جاڭا تەحنولوگيا قاراپايىم شامدارعا دا كەلىپ جەتتى. بۇرىنعى قولدانىستاعى قىزدىرۋ شامدارىن جارىق ديودتى بالاماسى باسىپ وزدى. ۇزاق قىزمەت ەتەدى, ەسەسىنە شىعىنى از, ەلەكتر قۋاتىن ۇنەمدەيدى. مۇنداي «اقىلدى» شامدار كۇن ساناپ كوركەيىپ كەلە جاتقان اتىراۋ كوشەلەرىن ءتىپتى جارقىراتا ءتۇستى. 2017 جىلى 19 كوشەگە 1066 جارىق ديودتى شام ورناتىلعان ەدى, وتكەن جىلى كوشە سانى 20-عا جەتتى. ال 2019-2020 جىلدارى وبلىس ورتالىعىندا 192 كوشە, قۇلسارى قالاسىندا 83 كوشە جاڭا تەحنولوگيانىڭ يگىلىگىمەن جارىقتاندىرىلادى دەگەن جوسپار بار.
جوبا مەملەكەتتىك-جەكەمەنشىك سەرىكتەستىك اياسىندا قولعا الىنىپ وتىر. ءداستۇرلى مەملەكەتتىك ساتىپ الۋلارمەن سالىستىرعاندا مەملەكەتتىك-جەكەمەنشىك سەرىكتەستىك مودەلىن قولدانۋ كەزىندە قۇرىلىس ساپاسى جوعارى بولادى, ويتكەنى جوبانى ارى قاراي پايدالانۋعا جەكە سەرىكتەس جاۋاپتى. كوشە جارىقتاندىرۋ قۇرىلىسى مەن پايدالانۋ ءىسىن ەلىمىزدە العاش قولعا العان جەكە كومپانيا – «باتىس ترانزيت» اق. مەكەمەنىڭ اتقارۋشى ديرەكتورى ماقسات يساقانوۆ وبلىس ورتالىعى مەن قالا ماڭىنداعى ەلدىمەكەندەردىڭ جانە قۇلسارى قالاسىنىڭ كوشەلەرىندەگى جارىق شامدارىن اۋىستىرۋ جۇمىستارى جالعاسىپ جاتقانىن ايتادى. جالپى ۇزىندىعى 220 شاقىرىم كوشەگە جاڭا شامدار ورناتىلادى. كومپانيا جوباعا 8 ملرد تەڭگە كولەمىندە ينۆەستيتسيا تارتۋدى جوسپارلاعان.
جاسىراتىنى جوق, بۇعان دەيىن اتىراۋدىڭ ورتالىق كوشەلەرى عانا سامالاداي جارقىراپ تۇرعانىمەن, قالا شەتىن, ىرگەلەس ەلدىمەكەندەردى ءتۇن بولسا قويۋ قاراڭعىلىق باساتىن. مەملەكەتتىك-جەكەمەنشىك ارىپتەستىك اياسىندا وسى ولقىلىقتىڭ ورنى تولماق. بۇل جاڭالىقتى قالا تۇرعىندارى دا قۋانا قۇپتاپ وتىر. كولىك قوزعالىسى مەن جاياۋ جۇرگىنشىلەردىڭ قاۋىپسىزدىگى ءۇشىن تۇنگى جارىقتىڭ ورىنى بولەك.
- وتكەن جىلى قالادا ەلەكتر قۋاتىنان 3 ملن تەڭگە ۇنەمدەلدى, Led-شامداردىڭ وسىنداي ارتىقشىلىعى بار, - دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى دانيار مۇقىشەۆ. –تاعى ءبىر اتاپ وتەر جايت, شامداردى قۋات كوزىنىڭ تۇسەتىن اۋماعىنا قاراي ازايتىپ نە كوبەيتۋگە بولادى. شامداردى ارنايى قاداعالايتىن ديسپەتچەرلىك بولىمشە اشىلدى, سول ارقىلى ەلەكتروندى جۇيەدە شامداردىڭ جاعدايلارىن انىقتاۋعا مۇمكىندىك بار. جاڭا جوبانىڭ مەرزىمى ون جىل.
بولاشاقتا اتىراۋ-يندەر, اتىراۋ-دوسسور تاس جولدارى دا جارىقتاندىرىلادى دەگەن جوسپار بار. مەملەكەت باسشىسىنىڭ حالىققا جولداۋىندا اتاپ كورسەتىلگەن «اقىلدى قالا» تۇجىرىمداماسىن جۇزەگە اسىرۋ جولىنداعى يگىلىكتىڭ ءبىرى – وسى.
باقىتگۇل باباش,
«Egemen Qazaqstan».
اتىراۋ