اقتوبە – جىل سايىن قاناتىن كەڭگە جايىپ, تەز ءوسىپ-وركەندەپ كەلە جاتقان قالا. شىرايلى شاھاردا سوڭعى ۋاقىتتا ءساندى دە ساۋلەتتى شاعىن اۋداندار مەن كورىكتى كوشەلەر بوي تۇزەدى. ونىڭ بارىنە ءتيىستى اتاۋ بەرىلۋىنىڭ دە الاتىن ءرولى جوعارى.
وسىعان وراي سوڭعى ۋاقىتتا وبلىس بويىنشا 292 كوشەگە اتاۋلار بەرىلگەن بولسا, ونىڭ باسىم بولىگى اقتوبە قالاسىنىڭ ۇلەسىنە تيەدى. بۇعان دەيىن وڭىردە بۇگىنگى قازاقستاندىق قوعامنىڭ ءبىتىم-بولمىسىنا سايكەس كەلمەيتىن كوشە اتاۋلارى دا ساقتالىپ كەلگەنى بەلگىلى. قازىرگى كۇنى بۇل ماسەلە دە ءوز شەشىمىن تاۋىپ, 87 كوشەنىڭ اتاۋى قايتادان وزگەرتىلدى.
بۇعان قوسا اتاۋ الۋعا كەزەگى كەلە قويماعان اتاۋسىز كوشەلەر دە ناۋرىز, بۋراباي, ءۇستىرت, اقبەرەن, جۋساندى, قۇس جولى, جەتى قازىنا, سارىارقا جانە سۇلۋتوبە سەكىلدى حالىقتىق سالت-داستۇرلەرىمىزگە ساي اتاۋلارمەن ايشىقتالدى. سونداي-اق بۇرىنعى وتارشىلدىق ءداۋىر مەن كەڭەستىك توتاليتارلىق جۇيە وكىلدەرىنىڭ ەسىمدەرىن يەلەنىپ كەلگەن كوشەلەر – مۇحتار اۋەزوۆ, ءماشھۇر-ءجۇسىپ كوپەي ۇلى, دينا نۇرپەيىسوۆا, بالۋان شولاق, قاسىم حان, كەرەي حان جانە جانىبەك حان اتىنداعى كوشەلەر بولىپ قايتا جاڭعىرتىلدى.
اقتوبە وبلىستىق تىلدەردى دامىتۋ باسقارماسىنىڭ باسشىسى گۇلايىم تولەباەۆانىڭ مالىمدەۋىنشە, وڭىردەگى ونوماستيكا كوميسسياسى كوشەلەرگە اتاۋ بەرۋگە قاتىستى 176 ۇسىنىستى تالقىلاۋعا سالىپتى. ونىڭ 155-نە وڭ قورىتىندى بەرىلگەن. سونداي-اق 224 اتاۋ رەسپۋبليكالىق ونوماستيكالىق كوميسسيانىڭ قولداۋىنا يە بولىپتى. تۇپتەپ كەلگەندە, قازىرگى كەزدە وبلىستىق توپونوميكا كەڭىستىگىن قازاق تىلىندەگى اتاۋلار ۇلەسى 93 پايىزدى قۇراپ وتىر. بۇل قالعان جەتى پايىزدىق مولشەر بۇگىنگى قوعام جانە ۋاقىت تالابىمەن سايكەسپەيدى دەگەن ۇعىمدى بىلدىرمەيدى. ويتكەنى ەلدىك مۇددەگە بىرقاتار ورىس تىلىندەگى تۇلعالاردىڭ دا قىزمەت جاساپ كەلگەنىن ەشكىم جوققا شىعارا المايدى. ەندەشە, ولاردىڭ اتاۋلارى دا رەسپۋبليكا قالالارىنداعى كوشەدەن كورىنىس تابۋى ادىلەتتى بولماق.
تەمىر قۇسايىن,
«Egemen Qazaqstan»
اقتوبە