نۇرلان نىعماتۋليننىڭ توراعالىعىمەن وتكەن پالاتانىڭ جالپى وتىرىسىندا دەپۋتات ساپار احمەتوۆ اۆتوكولىكتەردى مىندەتتى تەحنيكالىق بايقاۋدان وتكىزۋدىڭ «نەمقۇرايلى جانە فورمالدى وتكىزىلەتىنى بارىمىزگە ءمالىم» دەي كەلە يندۋستريا جانە ينفراقۇرىلىمدىق دامۋ مينيسترىنە بۇل سالادا جەمقورلىق جاعدايلارىنىڭ ورىن الىپ وتىرعاندىعىن دا ايتتى. سوندىقتان دا اتالعان زاڭ جوباسىنىڭ وسى كەلەڭسىز جاعدايلاردى تۇبەگەيلى جويۋعا اسەرىن جانە بىرىڭعاي اقپاراتتىق جۇيەنىڭ ينتەگراتسياسى تۋرالى سۇرادى.
مينيستر وسى ورايدا ىشكى ىستەر, اۋىل شارۋاشىلىعى, قورعانىس, سونداي-اق يندۋستريا جانە ينفراقۇرىلىمدىق دامۋ مينيسترلىكتەرىنىڭ اقپاراتتىق جۇيەسى بىرىكتىرىلەتىندىگىن جانە قۇجاتتاردىڭ تسيفرلىق ۇلگىگە كوشەتىندىگىن جەتكىزدى.
– بۇگىنگى كۇنى تەحنيكالىق بايقاۋ قۇجاتتارىنا جۇرگىزۋشىلەر قولمەن زاڭسىز وزگەرىس ەنگىزىپ جاتىر. بۇعان ەندى جول بەرىلمەيدى, – دەدى ج.قاسىمبەك.
دەپۋتاتتار كوتەرگەن تاعى ءبىر ماسەلە كولىكتىك باقىلاۋ ورگاندارىنىڭ شەتەلدىك كولىكتەردى جاپپاي توقتاتۋعا مۇمكىندىك بەرەتىن زاڭدى نەگىزدەرگە قاتىستى بولدى. ماسەلەن, زاڭ جوباسىندا كولىكتىڭ شەتەلدە تىركەلگەندىگى ونى لاۋازىمدى تۇلعانىڭ توقتاتۋىنا نەگىز بولا الادى دەگەن تالاپ بار بوپ شىقتى. بۇل تالاپقا دەپۋتات امانجان جامالوۆ تۇسىنبەستىك تانىتىپ, بۇنداي نەگىزدىڭ قيسىنسىز ەكەندىگىن جانە تۋريستىك سالانىڭ دامۋىنا تۇساۋ بولماي ما دەگەن ۇسىنىسىن جەتكىزدى.
وعان يندۋستريا جانە ينفراقۇرىلىمدىق دامۋ ءمينيسترى جاڭا تالاپتىڭ تەك كوممەرتسيالىق تەحنيكاعا, ياعني جولاۋشىلار مەن جۇك تاسىمالداۋشى شەتەلدىكتەرگە قاتىستى ەكەندىگىن اتاپ ءوتتى. ماسەلەن, مينيسترلىك وسى تالاپ ارقىلى قازاقستان ارقىلى وتەتىن شەتەلدىك كولىكتەردىڭ ءبىزدىڭ ەلىمىزدە جولاۋشىلار جانە جۇك تاسىمالىنا توسقاۋىل قويماق. دالىرەك ايتقاندا, «جولشىباي الا كەتۋ» دەگەن پايدانىڭ كوزىنە تىيىم سالىنادى.
ن.نىعماتۋلين وسى ورايدا, كۇن سايىن ەلىمىزدىڭ شەكاراسىنان شەتەلدىك 6 مىڭ كولىك وتەتىندىگىن, ونىڭ 4 مىڭى – جەڭىل اۆتوكولىك, 100 قارالى اۆتوبۋس ەكەندىگىن ايتتى. ال ولاردى تەك شەتەلدىك بولعاندىعى ءۇشىن عانا توقتاتۋ جەمقورلىققا جول اشىپ, سىرتتان كەلەتىن تۋريستەردى شوشىتۋى مۇمكىن ەكەندىگىن جەتكىزدى.
ماسەلەنىڭ تۋريستىك سالاعا قاتىستى تۇسىنا جاۋاپ بەرگەن مادەنيەت جانە سپورت ءمينيسترىنىڭ ورىنباسارى ەرلان قوجاعاپانوۆ ەل شەكاراسىنان تۋريستىك اۆتوبۋستاردى كەدەرگىسىز وتكىزۋگە ۇلتتىق قاۋىپسىزدىك كوميتەتى كەلىسىم بەرگەندىگىن, جىل سايىن ەلىمىزگە كەلەتىن تۋريستەر سانى ارتقاندىعىن ايتا باستاپ ەدى, ءماجىلىس توراعاسى ونىڭ ءسوزىن كىلت ءۇزدى.
– سىزدەر تۋريستەر مىنگەن كولىكتەردى نەگىزسىز توقتاۋعا جول بەرەتىن تالاپتارعا نەلىكتەن كەلىستىڭىزدەر؟ زاڭ تالاپتارى ءبىر بىرىنە قايشى كەلمەۋى ءتيىس. اتالعان ماسەلەنى زاڭ جوباسىنىڭ ەكىنشى وقىلىمىنا دەيىن تارتىپكە كەلتىرىڭىزدەر, – دەپ ءماجىلىس توراعاسى كەسىمدى ءسوزىن ايتتى.
جالپى وتىرىستا دەپۋتاتتار زاڭ جوباسىمەن قامتىلعان ونلاين تاكسي قىزمەتىن تارتىپكە كەلتىرۋ, ارزان اۋە تاسىمالىن ۇيىمداستىرۋ جانە باسقا دا وزەكتى ماسەلەلەردى كوتەردى.
سايىپ كەلگەندە, كۇن تارتىبىنە شىعارىلعان زاڭ جوبالارىنىڭ بارلىعى ماقۇلدانىپ, دەپۋتاتتار ورتالىق مەملەكەتتىك ورگانداردىڭ باسشىلارىنا ءداستۇرلى ساۋالدارىن جولدادى.
تاعى ءبىر ايتا كەتەرلىگى, دەپۋتاتتار بۇگىننەن باستاپ ايماقتارعا شىعىپ, سايلاۋشىلارىمەن كەزدەسۋلەرىن باستايدى.
سەرىك ابدىبەك,
«Egemen Qazagstan»