بۇگىن ۇكىمەت وتىرىسىنىڭ قورىتىندىسى بويىنشا وتكەن ءباسپاسوز كونفەرەنتسياسىندا قارجى ۆيتسە-ءمينيسترى رۋسلان بەكەتاەۆ مەملەكەتتىك ساتىپ الۋلار مەن كۆازيمەملەكەتتىك سەكتور سۋبەكتىلەرىنىڭ ساتىپ الۋلارى سالاسىنداعى نەگىزگى جاڭاشىلدىقتار تۋرالى ايتىپ بەردى.
ەگەر وتكەن جىلدارى قارجى مينيسترلىگىنىڭ مەملەكەتتىك ساتىپ الۋلاردى ازىرلەۋدەگى جۇمىسى راسىمدەردىڭ اشىقتىعى مەن ايقىندىعىن كۇشەيتۋگە باعىتتالعان بولسا, بۇگىندە بۇل مىندەت ورىندالدى. ۆيتسە-ءمينيستردىڭ ايتۋىنشا, مينيسترلىكتىڭ مەملەكەتتىك ساتىپ الۋلاردى ازىرلەۋ جونىندەگى اعىمداعى جۇمىسى ساپالى ءارى ادىل امالعا نەگىزدەلگەن.
«مەملەكەتتىك ساتىپ الۋلار بويىنشا راسىمدەردىڭ 100% ەلەكتروندى فورماتقا كوشىرىلگەن جانە سايكەسىنشە, ساپاعا ۇلكەن نازار اۋدارۋ قاجەت دەپ ەسەپتەيمىز. دەمپينگكە شەكتى بەلگىلەۋ ارقىلى ءبىز باعانىڭ قانداي بولۋ كەرەكتىگىن جاقسى تۇسىنەتىن كومپانيالار ساتىپ الۋلارعا قاتىساتىنىن انىقتايمىز. سونداي-اق, قۇرىلىستا شارتتى تۇردە تومەندەۋ 10%-دان تومەن بولماۋى ساپاعا كەپىل بولادى», — دەپ مالىمدەدى ر. بەكەتاەۆ.
سونىمەن بىرگە, زاڭ جوباسىندا ىرىكتەۋدىڭ نەگىزگى كريتەريى — جۇمىس تاجىريبەسى بولاتىنى انىقتالعان. كومپانيالار جۇمىس تاجىريبەسى بويىنشا باسەكەگە تۇسەدى جانە شارتتى باعا وسى نەگىزدە انىقتالادى.
«شارتتى باعا كوپ جاعدايدا جەڭىمپازدى انىقتايتىن بولادى. الايدا, ەگەر دەمپينگتى ورناتساق, وندا ءبارى 10%-عا تومەندەگەن جاعدايدى كورەمىز جانە جەڭىمپازدى انىقتاي المايمىز, سايكەسىنشە, مۇندا انىقتاۋشى فاكتور سالىقتاردى تولەۋ بولادى. ءبىزدىڭ يدەولوگيامىز مىنانداي – كىم سالىق تولەسە, سول مەملەكەتتىك ساتىپ الۋلارعا قاتىسۋى تيىس جانە تيىسىنشە, كىم كوبىرەك تولەيتىن بولسا, سول جەڭۋى كەرەك, سەبەبى ءبىز تاجىريبەسى جوق جانە سالىق تولەمەيتىن كومپانيالار باعانى ارزانداتىپ, جەڭىپ كەتىپ جاتقان جاعدايلاردى ءجيى بايقايمىز. بۇدان كەيىن ولار نىساندى سوڭىنا دەيىن اياقتاي المايدى, ويتكەنى قارجى دۇرىس يگەرىلمەيدى نەمەسە ءوز مىندەتتەرىن ساپالى ورىنداي المايدى», — دەپ ءتۇسىندىردى ر. بەكەتاەۆ.
بۇدان وزگە, مەملەكەتتىك ساتىپ الۋلاردى ورتالىقتاندىرۋ اياسىندا, ساتىپ الۋلاردىڭ بىرىڭعاي ۇيىمداستىرۋشىلارى ءۇشىن رەسپۋبليكالىق, وبلىستىق جانە اۋداندىق دەڭگەيلەردە قارجى مينيسترلىگى ءتيىستى تاۋارلار ءتىزىمىن بەكىتتى. قارجى مينيسترلىگىنىڭ بۇيرىعى 2019 جىلدىڭ 1 ناۋرىزىنان باستاپ قولدانىسقا ەنەدى.
«بىرىنشىدەن, مەملەكەتتىك ساتىپ الۋلارعا مەكتەپتەر, اۋرۋحانالار, الەۋمەتتىك نىساندار سەكىلدى نەگىزگى قىزمەتى وقىتۋعا جانە الەۋمەتتىك قىزمەتتەرمەن قامتاماسىز ەتۋگە باعىتتالعان مەملەكەتتىك مەكەمەلەر قاتىسادى. اتالعان تۇزەتۋدىڭ يدەولوگياسى – باسقا ماسەلەلەرمەن اينالىسۋعا ءتيىستى مەملەكەتتىك مەكەمەلەردى وزدەرىنە ءتان ەمەس فۋنكتسيالاردان بوساتۋ. ەكىنشىدەن, ورتالىقتاندىرۋ وڭتايلى ساتىپ الۋعا مۇمكىندىك بەرەدى», — دەدى ر. بەكەتاەۆ.
مەملەكەتتىك ساتىپ الۋلار مەن كۆازيمەملەكەتتىك سەكتور سۋبەكتىلەرىنىڭ ساتىپ الۋ سالاسىن جەتىلدىرۋ ماقساتىندا 2018 جىلدىڭ 26 جەلتوقسانىندا ەلباسى «قر كەيبىر زاڭنامالىق اكتىلەرىنە مەملەكەتتىك ساتىپ الۋ جانە كۆازيمەملەكەتتىك سەكتور سۋبەكتىلەرىنىڭ ساتىپ الۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. زاڭ 2019 جىلدىڭ 1 قاڭتارىنان باستاپ قولدانىسقا ەندى.