حالقىمىز ەجەلدەن «اۋرۋ – استان» دەپ ەسكەرتىپ, بۇل ءسوزدى «اس – ادامنىڭ ارقاۋى» دەپ قۋاتتاعان. بۇگىنگى تاڭدا تاعام ءتۇرى كوپ بولعاندىقتان دا, كەيبىر ادامداردىڭ تاماقتانۋ ماسەلەسىندە قايشىلىقتار تۋىنداپ جاتادى. ال ەندى مەكتەپتە بالالار نە ءىشىپ, نە جەپ ءجۇر دەگەن ماسەلەنىڭ ءاربىر اتا-انانىڭ كوكەيىندەگى ساۋال ەكەنى تۇسىنىكتى.
شىنىندا, بۇگىندە مەملەكەت تاراپىنان بالالاردىڭ ءتيىستى دەڭگەيدە تاماقتانۋى ءۇشىن مەكتەپتەرگە لايىقتى قولداۋ كورسەتىلىپ كەلەدى. الايدا كوپتەگەن مەكتەپ اسحانالارىندا ۇن ونىمدەرى, قۇرامىندا قانتى باسىم سۋسىندار مەن ءتۇرلى ونىمدەردىڭ كوپ ساتىلاتىنى جاسىرىن ەمەس. سونىمەن قاتار, كوپ جاعدايدا جاڭا پىسكەن جەمىستەر مەن كوكونىستەردىڭ جەتكىلىكسىز مولشەرى جانە اسحانا ءمازىرىنىڭ نورمالارى ايقىندالماعان بولىپ شىعادى. ال, مەكتەپتەردە بالالاردى تاماقتاندىرۋدى ۇيىمداستىرۋداعى كەيبىر كەمشىلىكتەر, تاماق ىشۋگە ارنالعان ۋاقىتتىڭ جەتكىلىكسىزدىگى مەن مەكتەپ اسحانالارىنىڭ ەسكىرگەن ماتەريالدىق-تەحنيكالىق بازاسى جانە كەيبىر مەكتەپتەردە ءتىپتى اسحانالاردىڭ بولماۋى دا كوڭىلگە كىربىڭ ۇيالاتاتىنى انىق. بۇل ورايدا, «نۇر وتان» پارتياسىنىڭ «مەكتەپ اسحانالارى» جوباسىنىڭ ءوز جۇمىسىن باستاعانى بەلگىلى. ال, پارتيا جامبىل وبلىستىق فيليالىنىڭ ۇيىمداستىرۋىمەن, بۇل ماقساتتا ساراپشى توپ قۇرىلىپ, تاراز قالاسىنداعى بىرقاتار مەكتەپتەردىڭ اسحانالارىن تەكسەرىپ شىقتى. ناتيجەسىندە, جەتىستىكتەرمەن قاتار, بىرقاتار كەمشىلىكتەردى دە كورۋگە بولادى.
تاراز قالاسىنداعى ءۇش تىلدە وقىتاتىن مامانداندىرىلعان دارىندى بالالارعا ارنالعان مەكتەپتە 485 بالا ءبىلىم الادى. اتالعان مەكتەپتىڭ ديرەكتورى زاۋرە دۇزەنوۆا بالالاردىڭ دۇرىس تاماقتانۋى ءاردايىم باستى نازاردا ەكەنىن ايتادى. مۇندا ءبىلىم الىپ جۇرگەن بالالار تۇسكى مەزگىلدەگى ۇزىلىستە مەكتەپ اسحاناسىنان تاماقتاناتىن بولسا, وقۋشىلارعا بەرىلەتىن ىستىق تاماق ەلىمىزدىڭ ءبىلىم جانە عىلىم مينيسترلىگىنىڭ بەكىتكەن تالابىنا ساي ەكەن. ال, وقۋشىلاردىڭ وزدەرى دە مەكتەپ اسحاناسىندا ءتاتتى شاي, قايناتىلعان جۇمىرتقا, ءتۇرلى ىستىق تاماق, يوگۋرت جانە بالىق ەتىنەن جاسالعان كوتلەت بەرىلەتىنىن ايتىپ بەردى.
ەرەكشە دارىندى بالالارعا ارنالعان وبلىستىق «دارىن» مەكتەپ-ينتەرناتىنىڭ بالالارى كۇنىنە بەس مەزگىل تاماقتانادى ەكەن. مەكەمە باسشىسى نازيرا شىلتاەۆانىڭ ايتۋىنشا, مۇندا 325 وقۋشى ءبىلىم الادى. الايدا مەكتەپ اسحاناسى 130 ورىندىق قانا. دەمەك, بالالار ءۇش توپقا ءبولىنىپ اس ىشەدى دەگەن ءسوز. كەلەسى توپ كەزەك كۇتىپ قالماس ءۇشىن كەيدە بالالاردىڭ اسىعىپ اس ىشۋىنە دە تۋرا كەلەدى. ەندىگى جەردە مەكتەپ اسحاناسىن ۇلكەيتۋ ماسەلەسى تۋىندايدى. دەي تۇرعانمەن, اعا اسپاز گالينا موتوۆيلوۆا وقۋشىلاردىڭ دۇرىس تاماقتانۋىنا اسپازداردىڭ دا ءتيىستى كوڭىل ءبولىپ وتىراتىنىن جەتكىزدى.
ال, وبلىس ورتالىعىنداعى №44 مەكتەپتە 1100 بالا وقيدى ەكەن. سونىمەن قاتار, مۇندا الەۋمەتتىك جاعدايى ءالسىز, از قامتىلعان وتباسىنان شىققان 207 بالانىڭ تەگىن تاماقتاناتىنى قۋانتارلىق جاعداي. تاعى ءجۇز بالا وسى جەردەن اقىلى تۇردە اس ىشەدى. مەكتەپ اسحاناسى ءتيىستى جابدىقتارمەن جابدىقتالعانىمەن, اس ىشەتىن اياق-تاباقتىڭ ەسكىلىگى كوزگە بىردەن كورىنەدى. سونىمەن قاتار, قول جۋ بولمەسىندە ارنايى كەپتىرگىشتەردىڭ بولماعانى دا بىردەن بايقالدى. سونداي-اق, مۇنداي جاعداي بۇگىنگى تاڭدا 1413 بالا ءبىلىم الاتىن №7 ورتا مەكتەپتە دە قايتالاندى. بىراق, ءبىر قۋانتارلىعى, 120 وقۋشىعا ارنالعان مەكتەپ اسحاناسىنان 150 بالا تەگىن ىستىق تاماق ىشەدى ەكەن. ال, مەكتەپ ديرەكتورىنىڭ ورىنباسارى گۇلميرا رايقۇلوۆا تەگىن ىستىق تاماق ءۇشىن ءاربىر بالاعا 250 تەڭگە بولىنەتىنىن ايتتى. اقىلى تۇردە تاماقتاناتىن ءار بالاعا 200 تەڭگەدەن اينالاتىن بولىپ شىقتى.
بۇگىندە مەكتەپ اسحانالارىنا ءمان بەرۋ ماڭىزدى بولىپ تۇر. ايتپەسە, بالاعا بەرگەننىڭ ءبارى اس. ولار تاماقتىڭ ساپاسىنا دا ءمان بەرە قويمايدى. ال, كەلەشەك ۇرپاقتىڭ دەنىنىڭ ساۋ, ءومىر جاسىنىڭ ۇزاق بولۋى بۇگىنگى امالعا بايلانىستى ەكەنىن ۇمىتپاۋ ءلازىم.
حاميت ەسامان,
«ەگەمەن قازاقستان»
جامبىل وبلىسى