سۇلتانماحمۇت تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ پروفەسسورى مەن ماگيسترانتتارى سپورتشىلارعا ارنالعان «التىن سپورت» ءبيوونىمىن جاساپ شىعاردى. بۇل تۋرالى pavlodarnews.kz سايتى حابارلادى.
«قازىرگى تاڭدا سپورتشىلاردىڭ تاماقتانۋى ءۇشىن «اۋىل شارۋاشىلىعى جانۋارلارىنىڭ ءسۇتى نەگىزىندە ارنايى تاماقتانۋ ءۇشىن فەرمەنتتەلگەن ازىق-ت ۇلىك بيوتەحنولوگياسى» تاقىرىبىندا زەرتتەۋ جۇمىستارى جۇرگىزىلۋدە. مۇنداي وي وتكەن جىلى پايدا بولعان ەدى. بۇل ءونىم بەلگىلى ءبىر توپقا كىرەتىن ادامدارعا ارنالعان. ونىڭ ىشىندە بالالار مەن ەگدە جاستاعى ادامدار, اسكەري قىزمەتكەرلەر بار. بۇدان كەيىن سپورتتىق تاماقتانۋ تاقىرىبىندا وتكەن جىلى زەرتتەۋ جانە اپروباتسيا جۇرگىزدىك. پ.ستولىپين اتىنداعى ومبى اگرارلىق مەملەكەتتىك ۋنيۆەرسيتەتىمەن بىرگە جۇمىس ىستەپ, رەسەيلىك حالىقارالىق پاتەنت الدىق. قازىرگى تاڭدا بۇل ونىمگە پمۋ-ءدىڭ اتىنان پاتەنت الۋ شارالارى جۇرگىزىلۋدە. «التىن سپورت» دەگەن اتاۋ بەرىلدى», - دەيدى جوبا جەتەكشىسى بيوتەحنولوگيا كافەدراسىنىڭ پروفەسسورى مارينا تەمەرباەۆا.
2018 جىلدىڭ قاراشا ايىندا ماگيسترانتتار التاي ولكەسىنىڭ بيسك قالاسىندا وتكەن ءبىرىنشى بۇكىلرەسەيلىك شىعارماشىلىق جوبالار بايقاۋىنا قاتىسىپ, «ۇزدىك ءبيوونىم» نوميناتسياسىندا ءبىرىنشى ورىن جەڭىپ العان. قازىرگى تاڭدا ومبى قالاسىندا تاعىلىمدامادان ءوتىپ جاتقان ماگيسترانت گۇلنار جانعۇلوۆا وسى تاقىرىپ بويىنشا زەرتتەۋ جۇرگىزۋدە.
«التىن سپورت» بيوكوكتەيلى - اشىتىلعان ءسۇت ءونىمى. ونىڭ قۇرامىنا كىرەتىن ينگرەديەنتتەردى ازىرگە ايتا المايمىز. سپورتشىلاردىڭ اعزاسىندا جاتتىعۋ كەزىندە ميكروەلەمەنتتەر مەن دارۋمەندەر بۇزىلادى. سوندىقتان سپورتپەن اينالىساتىندار مەن سەسسيا كەزىندە ستۋدەنتتەر ءۇشىن پايداسى زور ءارى يممۋنيتەتتى كوتەرەدى. بايىتىلعان جانە ارنايى ميكروفلورا تاڭداپ الىنعان, اقۋىزدارعا باي. جاڭا شىعارىلعان جانە كەپتىرىلگەن پروتەين تۇرىندە قولدانۋعا بولادى», - دەيدى مارينا تەمەرباەۆا.
پروفەسسوردىڭ ايتۋىنشا, ءسۇت قوسپاسى اۋىل شارۋاشىلىعى جانۋارلارىنان الىنادى. كوبىنەسە كەلىسىمشارت بويىنشا وڭىردەگى ۋسپەن اۋدانىنىڭ «گاليتسكوە» جانە شارباقتى اۋدانىنىڭ «پوبەدا» شارۋا قوجالىقتارىنداعى سيممەنتال تۇقىمدى سيىرى مەن ماي اۋدانىنداعى «اقجار-ءوندىرىس» اگروفيرماسىنان تاۋلى التاي جانە زاانەن ەشكىلەرىنىڭ ءسۇتى قولدانىلادى.
«قازاقستاندا كوپتەگەن شارۋا قوجالىقتارى ەشكى شارۋاشىلىعىمەن اينالىسۋدى قولعا الۋدا. بۇگىنگى تاڭدا سپورتشىلارعا ارنالعان تاعام رەسەي مەن بەرالۋس ەلىنەن ساتىپ الىنادى. سوندىقتان ءبىز نارىقتا ءوز ءونىمىمىزدى ۇسىنۋدى كوزدەپ وتىرمىز. جاستار جىلى اياسىندا ماگيسترانتتار ءارى قاراي ستارتاپ-جوبالارعا قاتىسادى. بۇل جوبامەن حالىقارالىق كونفەرەنتسيالارعا قاتىسىپ, سينگاپۋر ەلىندە ماقالا جارىق كوردى», - دەيدى پروفەسسور.