سەربيانىڭ سومبور قالاسىندا وتكەن «ۇلتتار كۋبوگى» تۋرنيرىندە جاس بوكسشى الۋا بالقىبەكوۆا چەمپيون اتاندى. ۇلتتىق قۇراما ساپىنداعى العاشقى ءىرى جەڭىسىنە قول جەتكىزگەن ول Olympic.kz سايتىنا شاعىن سۇحبات بەرگەن بولاتىن.
سەربياداعى تۋرنيرگە الەمنىڭ ۇزدىك بوكسشىلارى جينالدى. مەن 48 كەلىدە ەل نامىسىن قورعادىم. تۋرنير بارىسىندا ءۇش كەزدەسۋ وتكىزىپ, جەڭىسكە جەتتىم. فينالدا رەسەيلىك يۋليا چۋمگالاكوۆادان باسىم ءتۇسىپ, ەسەمدى قايتاردىم دەسەم بولادى. ويتكەنى, تاپ وسى بوكسشىدان جەڭىلىپ قالعانىم بار. جالپى العاندا, بۇل جىلدىڭ شىمىلدىعىن اشاتىن تۋرنير. الداعى ءىرى جارىستار الدىنداعى ۇلكەن دايىندىق ىسپەتتى. قازاقستان قۇراماسىنىڭ جالپى ەسەپتە ءبىرىنشى ورىن العانى دا قۋانتادى. جەكە باپكەرىم جەتىستىگىمە مارقايىپ جاتىر. ەندى بۇدان دا ۇلكەن جارىستاردا توپ جارعىم كەلەدى, - دەيدى الۋا.
الۋا بالقىبەكوۆا 48 كەلىدە ەلىمىزدەگى ەكىنشى ءنومىرلى بوكسشى سانالادى.
2015 جىلى باس كوماندانىڭ قوسالقى قۇرامىنا قابىلداندىم. بۇل مەن ءۇشىن ۇلكەن جەتىستىك ەدى. 2017 جىلى ەل چەمپيونى اتانىپ, ءبىرىنشى ءنومىرلى بوكسشى بولعانىم راس. بىراق ءبىر جىلدان سوڭ ايگەرىم قاسەناەۆاعا جول بەردىم. دەگەنمەن, باس كوماندا ساپىندا جەڭىسكە جەتۋ ارقىلى وزىمە دەگەن سەنىمىم نىعايدى. بۇل مەنىڭ ەرەسەكتەر اراسىنداعى العاشقى ءىرى جەڭىسىم, - دەيدى بوكسشى.
جاس سپورتشى قازاقستاننىڭ بوكسشى قىزدارىمەن بارلىعى دا ساناساتىنىن جەتكىزدى. الۋانىڭ ايتۋىنشا, ءبىزدىڭ كوماندانىڭ جەڭىستى ءداستۇرى بار.
بوكسشى قىزدارىمىزدىڭ الەم سپورتشىلارى الدىنداعى بەدەلى جوعارى. ويتكەنى, بىزدە جەڭىسپەن ورىلگەن ءداستۇر بار. نازىم قىزايباي مەن جاينا شەكەربەكوۆا الەم چەمپيوناتتارىندا كوزگە ءتۇسىپ ءجۇر. ءلاززات كۇنگەيباەۆا مەن ۆالەنتينا حالزوۆانىڭ دا ورنى بولەك. دينا جولاماننىڭ جەتىستىگى ءوز الدىنا ءبىر توبە. سوندىقتان, ءىرى جارىستار كەزىندە بىزبەن بارلىعى دا ساناسادى, - دەيدى الۋا بالقىبەكوۆا.
سەرىك قوناقباەۆ پەن سەرىك ساپيەۆتى ۇلگى تۇتاتىن جاس بوكسشى الداعى ۋاقىتتا ازيا چەمپيوناتى مەن مارينا ۆولنوۆا اتىنداعى تۋرنيرگە قاتىسۋدى جوسپارلاپ وتىر.