اباي اتىنداعى قازۇپۋ-دىڭ سوربوننا-قازاقستان ينستيتۋتىندا دا جالعاسىن تاپتى. ءىس-شارانى قازۇپۋ رەكتورى تاكير بالىقباەۆ, سوربوننا-قازاقستان ينستيتۋتىنىڭ ديرەكتورى اينۇر ءسابيتوۆا جانە قازاقستانداعى فرانتسيا ەلشىلىگىنىڭ اتتاشەسى جيل مامەتتس جۇرگىزىپ وتىردى.
«وي-پىكىرلەر تۇنىندە» ۋنيۆەرسيتەت رەكتورى تاكير بالىقباەۆ, الماتى قالاسىنداعى فرانتسۋز رەسپۋبليكاسىنىڭ باس كونسۋلى الەكسيس شاحتاحتينسكي, قر ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ, الماتى قالالىق سوتىنىڭ ازاماتتىق جانە اكىمشىلىك ىستەر جونىندەگى باسقارماسىنىڭ توراعاسى باحىت قاسەينوۆ, فرانتسۋز ساۋدا-ونەركاسىپتىك پالاتاسىنىڭ ۆيتسە-پرەزيدەنتى كريستوف پەليسسون, س.د. اسفەندياروۆ اتىنداعى قازۇمۋ رەكتورى تالعات نۇرعوجين, قازاقستان-رەسەي مەديتسينالىق ۋنيۆەرسيتەتىنىڭ رەكتورى نۇرلان جايناقباەۆ, «ورتالىق كلينيكالىق اۋرۋحانا» اق كلينيكاسىنىڭ ۆيتسە-پرەزيدەنتى شولپان ايۋپوۆا جاستارعا قۇتتىقتاۋ لەبىزدەرىن جولدادى.
فرانتسۋز تىلىندە ءوز جوبالارىن قورعاعان ستۋدەنتتەر مەن ماگيسترانتتاردىڭ «بۇگىنگى زامانعا ساي سەرپىلىس» تاقىرىبى كوپشىلىك نازارىنا ۇسىنىلدى.
قازاقستانداعى «رۋسسكي رەگيستر» سەرتيفيكاتتاۋ قاۋىمداستىعىنىڭ ديرەكتورى ءبىرجان جانتۋاروۆ سوربوننا-قازاقستان ينستيتۋتىنىڭ باسشىلىعىنا «ساپا راستالعان» سەرتيفيكاتىن تابىس ەتتى.
حالىقارالىق شارا بارىسىندا سوربوننا-قازاقستان ينستيتۋتىنىڭ قازاقستاندىق سەرىكتەسى – قازاقستان رەسپۋبليكاسى تۇڭعىش پرەزيدەنتىنىڭ قورى ۇسىنعان «بەلگىسىز قازاقستان» جاس سۋرەتشىلەردىڭ فوتوكورمەسى, سونداي-اق نۇرلان قيلىباەۆتىڭ «مىڭ بوياۋلى ۇلى دالا» كورمەسى ۇلكەن قىزىعۋشىلىق تۋعىزدى. فيلوسوفيا دوكتورى, ديزاين كافەدراسىنىڭ دوتسەنتى راۋشان قاناپيانوۆانىڭ جەتەكشىلىگىمەن وتكەن «شاڭىراق» جانە «جەر انا» ءسان كورسەتىلىمدەرى كوپشىلىكتىڭ كوڭىلىنەن شىقتى.
شارا سوڭى ۋنيۆەرسيتەت ستۋدەنتتەرىنىڭ قولدانبالى ونەر بۇيىمدارىنىڭ كورمەسىن, ارنايى دايىندالعان كونتسەرتتىك باعدارلامانى, سونداي-اق فرانتسۋز تىلىندە فيلمدەر تاماشالاۋمەن جالعاسىن تاپتى.
ەلۆيرا سەرىكقىزى,
«ەگەمەن قازاقستان»
الماتى