جەكسەنبىدەن دۇيسەنبىگە قاراعان ءتۇنى ماقانشى شەكارا وتريادىنىڭ كەزەكشى بولىمىنە «تالدىكورعان – اياگوز» تاس جولىنىڭ 92-جولايرىق (رازەزد) دەپ اتالاتىن تۇسىندا توتەنشە جاعداي بولعاندىعى تۋرالى اقپار كەلىپ ءتۇستى. بۇل تۋرالى قر ۇقك شق ءباسپاسوز قىزمەتى حابارلادى.
ۇيىتقي سوققان بوران (25-30 م/س) تاس جولدى ومبى قارعا كومىپ, تەحنيكالىق كولىكتەر قوزعالا الماي, توقتاپ قالىپتى. انىقتالماعان مالىمەتتەرگە قاراعاندا, 500-دەن استام ادام قار قۇرساۋىندا قالعان ەكەن.
اسكەري ءبولىم باسشىلىعى تەز ارادا شەشىم قابىلداپ, شۇعىل تۇردە قۇتقارۋ توبىن قۇردى. قاجەتتى قۇرالدارىمەن, تۇندە كورەتىن قۇرىلعىلارمەن جابدىقتالعان قوسىمشا اككۋمۋلياتورلىق باتارەيالار, جىلى كورپەلەر, ازىق-ت ۇلىكتەر تيەلگەن جول تالعامايتىن كولىكتەرگە ءمىنىپ, توتەنشە وقيعا بولعان جەرگە اتتانعان ەكى بايلانىس مامانى, ەكى اسكەري دارىگەر, شاڭعىشىلاردان تۇراتىن توپ تۇنگى ساعات 3-تەن وتە دىتتەگەن جەرگە جەتىپ, قۇتقارۋ جۇمىستارىنا كىرىستى.
شەكاراشىلار 3 جۇك كولىگىن, 4 جولاۋشىلار اۆتوبۋسىن, كوپتەگەن جەڭىل اۆتوكولىكتى جۇرگىزۋشىلەرىمەن جانە جۇرگىنشىلەرىمەن قوسا بارلىعى 13 اۆتوتەحنيكانى قاۋىپسىز جەرگە الىپ شىقتى. قۇتقارىلعاندار ىشىندە تولعاعى تاياپ تۇرعان ايەل دە بار ەكەن. سونىمەن بىرگە ىستىعى كوتەرىلگەن ەكى اۆتوكولىك جۇرگىزۋشىسىنە مەديتسينالىق كومەكتەر كورسەتىلدى. كەشە ساعات 13.30-دا قۇتقارۋ توبى ءوز جۇمىسىن اياقتادى.