كەنشىلەر استاناسىنداعى «دوستىق ۇيىندە» قاراعاندى وبلىستىق قازاقستان حالقى اسسامبلەياسىنىڭ «قازاقتانۋ» دەپ اتالعان عىلىمي-اعارتۋشىلىق جوباسى اياسىندا قۇرىلعان «كۇي-كەرۋەن» ورتالىعىنىڭ جۇمىس ىستەي باستاعانىنا دا كوپ بولا قويعان جوق.
الايدا از عانا ۋاقىت ىشىندە بۇل ورتالىق شەرتپە كۇي ونەرىن ناسيحاتتاۋ جولىندا بىرقاتار جوبانى جۇزەگە اسىرىپ ۇلگەردى. تاياۋدا وقۋشى بالالار ءۇشىن دومبىرادا ويناۋ شەبەرلىك سىنىبىنىڭ ۇيىمداستىرىلعانىن دا وسى يگى ىستەردىڭ قاتارىنا جاتقىزۋعا بولادى. ءدارىستى داۋلەسكەر كۇيشى, شەرتپە كۇي ونەرىن بيىك دەڭگەيگە كوتەرىپ كەتكەن داۋلەتبەك سادۋاقاس ۇلىنىڭ بالاسى, ءوزى دە تانىمال دومبىراشى قايروللا سادۋاقاسوۆ وتكىزدى.
اكە جولىن قۋىپ, ۇستازدىققا دەن قويعان كۇيشى جاس بالالارعا دومبىرانىڭ قۇرىلىسى, ونىڭ قيلى تاريحى جايلى ەگجەي-تەگجەيلى ايتىپ بەردى. قازاقتىڭ قاسيەتتى اسپابى تۋرالى مول ماعلۇماتقا قانىق بولعان وقۋشىلار «كۇي-كەرۋەن» ورتالىعىنداعى قۇندى جادىگەر – جاسالعانىنا 100 جىل بولعان دومبىرادا كۇي تارتۋ مۇمكىندىگىنە يە بولدى.
– ءاربىر ۇستاز ءۇشىن حالىق شىعارماشىلىعىن تانىمال ەتۋدىڭ ماڭىزى زور. ءبىرىنشى كەزەكتە ءبىز وسكەلەڭ ۇرپاقتى ۇلتتىق داستۇرلەرىمىزدى دارىپتەپ وسەتىندەي ەتىپ تاربيەلەۋىمىز كەرەك. حالىق ءداستۇرى قاسيەتتى, ال ءداستۇردى قۇرمەتتەۋ – اركىمنىڭ مىندەتى, – دەيدى «كۇي-كەرۋەن» ورتالىعىنىڭ ديرەكتورى قايروللا سادۋاقاسوۆ.
قايرات ءابىلدا,
«ەگەمەن قازاقستان»
قاراعاندى