الەۋمەتتىك جەلىدە 23 قاڭتار كۇنى الماتى وبلىسىنىڭ تالعار اۋدانىنا قاراستى بەساعاش اۋىلىندا بولعان جانجال كەزىندە اۋىر سوققى الىپ, اۋرۋحانا توسەگىندە قايتىس بولعان ازامات تۋرالى اقپارات تاراعان ەدى.
بۇگىن وقيعاعا وراي رەسمي بيلىك وكىلدەرى تۇسىنىكتەمە بەرىپ, ءمان-جايدى حابارلادى.
- 23 قاڭتار كۇنى تالعار اۋداندىق ورتالىق اۋرۋحاناسىنا تۇزدىباستاۋ اۋىلىنىڭ 1967 جىلى تۋعان تۇرعىنى اۋىر حالدە جەتكىزىلدى. دارىگەرلەر زارداپ شەگۋشىگە «جابىق مي جاراقاتى» دەگەن دياگنوز قويىپ, جان ساقتاۋ بولىمىنە جاتقىزعان. وكىنىشكە قاراي, ناۋقاس اۋىر سوققىدان العان جاراقاتتان وڭالمادى, - دەدى الماتى وبلىسى اكىمىنىڭ ءباسپاسوز حاتشىسى عالىمۇرات جۇكەل.
قازىر قۇقىق قورعاۋ ورگاندارى ادام ولىمىنە اپارعان جانجال بويىنشا قىلمىستىق ءىس قوزعاپ, وقيعاعا كۇدىكتى رەتىندە تالعار اۋدانىنىڭ 1969 جىلى تۋعان تۇرعىنىن ۇستادى. ۋاقىتشا ۇستاۋ يزولياتورىنا قامالعان ازاماتقا قاتىستى «قىلمىستىق كودەكستىڭ» 106 بابىنىڭ 3-ءبولىمى نەگىزىندە سوتقا دەيىنگى تەرگەۋ امالى باستالدى.
قالماحانبەت مۇقامەتقالي,
«Egemen Qazaqstan»
الماتى وبلىسى