بۇگىن ۇكىمەتتە پرەمەر-ءمينيسترىنىڭ ءبىرىنشى ورىنباسارى ا. ءماميننىڭ توراعالىعىمەن توتەنشە جاعدايلاردى ەسكەرتۋ جانە جويۋ جونىندەگى ۆەدومستۆوارالىق مەملەكەتتىك كوميسسيا وتىرىسى ءوتتى.
وتىرىس بارىسىندا ەلىمىزدىڭ تۇرعىن ءۇي سەكتورىندا ءورت قاۋىپسىزدىگىن ودان ءارى قامتاماسىز ەتۋ شارالارى قارالدى.
وتىرىسقا كوميسسيا مۇشەلەرى, مەملەكەتتىك ورگانداردىڭ باسشىلارى قاتىستى. شاراعا بەينەكونفەرەنتسيا بايلانىسى ارقىلى وبلىستاردىڭ, رەسپۋبليكالىق ماڭىزى بار قالالاردىڭ اكىمدەرىنىڭ ورىنباسارلارى, توتەنشە جاعدايلار جونىندەگى دەپارتامەنتتەردىڭ باسشىلارى قاتىستى.
پرەمەر-ءمينيستردىڭ بيىل 5 اقپاندا ۇكىمەتتىڭ وتىرىسىندا بەرگەن تاپسىرمالارىن ورىنداۋ اياسىندا ىشكى ىستەر مينيسترلىگىنىڭ توتەنشە جاعدايلار كوميتەتىنىڭ بولىمشەلەرى رەسپۋبليكالىق جانە وڭىرلىك دەڭگەيلەردە ءورتتىڭ الدىن الۋ جۇمىستارىن ۇيىمداستىرۋ جونىندەگى شتابتار قۇرۋ جۇمىستارىن باستادى.
جىلىتۋ كەزەڭىنىڭ سوڭىنا دەيىن تۇرعىن ءۇي سەكتورىنداعى ورتتەردى بولدىرماۋ بويىنشا الدىن الۋ ءىس-شارالارىن ىسكە اسىرۋ جۇمىستارى جالعاسادى. بۇدان بوزگە, كۇندەلىكتى ومىردە ءورت قاۋىپسىزدىگى سالاسىنداعى ءبىلىمى بار ازاماتتاردىڭ سانىن ارتتىرۋ, سونداي-اق ءتۇسىندىرۋ جۇمىستارىنىڭ ساپاسىن جاقسارتۋ بويىنشا قوسىمشا شارالاردى ىسكە اسىرۋ جوسپارلانىپ وتىر.