ماشينامەن بىردەي توقيتىن شەبەر – نۇرلان جارتىبەكوۆ

ەل ىشىندەگى ەلەنبەي جۇر­گەن ونەر يەسى مەن قولى ەپتى ىسمەر­لەردىڭ جانە كوشباسشى جاستار­دىڭ تانىلۋىنا جول اشقان فەستيۆالدا ءان شىرقالىپ, كۇي تارتىلدى. وتتى جىرلار وقىلىپ, فوتوسۋرەت بايقاۋى دا ءوتتى. سولاردىڭ بارىنەن نۇرلان جارتىبەكوۆ ەسىم­دى ىسمەر جىگىتتىڭ ونەرى اسىپ ءتۇسىپ, ەلدى تاڭعالدىردى دەسەك, ارتىق ايتپايمىز. ءدۇيىم جۇرت­تىڭ تاڭدايىن قاقتىرعان نۇر­لان ىلمەكتەپ توقۋ ونەرى بويىنشا دۇنيە ءجۇزىنىڭ شەبەرلەرىن شاڭ قاپتىرىپ, الەمدىك رەكورد ورناتقان قاس شەبەردىڭ ءوزى ەكەن.  ىلمەكتەپ توقۋدىڭ شەبەرى 72 ساعات بويىنا توقتاماستان جۇمىس ىستەپ, يىرىلگەن جۇننەن شارف توقىپ شىقتى. توقىعان مويىنوراماسىنىڭ ۇزىندىعى 35 مەترگە جەتىپ, جەرلەسىمىز قازاق­ستاننىڭ رەكوردتار كىتابى­نا تىركەلدى. ءتۇرلى توقىما بۇيىم جا­ساپ, ونىسىن ساتىپ, شارۋاسىن دوڭ­گەلەتىپ وتىرعان جاسپەن ءبىز وسىلاي تانىستىق. 

تاياۋدا ىسمەر جىگىتكە حابارلاسىپ, كاسىبى تۋرالى از-كەم سۇراعان ەدىك. 

– ماعان توقىما ونەرىن ءبىرىنشى سىنىپتا وقىپ جۇرگەنىمدە انام ۇيرەتتى. ءتورتىنشى سىنىپتان باس­تاپ توقىما بۇيىمدارىمدى ساتۋدى كاسىپكە اينالدىرا باستادىم. مەكتەپتى ءتامامداپ, جوعارى وقۋ ورنىن بىتىرگەننەن كەيىن دە وسى كاسىپتەن قول ۇزبەي, ءارى قاراي جالعاستىرۋدى ءجون دەپ شەشتىم. بىلتىر ءبىلىم جانە عىلىم مي­نيستر­لىگىنىڭ جاڭادان ءوز ءىسىن باستايتىن جاستاردى قولداۋعا ارنالعان Zhas Progect اتتى جوباسىنا قاتىسىپ, جەڭىمپاز اتاندىم. وسى Zhas Progect ارقىلى العان گرانتتى كاسىبىمدى ودان ءارى دامىتۋعا ارنادىم. قازىر قاپشاعاي قالاسىنداعى «بالداۋرەن» رەسپۋبليكالىق وقۋ-ساۋىقتىرۋ ورتالىعىندا توقىمانى ۇيرەتەمىن. كوپشىلىك توقىمانى ەرلەردىڭ ءىسى ەمەس دەپ ويلاۋى مۇمكىن, الايدا ەڭ باستىسى بۇل وزىمە ۇنايدى, – دەدى ول. 

شىنىندا دا قيمىل-قوز­عالىسى قيىنداعان, ءتۇرلى دارەجە­دەگى سال اۋرۋىنا ۇشى­را­عان بال­دىرعاندار ءۇشىن تو­قىمامەن اي­نالىسۋدىڭ پايداسى زور ەكەن. نۇرلاننىڭ ەرىنبەي-جالىقپاي بالالارمەن جۇمىس ىستەگەنىنىڭ ناتيجەسىندە ءبىراز بالانىڭ دەن­ساۋلىق جاعدايى 20 پايىزعا دەيىن جاقسارىپتى. ءبىر سوزبەن ايت­قاندا, نۇرلاننىڭ ءادىسىن ەڭ­بەكپەن ەمدەۋدىڭ كەرەمەت ۇلگىسى دەۋگە بولادى.  

ءبىزدىڭ كەيىپكەرىمىزدىڭ بوس ۋاقىتى از. ءار كۇنىن نەشە ءتۇر­لى بۇيىم توقۋمەن, بىلگەنىن بالدىر­عان­دارعا ۇيرەتۋمەن وتكىزەدى. تو­قۋ جىلدامدىعىمەن ەلدى تاڭ­عالدىرعان جىگىت اي سايىن ءبىر ءوزى 500 بالاعا كىشكەنتاي اياقكيىم تو­­قىپ ۇلگەرەدى ەكەن. ۇلكەندەرگە ار­­نالعان كيىمدەردىڭ 100-

150-ء­ىن دايىنداپ ۇلگەرەدى. باسقا دا بوكەباي, قولعاپ, شالما, باس­كيىم, كۇرتەشە سىندى كيىمنىڭ نەشە اتاسىن توقىپ, ءتۇرلى ۇلتتىق ويۋ-ورنەكپەن اشەكەيلەپ, ساتىپ ۇلگەرەدى. جان جارى دا قولعا­بى­سىن تيگىزەدى.

– جىلدامدىعىم وتە جوعارى, ماشينامەن بىردەي توقيمىن عوي, – دەپ كۇلەدى ءوزى. 

قولىنان شىققان بۇيىم­دارى­نا سۇرانىس جوعارى, دايىن بول­عاندارىن ەل قۋانا ساتىپ الىپ­ جا­تىر. 

نۇرلان قازىر جان جارىمەن بىرگە ەڭبەكتەنۋدە. ءالى جەكە باس­پانا ساتىپ الىپ تا ۇلگەرمەپتى. ەندىگى جوسپارى ءۇي الۋ, ءبىراز ادام­­نىڭ باسىن قوسىپ, ءوزىنىڭ ءىسىن بىر­لەسىپ اتقاراتىن جۇمىسكەرلەر دايىنداۋ, ءسويتىپ كاسىبىن ودان ءارى ۇلكەيتۋ.

– توقىما ونەرى شەتەلدە عانا جاقسى دامىعان, قازاقستان­دا جوق. ۇلتتىق توقىما بۇيىمدا­رى­­مىزدىڭ نەشە ءتۇرلىسىن ەلىمىزدە شى­عارۋدى جولعا قويسام دەگەن ارمانىم بار, – دەدى بىزگە.  

 ول ارمانىن ورىنداۋ ءۇشىن قارجىلاي قولداۋ كەرەك. «بولام دەگەن بالانىڭ بەتىن قاقپا, بەلىن بۋ» دەگەن. ءسال دەمەۋ بولسا نۇرلان جارتىبەكوۆتىڭ ءىسى دە ىل­گەرىلەپ كەتكەلى تۇرعانى انىق.

قالماحانبەت مۇقامەتقالي,

«Egemen Qazaqstan»