قۇرلىقتىق حوككەي ليگاسىنىڭ (قحل) بيىلعى ماۋسىمىندا استانانىڭ «بارىسى» جاقسى ناتيجە كورسەتىپ, ايشىقتى ونەرىمەن ءوز جانكۇيەرلەرىن قۋانتۋدا.
ءداپ قازىرگى كەزدە ولار چەرنىشەۆ ديۆيزيونىندا كوش باستاسا, شىعىس كونفەرەنتسياسىندا ەكىنشى ساتىعا جايعاستى. ال تۇراقتى بىرىنشىلىكتە بەسىنشى ورىنعا تۇراقتادى. ال الدا ءالى التى باسەكەنىڭ بارىن ەسكەرسەك, جەرلەستەرىمىزدىڭ بۇل كورسەتكىشى جاقسارا تۇسەتىنى ءسوزسىز.
الايدا گاگارين كۋبوگى قارساڭىندا كەرتيس ۆولك, برەندون بوچەنسكي جانە مەتتيۋ فرەتتيننىڭ جاراقات الۋى استانالىق كلۋبتىڭ باپكەرلەرىن قاتتى الاڭداتىپ وتىر. ولاردىڭ ۇشەۋى دە «بارىستىڭ» بەتكەۇستار ويىنشىلارى. ماسەلەن, 1 اقپاندا جاراقاتتانعان كەرتيس ۆولكتىڭ ەنشىسىندە 27 ۇپاي (9 گول+18 پاس) بار. 4 اقپاندا ءبىر-بىرىمەن سوقتىعىسىپ قالعان برەندون بوچەنسكي مەن مەتتيۋ فرەتتيننىڭ دە كورسەتكىشتەرى جوعارى. وسى كۇنگە دەيىن بوچەنسكي 32 ۇپاي (14 گول+18 پاس) جيسا, فرەتتين 39 ۇپايدى (17 گول+22 پاس) ەنشىلەدى. ارينە, وسىنداي شەبەر شابۋىلشىلار شەشۋشى ماتچتاردا قاتارعا قوسىلا الماسا, «بارىستىڭ» ءبىراز السىرەيتىنى انىق.
عالىم سۇلەيمەن,
«Egemen Qazaqstan»