بيۋدجەت قارجىسىنىڭ ءار تەڭگەسى ءتيىمدى جۇمسالسا, باسى ارتىق شىعىنعا جول بەرىلمەسە, جەرگىلىكتى بيۋدجەتتەردىڭ ءبۇيىرى قابىسا قويماسى كامىل. ءىستى وسىلايشا جۇرگىزۋدىڭ جولدارى مەن تاسىلدەرى دە بار.
سونىڭ ءبىرى – بيۋدجەت قاراجاتى ەسەبىنەن ازىرلەنەتىن جوبالىق-سمەتالىق قۇجاتتاردىڭ, ياعني جسق-نىڭ تيىمدىلىگى مەن پايدالى اسەر كوەففيتسيەنتىن كوتەرە ءبىلۋ. ءوندىرىستى وڭىردە وسى ماسەلەنىڭ سوڭعى ءۇش-ءتورت جىل ارالىعىنداعى جاي-كۇيىنە جان-جاقتى ساراپتاما مەن تەرەڭ تالداۋ جاسالدى. ايتالىق, اقتوبە وبلىستىق ەكونوميكا جانە بيۋدجەتتىك جوبالاۋ باسقارماسىندا ازىرلەنگەن دەرەكتەرگە سۇيەنسەك, جاڭادان تۇرعىزىلاتىن نىساندار ءۇشىن 1120 جسق جاسالعان. بۇگىنگە دەيىن ونىڭ 486-سى تولىق جۇزەگە اسىرىلعان. بۇعان دەيىن جاسالعان تالداۋلار مەن مونيتورينگتىك زەرتتەۋلەر 12 جسق-نىڭ مەرزىمى ءوتىپ كەتكەنىن ايعاقتادى. بۇل قارجىنى ءتيىمدى جۇمساۋعا نۇقسان كەلتىرگەنى ءسوزسىز.
ءتيىستى باسقارما ماماندارى مەن ساراپشىلارى جسق-نىڭ ءتيىمسىز جاسالۋىنىڭ بىرنەشە سەبەبىن العا تارتادى. بىرىنشىدەن, باستى باسىمدىقتار ەسكەرىلمەيدى. سونىمەن قاتار نىسان بوي كوتەرەتىن ەلدى مەكەندەردىڭ مۇمكىندىكتەرى مەن بولاشاعى, نىساننىڭ سول جەرگە قاجەتتىلىگى نەمەسە قاجەتسىزدىگى ويلاستىرىلماۋى ءجيى كەزدەسەتىن كەمشىلىك. ايتالىق, 2016 جىلى ايتەكە بي اۋدانىنىڭ سارىبۇلاق اۋىلىندا 60 وقۋشىعا ارنالعان مەكتەپتىڭ جوباسى جاسالعان ەكەن. الايدا اۋىلدا وسىنشا بالاعا ارنالعان مەكتەپ بار ەكەنى ەسكەرىلمەگەن. قازىرگى تاڭدا سارىبۇلاقتا بارلىعى
29-اق وقۋشى بار. اۋىلداعى بارلىق تۇرعىننىڭ سانى 200 شامالى ەكەنىن ەسكەرسەك, جاڭا مەكتەپتىڭ قاجەت ەمەس ەكەنى تۇسىنىكتى ەمەس پە؟
بيۋدجەتتى جوسپارلاۋعا نەمكەتتى قاراۋ مىسالىن قوبدا اۋدانىنان دا كەلتىرۋگە بولادى. 2017 جىلى وسى اۋدانعا قاراستى قاراكەمەر اۋىلىندا مەكتەپ قۇرىلىسىنىڭ جوبالاۋ-سمەتالىق قۇجاتتارى جاسالعان. جوبالاۋشىلار اۋىلدا 120 ورىندىق مەكتەپ بار ەكەنىنە ءمان بەرمەگەن. بۇل عيمارات تارلىق ەتسە ءبىر ءجون, كەرىسىنشە جوبا جاسالعان ۋاقىتتا نەبارى 22 وقۋشى بولىپتى.
جاسالعان تالداۋلار بيۋدجەت قاراجاتى ەسەبىنەن جسق جاساۋ كەزىندە وعان نەگىزسىز شىعىنداردىڭ قوسىلعانىن كورسەتەدى. بۇل كەي جاعدايدا قۇرىلىس-مونتاج جۇمىستارىنىڭ قىمباتتاۋىنا اكەلىپ سوقتىراتىنى تۇسىنىكتى. ماسەلەن, قازىر اۋدانداردىڭ ورتالىقتارىندا 6 دەنە شىنىقتىرۋ-ساۋىقتىرۋ كەشەنى سالىنىپ جاتىر, ارقايسىسى 160 ادامعا شاقتالعان. الايدا كەشەندەردىڭ قۇرىلىس جۇرگىزۋ قۇنى 250 مەن 430 ميلليوننىڭ ارالىعىن قۇرايدى. باعا الشاقتىعىنىڭ مانىسىنە ۇڭىلە كەلگەندە, ونىڭ باستى سەبەبى عيمارات جانىنداعى الاڭداردىڭ ايىرماشىلىعىنا, اتاپ ايتقاندا ونى جابدىقتاۋ مەن اباتتاندىرۋعا جۇمسالاتىن شىعىندار مەن قازاندىقتار قۇرىلىسى باعالارىنىڭ ءارتۇرلى ەكەندىگىنە بايلانىستى بولىپ شىقتى.
قازىرگى تاڭدا وڭىردە جوبالىق-سمەتالىق قۇجاتتاردى ازىرلەۋدىڭ تيىمدىلىگىن كوتەرۋ جونىندە ناقتى شارالار قولعا الىنۋدا. سوعان سايكەس جەرگىلىكتى مەملەكەتتىك ورگاندار جسق جاساۋعا ءوتىنىش بەرۋ پروتسەسىن قاتاڭ باقىلاۋدى ۇيعارىپ وتىر. وبلىستىق ەكونوميكا جانە بيۋدجەتتىك جوسپارلاۋ باسقارماسى جانىنان جوبالاۋ ءبولىمىنىڭ اشىلعانى دا قارجىنىڭ ءتيىمدى ءارى ۇنەمدى جۇمسالۋىنا سەپتىگىن تيگىزبەك. سالالىق باسقارمالاردىڭ كەلىسىمىن الماعان جانە بيۋدجەت كوميسسياسىنىڭ سۇزگىسىنەن وتپەگەن جوبالاردى قابىلداماۋ تارتىپتەرى دە قاراستىرىلعان. بۇعان قوسا جاڭا ءبولىمنىڭ قۇزىرەتىنە جوبانىڭ باستى باسىمدىقتارى مەن ەلدى مەكەندەردىڭ الەۋەتىن جانە بيۋدجەت مۇمكىندىكتەرىن انىقتاۋ جۇمىستارى دا ەنگىزىلمەك.
تەمىر قۇسايىن,
«Egemen Qazaqstan»
اقتوبە