استانا قالاسىنداعى ۇلتتىق اكادەميالىق كىتاپحانادا بريتاندىق جازۋشى, وكسفورد ۋنيۆەرسيتەتىنىڭ پروفەسسورى, «وڭتۇستىككە دەيىن ۇلى دالا: توماس پەن ليۋسي اتكينسوننىڭ شىعىس قازاقستانداعى ساياحاتتارى, 1847-1852 ج.ج.» («South to the Great Steppe: The Travels of Thomas and Lucy Atkinson in Eastern Kazakhstan, 1846-1852») كىتابىنىڭ اۆتورى نيك فيلدينگپەن كەزدەسۋ كەشى ءوتتى.
بريتاندىق جۋرناليست نيك فيلدينگ XIX عاسىردا ءومىر سۇرگەن قازاقتاردىڭ تاريحىن, قازاقستان مەن اعىلشىن عالىمدارىنىڭ كەزدەسۋلەرىن جۇيەلەپ حاتقا ءتىزىپ, ۇلىبريتانيا كىتاپحانالارىنداعى قازاق جەرىنە, تاريحىنا, مادەنيەتىنە قاتىستى زەرتتەۋ جۇمىستارىمەن اينالىسقان. وسى ءبىر تىڭعىلىقتى ىزدەنىسىنىڭ ناتيجەسىندە ومىرگە كەلگەن «وڭتۇستىككە دەيىن ۇلى دالا: توماس پەن ليۋسي اتكينسوننىڭ شىعىس قازاقستانداعى ساياحاتتارى, 1847-1852 ج.ج.» اتتى كىتابىندا اۆتور ايگىلى بريتان جيھانكەزدەرىنىڭ ءسىبىر جانە قازاق دالاسىنا جاساعان ساياحاتى تۋرالى جازادى. ەڭبەكتىڭ «قاپالدان حات, 17 قازان 1848 جىل» اتالاتىن تاراۋىندا توماس پەن ءليۋسيدىڭ قازاق دالاسىنا كەلگەن ساپارى قىزىقتى باياندالعان.
– نيك فيلدينگ – قازاقتى جان-تانىمەن جاقسى كورەتىن جازۋشى. قالامگەردىڭ ۇلتىمىزدىڭ مادەنيەتىنە دەگەن قۇشتارلىعى ەرەكشە. كيەلى جەرىمىزدىڭ تاريحى مەن سالتىن زەرتتەپ, زەردەلەپ جۇرگەن شەتەلدىك ادەبيەتشىلەرمەن قارىم-قاتىناسىمىز ودان ءارى دە دامىپ, نىعايا بەرەدى دەپ سەنەمىز, – دەدى شىعارماشىلىق كەزدەسۋدە ۇلتتىق اكادەميالىق كىتاپحانانىڭ باسشىسى ءۇمىتحان مۇڭالباەۆا.
مازمۇندى كەشكە قاجىعالي مۇحامبەتقالي ۇلى, تۇرسىن جۇرتباي باستاعان بەلگىلى قازاق جازۋشىلارى مەن عالىمدارى, قوعام قايراتكەرلەرى قاتىستى. سونداي-اق ايتۋلى ءىس-شارا بارىسىندا اۆتوردىڭ «وڭتۇستىككە دەيىن ۇلى دالا: توماس پەن ليۋسي اتكينسوننىڭ شىعىس قازاقستانداعى ساياحاتتارى, 1847-1852 ج.ج.» كىتابىن قازاق جانە ورىس تىلدەرىنە اۋدارۋ ءۇشىن اۆتورلىق قۇقىق الۋ جونىندەگى كەلىسىمشارتقا قول قويىلدى.
نازەركە جۇماباي,
«Egemen Qazaqstan»