بىلتىر الماتى, جامبىل, قىزىلوردا, ماڭعىستاۋ, تۇركىستان وبلىستارىنان جانە شىمكەنت قالاسىنان ماعجان ەلىنە 1396 ادامدى قامتيتىن 414 وتباسى كوشىپ كەلىپ, 126 ەلدى مەكەن مەن وبلىس ورتالىعىنا ورنالاستىرىلدى.
جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم جەتەكشىسى الما ماحمەتوۆانىڭ ايتۋىنشا, مەملەكەت تاراپىنان قولعا الىنعان اۋقىمدى باعدارلاما تەرىسكەي جاقتاردا ەڭبەك نارىعىن نىعايتۋدا, كادر تاپشىلىعىن جويۋدا, تۇرعىلىقتى حالىقتى كوبەيتۋدە ءوز ناتيجەسىن بەرىپ كەلەدى. ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017 – 2021 جىلدارعا ارنالعان باعدارلاماسى شەڭبەرىندە قونىس اۋدارعان وتباسىلاردىڭ ءار مۇشەسىنە 35 ايلىق ەسەپتىك كورسەتكىش كولەمىندە دەمەۋقارجى تولەنەدى. تۇرعىن ءۇيدى جالعا الۋ, كوممۋنالدىق تولەمدەردى وتەۋ بويىنشا دا شىعىندار ورنى تولتىرىلادى. بۇگىنگە دەيىن قونىستانۋشىلاردان 238 وتباسى تۇرعىن ۇيلەرىن تولىقتاي ساتىپ الدى. 600-دەن استام ادام جۇمىسقا ورنالاستىرىلدى.
ەڭبەك رەسۋرستارىنىڭ تيىمدىلىگىن ارتتىرۋ بويىنشا جۇمىس كۇشى كوپ وڭتۇستىك وڭىرلەردەن تۇرعىنداردى تارتۋ بيىل دا جالعاسىن تابادى. بۇل باعدارلاما دەنساۋلىق ساقتاۋ سالاسىنداعى ماماندار قاتارىن تولىقتىرۋعا وڭ ىقپال ەتپەك. سوڭعى ەكى جىلدا اققايىڭ اۋداندىق اۋرۋحاناسىنا جوعارى ساناتتى 4 دارىگەر كەلگەن. بارلىعى دا جايلى قىزمەتتىك ۇيگە جايعاسقان. وسىلايشا دەنساۋلىق ساقتاۋ سالاسى بويىنشا اۋدانداعى كادر تاپشىلىعى بىرتىندەپ شەشىلىپ كەلەدى.
ەگىنشىلىكپەن, كوكونىس وسىرۋمەن اينالىسقىسى كەلەتىندەرگە ءتالىمى جەرلەر ءبولىنىپ بەرىلەدى.
«ەڭبەك» مەملەكەتتىك باعدارلاماسى شەڭبەرىندە وبلىسىمىزعا قونىس اۋدارۋشىلارعا 302 ەلدى مەكەندە تۇرعىن ءۇي سالۋ جانە ساتىپ الۋ بويىنشا كەشەندى جوسپار ازىرلەنگەن. وسىعان وراي بيىل 600 باسپانا تۇرعىزىلادى. ال 2020 جىلى – 1 مىڭ, 2021 جىلى 1400 تۇرعىن ءۇي سالۋ جوسپارلانعان.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى