جاستار – بولاشاقتىڭ التىن دىڭگەگى, مەملەكەتتىڭ اسىل تىرەگى. جاستارعا ءومىردىڭ ءمانىن, قوعامداعى ورنىن ىزدەۋ ءتان. وسى ىزدەنىس پەن تالپىنىس ناتيجەسى جاستاردىڭ كەيىنگى ءرولىن, ءتىپتى توپتاسا كەلە بۇكىل مەملەكەتتىڭ تاعدىرىن ايقىندايدى.
وسكەلەڭ ۇرپاقتىڭ ءبازبىر وكىلدەرى اق جولدان اداسىپ, زالىم كۇشتەردىڭ, جات اعىمداردىڭ جەتەگىندە كەتىپ جاتاتىنى بار. ەلباسىنىڭ جاستار جىلى سالتاناتىندا اتاقتى «جۋسان» وپەراتسياسى تۋرالى ءسوز قوزعاۋى, جاستاردى بوستان باسىن بودان ەتۋدەن ساقتاندىرۋى دا وسىدان.
ەل تاريحىندا ەلەۋلى وقيعا رەتىندە قالار وسى ماڭىزدى جىلدىڭ اشىلۋ راسىمىندە قازاقستان پرەزيدەنتى وسكەلەڭ ۇرپاقتىڭ دارىندى وكىلدەرىنە, جاس كاسىپكەرلەر مەن يننوۆاتورلارعا, جاس وتباسىلارعا ىرگەسى بەكىپ, بۋىنى قاتايعانشا قولداۋ كورسەتۋ بويىنشا كوپتەگەن تىڭ تاپسىرمالارىن, جاڭا باستامالارىن جاريا ەتتى. مەملەكەت باسشىسى بىلتىر ءوز باستاماسىمەن قۇرىلعان «جاس سارباز» قوزعالىسى نەگىزىندە قازاقستاندا اسكەري-پاتريوتتىق تاربيە بەرۋ ءىسىن دامىتۋدى جۇكتەدى. سونداي-اق ۇكىمەتكە 2025 جىلعا دەيىنگى اسكەري-پاتريوتتىق تاربيە بەرۋ باعدارلاماسىن ازىرلەۋدى تاپسىردى.
«جاس سارباز» رەسپۋبليكالىق بالالار مەن جاسوسپىرىمدەردىڭ اسكەري-پاتريوتتىق قوزعالىسىنىڭ قۇرىلۋىنا ءبىزدىڭ اۋعان ارداگەرلەرى جانە ءوزىم باسقاراتىن «Qazaqstan Ardagerleri» قاۋىمداستىعى بەلسەندى اتسالىستى, ەندى ونىڭ قازىرگى جۇمىستارىن ىلگەرىلەتۋگە ۇلەس قوسۋدا. مەن ماسەلەن, «جاس سارباز» رقب ۇيلەستىرۋ كەڭەسى توراعاسىنىڭ ورىنباسارىمىن.
بۇگىندە ەلباسى قويعان مىندەتتەر مەن تاپسىرمالاردى ورىنداۋ ماقساتىندا قورعانىس مينيسترلىگىمەن بىرگە, «جاس سارباز» قوزعالىسىنىڭ رەسپۋبليكالىق جانە وڭىرلىك دەڭگەيلەردەگى ءىس-شارالارىنىڭ جوسپارى بەكىتىلدى. ونىڭ اياسىندا «جاستار – وتانعا» لاگەرلەرى, «جىگەرلى جاس سارباز» جانە باسقا دا ءىرى جوبالار قولعا الىنۋدا. ال «اسكەردەگى كۇندەر» جوباسى شەڭبەرىندە جاسوسپىرىمدەر ەكى كۇنگە اسكەري بولىمدەرگە بارىپ, جاۋىنگەرلەردىڭ تىنىس-تىرشىلىگىمەن تانىسادى, قارۋ تۇرلەرىن بولشەكتەپ, قايتا جيناۋدى ۇيرەنەدى, ەل قورعاۋدىڭ ءمانىسى مەن ماڭىزىنا قانىعادى. «اسكەردەگى كۇندەر» ءار ايماقتا جىلدىڭ ءار مەزگىلىندە ءبىر رەتتەن ۇيىمداستىرىلادى. مىسالعا, كوكتەمدە – ناۋرىز, ال جازدا – شىلدە ايىندا وتكىزىلەدى.
بۇدان وزگە, ارينە ۇلى وتان سوعىسى جانە اۋعان سوعىسى ارداگەرلەرىنىڭ تاعىلىمى مەن ۇلاعاتىن, اقىلى مەن كەڭەسىن تىڭداۋ ءۇشىن جاي كەزدەسۋلەر عانا ەمەس, بالالاردىڭ ولارمەن جاقىن ارالاسۋى, بوس ۋاقىتتارىن ارداگەرلەرمەن وتكىزۋى جولعا قويىلادى. «جاس ساربازدىڭ» بارلىق وڭىرلەردە ءتول جەلىلەرى بولادى. قوزعالىس مۇنىڭ سىرتىندا جاستاردى ءوز قاتارىنا كوپتەپ تارتۋ ءۇشىن ءوز قىزمەتىندە الەۋمەتتىك جەلىلەردى, youtube-ارنالاردى كەڭىنەن پايدالانادى.
جالپى, «جاس سارباز» قوزعالىسىنىڭ باستى ماقساتى – بارلىق وڭىرلەرىمىزدەگى جاس قازاقستاندىقتارعا ءوز الەۋەتتەرىن جۇزەگە اسىرۋىنا جاردەمدەسۋ, ولارعا ءورشىل باتىرلارىمىز ۇلگىسىندە پاتريوتتىق تاربيە بەرۋ, بويلارىنا وتانعا دەگەن سۇيىسپەنشىلىكتى ەگۋ, رۋحاني كەمەلدىككە العاشقى قادامىن جاساۋىنا سەپتەسۋ بولىپ تابىلادى.
باقىتبەك سماعۇل,
«Qazaqstan Ardagerleri» قاۋىمداستىعىنىڭ توراعاسى, ءماجىلىس دەپۋتاتى