ات جاراتىپ, سايات قۇرىپ, تۋعان توپىراقتىڭ تەرەڭىنە بويلاعان بابالارىمىزدىڭ رۋحاني اماناتىنىڭ ءبىرى قۇسبەگىلىك. بۇل ەشقانداي دا اۋەسقويلىقتان تۋىندامايتىن, بالكىم ۇرپاقتار ساباقتاستىعى ارقىلى بەرىلەتىن بەكزات ونەر.
بۇل كۇندە كوپشىلىك قاۋىم مويىنقۇمدىق قۇسبەگى, ەتنوگراف, رەسپۋبليكالىق «جىگەر» فەستيۆالىنىڭ لاۋرەاتى جاپار ساتىلعانوۆتى جاقسى تانيدى. بەلگىلى قۇسبەگى 1981 جىلى العاش رەت ساياتشىلىقپەن اينالىسۋعا باۋليتىن «قاۋىرسىن» اتتى بۇركىتشىلەردىڭ مەكتەپ-كلۋبىن قۇرعان بولاتىن. سونىمەن قاتار, وزىنەن كەيىن دە بۇركىتشىلەردىڭ بىراق بۋىنىن تاربيەلەپ, قالىپتاستىردى.
ۇزاق جىلعى ەڭبەكتىڭ ناتيجەسىندە جاپار ساتىلعانوۆتىڭ ەسىمى ەلىمىزدىڭ «كينەس» رەكوردتار كىتابىنا ەندى. رەداكتسيا القاسى جەرلەسىمىزدىڭ تابيعات جاناشىرى ەكەنىن جانە تالاي جىلعى ەڭبەگىن ەسكەرىپ, وسىناۋ قۇرمەتكە لايىق دەپ تاپقان.
تانىمال بۇركىتشىنىڭ نەگىزگى ماقساتى – اتىن شىعارۋ ەمەس, كەرىسىنشە ۇلى دالامىزدا عاسىرلار بويى قالىپتاسىپ, ۇلتتىق قۇندىلىعىمىزعا اينالىپ كەتكەن قۇسبەگىلىكتىڭ قاسيەتىن كەيىنگى بۋىنعا ناسيحاتتاۋ. «بۇل ەشقانداي دا سپورت ەمەس, بۇل بەكزات ونەر. اسىرەسە, كەيىنگى جاس بۋىن وسى ماسەلەنى تەرەڭ زەردەلەپ, كوكەيلەرىنە ءتۇيىپ العانى ابزال», دەيدى ول. جالپى, ەل بىلەتىن ساتىلعانوۆتار اۋلەتىندە قۇسبەگىلىك اتادان بالاعا ميراس بولىپ كەلە جاتقان ونەر. سوندىقتان دا كانىگى قۇسبەگى جاس كۇنىنەن بەرى بۇل اماناتقا كوزدىڭ قاراشىعىنداي قاراپ كەلەدى.
ءبىر قىزىعى, سوناۋ كەڭەس وكىمەتىنىڭ تۇسىندا ءتيىستى مەكەمەلەر جاپار ساتىلعانوۆتان «رەكوردتار كىتابىنا» ەنۋ ءۇشىن مالىمەتتەر العان ەكەن. الايدا سول ءبىر الاساپىران كەزەڭدە بۇل جۇمىس اياقسىز قالادى. ارادا جىلدار ءوتىپ, ەلىمىز ەگەمەندىك الىپ, ءتول ونەرىمىز قايتا جاڭعىرعان ۋاقىتتا ونىڭ ەسىمى ەلىمىزدىڭ رەكوردتار كىتابىنا ەنىپ وتىر.
حاميت ەسامان,
«Egemen Qazagstan»
جامبىل وبلىسى