باستى باعدار – باسپانا

وسىعان وراي بۇگىندە اقتوبە ايماعىندا ناقتى ءىس-شارالار كەشەنى بەلگىلەندى. بۇل ءىستىڭ ۇيت­قىسى اقتوبە قالاسىنىڭ اكىم­دىگى مەن اقتوبە وبلىستىق جاس­تار ساياساتى ماسەلەلەرى باسقار­ماسى بولىپ وتىر. بۇل باعىتتا ولار «تۇرعىن ءۇي قۇرىلىس جيناق بانكى» اق-تىڭ فيليالىمەن تىزە قوسىپ, قويان-قولتىق قىزمەت جاساۋ جوسپارىن بەلگىلەپ, ونى ىسكە اسىرۋعا كىرىستى. 

− مۇنداعى باستى ماقسات – جاس­تار  مەن جاس وتباسىلاردىڭ تۇر­عىن ۇيمەن قامتىلۋىنا قول­داۋ كورسەتۋ. سونىڭ ىشىندە تۇ­راق­­تى ءۇي-جايعا قول جەتكىزە ال­ماي جۇرگەن جاس وتباسىلار مەن جاستارعا كومەك بەرۋ. بۇل جو­نىندە وڭىردە ارنايى باعدار­لاما جاساقتالدى, − دەدى باسقارما باسشىسى نۇرلان كۇنتۋوۆ. جاس­تار جەتەكشىسىنىڭ ايتۋىنشا, بىرەگەي باعدارلاما 29 جاسقا دە­يىنگى جۇمىس ىستەيتىن جاستارعا شاپا­ع­ا­تىن تيگىزە الادى. ارينە بۇل قۇجاتتىڭ وزىنە ءتان سيپاتتارى مەن تالاپتارى دا جوق ەمەس. سو­عان سايكەس باعدارلاما شەڭ­بە­رىن­دە باسپاناعا يە بولۋعا تىلەك بىل­دىرگەن جاستىڭ سوڭعى بەس جىل­دا ءوز اتىندا جەكە يەلىگىندەگى ءۇيى بولماۋ كەرەك. ايتسە دە, جاس­تار اقتوبە قالاسىندا تۇراقتى تىركەلۋى قاجەت. تاعى ءبىر كريتەري − جاستاردىڭ تولەم قابىلەتى مەن اتالعان بانكتە ەسەپشوتىنىڭ بولۋى. بۇگىندە وسىنداي شارتتار مەن تالاپتاردى وزەك ەتكەن رەسمي حات مۇددەلى ۇيىمدار تاراپىنان وبلىستاعى بارلىق باسقارما مەن دەپارتامەنت باسشىلارى­نىڭ اتىنا جولدانعان. وسى ارقى­لى مەملەكەتتىك مەكەمەلەردىڭ جاس­تاردى تۇرعىن ۇيمەن قامتۋ جونىن­دەگى ارنايى باعدارلاماعا قاتى­سۋىنا ىقپال ەتۋ تەتىكتەرى قاراستىرىلعان. 

بۇدان كەيىنگى كەزەكتە بانك قىزمەت­كەرلەرى ۇمىتكەرلەر جونىن­دەگى دەرەكتەر مەن مالىمەتتەردى سارالاپ, ءتيىستى شەشىم قابىلداماق. اقتوبە وبلىستىق جاستار ساياساتى ماسەلەلەرى باسقارماسىنىڭ باس­شىسى نۇرلان كۇنتۋوۆتىڭ ما­لىم­دەۋىنشە باعدارلاما اۋقى­مى بيىلعى جاستار جىلىمەن عانا شەكتەلمەيدى. بۇدان كەيىنگى كەزەڭدە دە بۇل ءىس-شارا ىقپال ەتۋ تەتىگىن جالعاستىرا بەرمەك. تەك ءبىر ەسكەرەر جايت, ونىڭ ءبىرىنشى كەزەڭىندە جاستار ءۇشىن 15 پاتەر جاساقتاۋدى جوسپارلاعان. ەكىن­شىدەن, ونى بيىل اتالىپ وتەتىن اقتوبە قالاسىنىڭ 150 جىلدىعى قۇرمەتىنە ورايلاس­تىرعاندى ءجون سانايدى.

جاستارعا ارنالعان تۇرعىن ءۇي باعدارلاماسىنىڭ تيىمدىلىگى تۋرالى «تۇرعىن ءۇي قۇرىلىس جيناق بانكى» اق اقتوبە وبلىستىق فيليالى ديرەكتورىنىڭ ورىن­باسارى راۋان باياش ايتىپ بەر­دى. ونىڭ ايتۋىنشا, اۋماعى 40 شارشى مەتر پاتەردى يەلەنگىسى كەلەتىن جاستاردىڭ ەسەپشوتىندا نەبارى 350 مىڭ تەڭگە بولسا جەتكىلىكتى. تيىسىنشە بۇل كولەم 55 شارشى مەتر بولاتىن بولسا, ەسەپشوتتاعى سوما 450 مىڭ تەڭگە بولسا جەتىپ جاتىر. بۇل رەتتە اي سايىنعى تولەماقى 35 مىڭ تەڭگە تۇراتىنى دا جاس­تار ءۇشىن ءتيىمدى ەكەنى انىق. ار­نايى باعدارلاما شەڭبەرىندە ۇسى­­­نى­لاتىن پاتەرلەر وبلىس ور­تا­­لىعىنداعى «نۇراقتوبە» تۇرعىن-ءۇي كەشەنىندە ورنالاسقان. 

جاستارعا ارنالعان ءۇي-جاي ماسەلەلەرىن رەتتەۋدە ىلكىمدىلىك تانىتىپ وتىرعان اقتوبەلىك جاس­تار ۇيىمىنىڭ باستاماسى بار­لىق وڭىرگە ۇلگى بولسا يگى. 

تەمىر قۇسايىن,

«Egemen Qazaqstan» 

اقتوبە