قاراعاندى وبلىسىنىڭ ونەركاسىپتىك ورتالىعىندا - ساران قالاسىندا, ورتالىق ازياداعى ەڭ ءىرى قۋاتى 100 مۆت بار «SES Saran» كۇن ەلەكتر ستانساسىنىڭ سالتاناتتى اشىلۋ ءراسىمى ءوتتى.
ساران قالاسىنداعى ەلەكتر ستانساسىنىڭ ىسكە قوسىلۋى - مەملەكەت باسشىسىنىڭ سىرتقى ساياساتتى «ەكونوميزاتسيالاۋ», قازاقستانعا وزىق تاجىريبەنى, ءبىلىمدى, تەحنولوگيا مەن ينۆەستيتسيالاردى تارتۋ بويىنشا مىندەتتەرىن ءىس جۇزىندە جۇزەگە اسىرۋدىڭ جارقىن ۇلگىسى.
قىسقا مەرزىمدە ىسكە اسىرىلعان جوبا ورتالىق جانە جەرگىلىكتى بيلىك ورگاندارىنىڭ گەرمانيا فەدەراتيۆتىك رەسپۋبليكاسى, چەحيا جانە سلوۆاكيا رەسپۋبليكالارى كومپانيالارىنىڭ توبىمەن, سونداي-اق ەۋروپا قايتا قۇرۋ جانە دامۋ بانكىمەن (ەققدب) بىرلەسكەن جۇمىستىڭ ناتيجەسى بولدى.
ەلەكتر ستانتسياسىنىڭ قۇرىلىسى بارىسىندا جەرگىلىكتى مازمۇنعا, ونىڭ ىشىندە سارانداعى كومپانيالاردان ەڭبەك ءونىمدى, بۇيىمداردى جانە قۇرىلىس ماتەريالداردى تارتۋعا ەرەكشە نازار اۋدارىلدى. سونىمەن قاتار, جاڭا ەلەكتر ستانساسىندا جەرگىلىكتى تۇرعىندار ءۇشىن جۇمىس ورىندارى اشىلدى.
ەلەكتر ستانتسياسىنىڭ ىسكە قوسىلۋى ەلىمىزدەگى جاڭارتىلاتىن ەنەرگيا كوزدەرىنىڭ ۇلەسىن ارتتىرۋ, «جاسىل» تەحنولوگيالارعا كوشۋ بويىنشا قازاقستان پرەزيدەنتى نۇرسۇلتان نازارباەۆتىڭ تاپسىرمالارىن ىسكە اسىرۋعا تاعى ءبىر ۇلەس قوسۋ بولدى.
بۇل تۋرالى ەنەرگەتيكا ءمينيسترى قانات بوزىمباەۆ, گەرمانيانىڭ قازاقستانداعى ەلشىسى تيلو كليننەر, قاراعاندى وبلىسىنىڭ اكىمى ەرلان قوشانوۆ, «جاسىل تەحنولوگيالار جانە ينۆەستيتسيالىق جوبالار حالىقارالىق ورتالىعى» اق باسشىسى ءراپىل جوشىباەۆ ءسوز سويلەۋلەرىندە اتاپ ءوتتى.
بۇعان دەيىن «ساران قالاسىندا 100 مۆت قۋاتى بار كۇن ەلەكتر ستانساسىن سالۋ» جوباسى «استانا ەكسپو-2017» حالىقارالىق مامانداندىرىلعان كورمەسى اياسىندا تانىستىرىلدى.
اشىلۋ راسىمىنە دەيىن تاراپتار 500 ملن اقش دوللارىن قۇرايتىن ينۆەستيتسيالاردى كەڭەيتۋدى كوزدەيتىن «SES Saran» جوباسىن دامىتۋ تۋرالى مەموراندۋمعا قول قويدى.
سونىمەن قاتار, رەسمي اشىلۋ راسىمىنە سىرتقى ىستەر مينيسترلىگىنىڭ وكىلدەرى قاتىسىپ, ساران, قاراعاندى وبلىسى جانە گەرمان «Goldbek Solar» كومپانياسىنىڭ باسشىلىعىمەن كەلىسسوزدەر وتكىزدى. كەلىسسوزدەردىڭ ناتيجەلەرى بويىنشا ەۋروپالىق ينۆەستورلاردىڭ قاتىسۋىمەن ايماقتىق جوبالاردى ىلگەرىلەتۋدە جانە ولاردىڭ تەحنولوگيالارىن تارتۋعا ەكونوميكالىق ديپلوماتيانى ودان ءارى دامىتۋ تۋرالى كەلىسىمدەرگە قول جەتكىزىلدى.