قوستانايدا رەسپۋبليكالىق ىسكەر ايەلدەر قاۋىمداستىعىنىڭ جۇمىس ىستەگەنىنە جيىرما جىلدان اسا ۋاقىت بولدى. وسى ۋاقىت ىشىندە ۇيىم قوعامداعى بەلسەندىلىگىمەن ەرەكشەلەندى. ايەلدەردى بيزنەسكە, كاسىپكەرلىككە تارتۋدا, ودان كەيىنگى جىلدارى ايەلدەردىڭ ساياسي بەلسەندىلىگىن ارتتىرۋدا كوپتەگەن ءجۇمىس جۇردى. قازىر وبلىستا ايەل-كاسىپكەرلەر كاسىپورىندار مەن شارۋاشىلىقتاردى باسقارادى.
ىسكەر ايەلدەر قاۋىمداستىعىنداعى ارنالى جۇمىستىڭ ءبىرى قايىرىمدىلىق دەر ەدىك. ۇيىم الەۋمەتتىك جوبالارعا بەلسەنە قاتىسادى. ۇيىم مۇشەلەرى وبلىس وڭىرىندە كوپتەگەن قايىرىمدىلىق شاراcىن وتكىزەدى. مىسالى, ۇيىم 2016 جىلى اۋرۋ بالانىڭ ەمدەلۋى ءۇشىن 850 مىڭ تەڭگە بەردى. 2017-2018 جىلدارى «جانۇيا» وبلىستىق بالالار ۇيىنە كومەكتەستى. ىسكەر ايەلدەر قاۋىمداستىعى اتا-انا قاراۋىنسىز قالعان جانە الەۋمەتتىك از قورعالعان وتباسىلار بالالارىنا كومەك اكتسيالارىن ءجيى ۇيىمداستىرادى.
رەسپۋبليكالىق ىسكەر ايەلدەر قاۋىمداستىعى بيىل ەلىمىزدە ءبىرىنشى رەت ءوتىپ وتىرعان «قايىرىمدىلىق كەرۋەنى» بايقاۋ-اكتسياسى قۇرىلتايشىلارىنىڭ ءبىرى رەتىندە بەلسەندى ۇيىمداستىرۋشى-جۇرگىزۋشى بولىپ وتىر. وبلىستىق قاۋىمداستىق مۇشەلەرى وبلىستاعى بۇقارالىق اقپارات قۇرالدارى وكىلدەرىنە بايقاۋ اكتسيانىڭ ماقساتى مەن مازمۇنى تۋرالى ايتىپ بەردى.
«قايىرىمدىلىق – ادامداردى ىنتىماققا, مەيىرىمدىلىككە تاربيەلەيتىن تاماشا قاسيەت, تاماشا قۇرال. مۇنان ايەلدەر قاۋىمداستىعى قالاي سىرت قالۋى ءتيىس؟ بايقاۋعا بەرگەن ماتەريالداردى «اسار», «تۋعان جەر», «باتىل جۇرەك», «مەيىرىم جولىندا», «قايىرىمدىلىق تاريحى» اتتى بەس اتالىم بويىنشا باعالايدى. وندا ەڭ باستىسى, ءبىزدىڭ ەلىمىزدەگى ادامدار قولىمەن, جۇرەگىمەن جاسالاتىن تاماشا ىستەر كورىنىس تابادى» دەيدى قوستاناي وبلىستىق ىسكەر ايەلدەر قاۋىمداستىعىنىڭ اتقارۋشى ديرەكتورى بالبوپە ەرتاەۆا.
جۋرناليستەر ءۇشىن وتكىزگەن بريفينگتە ىسكەر ايەلدەر قاۋىمداستىعىنىڭ مۇشەلەرى بايقاۋ-اكتسيانىڭ شارتتارى مەن ۋاقىتى تۋرالى ايتىپ, سۇراقتارعا جاۋاپ بەردى.
ءنازيرا جارىمبەت,
Egemen Qazaqstan
قوستاناي