گاۆاي ارالدارى تەمەكى ساتىپ الۋعا رۇقسات ەتىلگەن جاس مولشەرىن 100-گە دەيىن كوتەرۋدى كوزدەپ وتىر دەپ حابارلايدى BBC News اقپاراتتىق اگەنتتىگى.
گاۆاي ارالدارى زاڭ جۇيەسىنە تەمەكى ساتىپ الۋ جاسىن بىرتىندەپ كوتەرەتىن وزگەرىس ەنگىزىلمەك. بۇگىندە ارالدار ەلىندە 21 جاستان باستاپ جەتكىنشەكتەردىڭ تەمەكى ساتىپ الۋعا مۇمكىندىگى بار. 2020 جىلعا ارنالعان جوبا بويىنشا بۇل مەجەنى 30 جاسقا دەيىن, ال 2021 جىلى – 40, 2024 جىلى 100 جاسقا دەيىن جەتكىزۋدى جوسپارلاپ وتىر.
بىراق بۇل شەكتەۋ ەلەكتروندى تەمەكىلەرگە, شاينايتىن تەمەكىلەرگە قاتىستى ەمەس. زاڭ جوباسىنىڭ باستاماشىسى – بۇرىنعى ۆراچ-رەانيماتولوگ, دەموكرات ريچارد كرەيگان. «تەمەكىگە دەگەن تاۋەلدىلىگى شەكتەن اسقان ادامدار بار. مەنىڭ ويىمشا, ولاردى تەمەكى وندىرۋشىلەر وزدەرىنىڭ ق ۇلى ەتكەن. سوندىقتان زياندى ەكەنىن بىلە تۇرا باس تارتا المايدى», دەدى ول «Hawaii Tribune-Herald» گازەتىنە بەرگەن سۇحباتىندا.
ولار ۇسىنعان زاڭ جوباسىندا گاۆايلىقتاردىڭ تەمەكىدەن قاتتى زارداپ شەگىپ وتىرعانى ايتىلادى. الايدا, بۇل قيىندىق جىل سايىن مەملەكەتتىك بيۋدجەتكە 100 ملن دوللار كولەمىندە پايدا اكەلەتىن تەمەكى سالىعىنان تۇسەتىن قارجىنىڭ كەمىپ قالۋىمەن بايلانىستى ەمەس. زاڭ جوباسىن جاساۋشىلار جوسپارلارى جۇزەگە اسقان جاعدايدا بۇل قارجىنىڭ ورنىن تولتىراتىن باسقا دۇنيەلەر جاساۋ كەرەكتىگىن العا تارتتى. سونداي-اق, بۇل جوبا دۇكەن سورەلەرىنىڭ تەمەكىدەن تولىعىمەن تازاراتىنىنا كەپىل. الايدا, ەلگە كەلگەن تۋريستەرگە بۇرىنعىداي وزدەرىمەن تەمەكى الىپ كەلۋگە رۇقسات ەتىلەدى.
الپاۋىت ەل اقش-تا 18 جاسقا دەيىن جاسوسپىرىمدەرگە تەمەكى ساتۋعا تىيىم سالىنعان. بىراق, گاۆاي ارالدارىندا بۇل زاڭ قاتالىراق. ساۋالناما ناتيجەسى كورسەتكەندەي, اقش-تا ەرەسەكتەردىڭ 16%-ى تەمەكىگە اۋەس بولسا, ايەلدەردىڭ 13,5%-ى, ەرلەردىڭ – 17,5%-ى تەمەكىگە تاۋەلدى. 2018 جىلعى دەرەكتەرگە سۇيەنسەك, ەڭ تەمەكىگە تاۋەلدى ەل – كيريباتي. بۇل مەملەكەتتە ەرلەردىڭ 66%-ى, ايەلدەردىڭ 34%-ى تەمەكى شەگەدى. ال ەۋروپا اۋماعىندا تەمەكىگە قۇمارلار ەڭ كوپ تىركەلگەن ايماق – چەرنوگوريا. مۇندا ەرەسەكتەردىڭ 46%-ى شىلىمعا اۋەس. ايەلدەردىڭ تەمەكىگە تاۋەلدىلىگى ەرلەردەن جوعارى جالعىز ەل – دانيا. مۇندا ەرلەردىڭ 18,9%-ى, ايەلدەردىڭ 19,3%-ى تەمەكى شەگەدى.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرىنە سۇيەنسەك, جىل سايىن 7 ميلليونعا تارتا ادام تەمەكى تۋدىراتىن اۋرۋلاردان قايتىس بولادى.
سالتانات شىءنادىل