اقىرزامان جاقىن با؟

 «ادامزاتتىڭ تىرشىلىگىنە 49 جىل قالدى. ۇلكەن كولەمدەگى استەرويد جەرگە جاقىنداپ كەلەدى», - Life ءباسپاسوز قۇرالى.

«عالىمدار اقىرزاماننىڭ ۋاقىتىن انىقتادى», - نتر تەلەارناسى.

«جەر تۇرعىندارىنىڭ كوپ بولىگى قازا بولادى», - «نارودنىە نوۆوستي».

«اپوكاليپسيس جاقىن», - بەسىنشى ارنا.

بارلىق باسىلىمدار بۇل استەرويدتىڭ اپوفيس دەپ بەكەر اتالماعىنىن العا تارتىپ وتىر. ول كۇندى جۇتۋعا ۇمتىلىپ, ماڭگىلىك قاراڭعىلىقتى قالايتىن قورقىنىشتى ەجەلگى ەگيپەت قۇدايى-جىلاننىڭ قۇرمەتىنە اتالعان.

سوندا ءبىزدى شىن مانىندە اپوكاليپسيس كۇتىپ تۇر ما؟

جاۋابى, ارينە جوق. دەگەنمەن دە اقىرزامان تۋرالى حاباردىڭ قايدان پايدا بولعانى, وندا نەنىڭ شىندىق, نەنىڭ جالعان ەكەنى تۋرالى سۇراقتارعا جاۋاپ ىزدەپ كورەيىك.

فاكتىلەردى تەكسەرۋ

نەگىزى اپوفيس استەرويدى شىن مانىندە بار جانە جەرگە راسىمەن جاقىنداپ كەلەدى.

ول 2004 جىلدىڭ ماۋسىم ايىندا اشىلعان جانە سول كەزدە كوپ شۋ بولعان ەدى. باستاپقى ەسەپتەۋلەر بويىنشا, ونىڭ 2029 جىلى جەرمەن سوقتىعىسۋ ىقتيمالدىعى 2,7% - عا باعالاندى, بۇل كوكتەگى دەنەنىڭ كولەمى مەن ماسساسىن ەسەپكە العاندا وتە ۇلكەن كورسەتكىش.

رەسەيلىك باق مالىمەتتەرى بويىنشا, ءاپوفيستىڭ ديامەترى - 325 مەتر. بۇل دا ناقتى اقپارات ەمەس: استەرويد كولەمى جەرگە جاقىنداعان سايىن ناقتىلانادى, سوڭعى مالىمەتتەر بويىنشا ونىڭ ديامەترى-370 مەتر.

قالاي دەسەك تە, ونىڭ جەرمەن سوقتىعىسۋىنىڭ سالدارى ءبىزدىڭ پلانەتامىز ءۇشىن اۋىر بولادى. ونىڭ سالدارى ەڭ قۋاتتى ونداعان اتوم بومباسىنىڭ جارىلىسىمەن تەڭەسەدى.

وعان قوسا, اپوفيس جەرگە ءبىر ەمەس, بىرنەشە رەت جاقىندايدى. دالىرەك ايتقاندا, جالپى – 12 رەت, ال ونىڭ ۇشەۋىندە ءبىزدىڭ پلانەتامىزعا وتە جاقىندايدى: ء2029(ساۋىر), 2036(ناۋرىز) جانە ء2068(ساۋىرى).

ءبىرىنشى رەتتە ول ءبىزدىڭ پلانەتامىزدان 31,2 مىڭ كيلومەترگە جۋىق قاشىقتىقتا وتەدى - جانە بۇل جەردەن ايعا دەيىنگى قاشىقتىقتان 12 ەسە از, ءتىپتى كەيبىر جاساندى بايلانىس جەرسەرىكتەرىنىڭ وربيتالارىنا قاراعاندا ءسال جاقىن.

وسىمەن شىنايى فاكتىلەر اياقتالىپ, اسىرا سىلتەۋ باستالادى.

شىن مانىنە كەلسەك..

بىرىنشىدەن, استەرويدتىڭ جەرمەن سوقتىعىسۋىن كورسەتەتىن بارلىق يلليۋستراتسيالار-سۋرەتشىلەردىڭ قيالى ىسپەتتەس. ءتىپتى ءاپوفيستىڭ ساپالى بىردە-ءبىر سۋرەتى جوق.

مىنە, استەرويدتىڭ ناسا سايتىنداعى ەڭ جاقسى سۋرەتى.

سوڭعى ەسەپتەۋلەرگە سايكەس, اپوفيس ءبىزدىڭ پلانەتاعا 5,85 كم/س - نەمەسە 21 مىڭ كم/ساع جىلدامدىقپەن جاقىنداپ كەلەدى.

بۇل ساندار قورقىنىشتى ەستىلەدى, بىراق شىن مانىندە - عارىشتىق ولشەم بويىنشا بۇل وتە از. سەبەبى, جەرمەن سوقتىعىسۋ ىقتيمالدىعى جوعارى باسقا اسپان دەنەلەرى بىزگە بۇدان دا تەزىرەك جاقىندايدى.

ءاپوفيستىڭ جىلدامدىعىنىڭ سالىستىرمالى تۇردە تومەندىگى ونىڭ تراەكتورياسىن ءدال ەسەپتەۋدى قيىنداتادى, سوندىقتان ول ۇنەمى ناقتىلانىپ وتىرادى.

جوعارىدا ايتىلعانداي, بولجام بويىنشا اپاتتىڭ 2029 جىلى بولۋ ىقتيمالدىعى - 2,7%.

الايدا ەكى جىلدان كەيىن, 2006 جىلى ناقتى اقپاراتتار پايدا بولىپ, سوقتىعىسۋ تۋرالى بولجام تولىعىمەن جويىلدى. اپوكاليپسيستى 2036-شى جىلعا اۋىستىردى.

دەگەنمەن, بۇل بولجام ۇزاققا سوزىلمادى. 2013 جىلى عالىمدار اپوفيس تراەكتورياسىن قايتا ەسەپتەپ, الداعى ارماگەددوندى قايتادان جوققا شىعاردى.

«قازىرگى ۋاقىتتا سوقتىعىسۋ ىقتيمالدىعى ميلليوننان ءبىر دەڭگەيىندە, بۇل كورسەتكىش 2036 جىلى اپاتتىڭ بولمايتىنىنا سەنىم سىيلايدى», - دەپ مالىمدەدى ناسا-دا جەر ماڭىنداعى نىسانداردى باقىلاۋ باعدارلاماسىنا جەتەكشىلىك ەتەتىن دون يومانس.

سودان بەرى ناسا ءاپوفيستى باقىلاۋدى جالعاستىرۋدا. ەڭ سوڭعى دەرەكتەرگە سۇيەنسەك, ونىڭ 2068 جىلى پلانەتامەن سوقتىعىسۋ ىقتيمالدىعى 0,000007 - نەمەسە 110 مىڭنان 1 دەڭگەيىندە باعالانادى.

سالىستىرمالى تۇردە ايتساق, بۇل اۆتوموبيل اپاتىنىڭ سالدارىنان ءولۋ مۇمكىندىگىنە قاراعاندا مىڭ ەسە از, ارانىڭ شاعۋىنان ءولۋ ىقتيمالدىعىنان ەكى ەسە از جانە شامامەن يت تىستەگەننەن ءولىپ قالۋ مۇمكىندىگىمەن تەڭ.

قارلىعاش قۇرامىس,

«ەگەمەن قازاقستان»