ۇلانباتىر قالاسىندا ەكى كۇنگە جالعاسقان «موڭعول ارحەولوگياسى-2018» اتتى عىلىمي كونفەرەنتسيا ءوز جۇمىسىن تابىستى اياقتادى.
جىل سايىن جۇرگىزىلگەن ارحەولوگيالىق زەرتتەۋلەردىڭ ولجالارى قورىتىندىلانىپ, تاڭداۋلى زەرتتەۋلەرگە بايگە بەرىلەتىن بۇل ءداستۇرلى باسقوسۋعا اقش, كانادا, گەرمانيا, قحر, رف, جاپونيا, كورەيا سەكىلدى كوپتەگەن شەتەلدىڭ 87 عالىمنىڭ زەرتتەۋى, بارلىعى 68 ارحەولوگيالىق قازبا جۇمىسىنىڭ ناتيجەسى ساراپقا سالىنىپ, سىننان ءوتتى. اتالمىش شاراعا حالىقارالىق تۇركى اكادەمياسىنىڭ موڭعوليادا جۇرگىزگەن ءۇش بىردەي قازبا زەرتتەۋى, اتاپ ايتقاندا, موڭعوليا عىلىم اكادەمياسى تاريح, ارحەولوگيا ينستيتۋتىمەن بىرلەسكەن «شيۆەەتۋلاان-2018» ەكسپەديتسياسى مەن ء«حوشووتسايدام » جوباسى, سونىمەن بىرگە موڭعوليا ۇلتتىق مۋزەيىمەن بىرگە جۇرگىزىلگەن گۇنبۇرد, قياقۇدىق كونە تۇركى كەشەنى ارحەولوگيالىق قازباسى تۋرالى باياندامالار زيالى قاۋىمنىڭ نازارىنا ۇسىنىلعان بولاتىن. مامانداردىڭ جان-جاقتى تالقىسىنا سالىنىپ, داۋىس بەرۋ ارقىلى جىلدىڭ ۇزدىك ارحەولوگيالىق زەرتتەۋلەرى انىقتالدى.
تاڭداۋلىلار قاتارىندا اكادەميا ەكسپەديتسياسىنىڭ جۇمىستارى بار. انىعىراق ايتقاندا, حالىقارالىق تۇركى اكادەمياسى مەن موڭعوليا ۇلتتىق مۋزەيىنىڭ 2017-2018 جىلدارى زەرتتەۋ جۇرگىزگەن گۇنبۇرد, قياقۇدىق كونە تۇركى كەشەنى ءۇشىنشى ورىننىڭ جۇلدەسىن جەڭىپ الدى. سونىمەن بىرگە وسى جوباعا قاتىسقان ارحەولوگ چينبولد باياندەلگەر كيەلى جەرلەردى درونمەن اۋەدەن تۇسىرگەن ۇزدىك جۇمىسى باس بايگەگە يە بولدى. ال جارىستا ءبىرىنشى ورىنعا موڭعوليا –گەرمانيانىڭ «قارابالعىس» جوباسى, ەكىنشى ورىنعا موڭعوليا –امەريكانىڭ «سولتۇستىك موڭعوليا» ەكسپەديتسياسى لايىقتى دەپ تانىلعان.
وتكەن جىلعى جازعى ماۋسىمدا شىڭعىسحاننىڭ اتاجۇرتى حەنتاي ايماعى دەلگەرحاان سۇمىنىنداعى كيەلى كەشەندەرگە زەرتتەۋ جۇرگىزگەن اكادەميا عالىمدارى تۇركى مۇراسىن بايىتاتىن بىرقاتار ولجالارعا تاپ بولىپ, كەشەننەن تۇركى داۋىرىنە ءتان ەر مەن ايەل ادامنىڭ تاس ءمۇسىنى, قۇمىرا سەكىلدى جادىگەرلەر تابىلعان بولاتىن. اكادەميا مەن مۋزەيدىڭ «كەرۋلەن» جوباسى الداعى جىلداردا دا تياناقتى ىزدەنىستەرىن جالعاستىراتىن بولادى.