ەلىمىزدە «مادەني مۇرا» باعدارلاماسى بويىنشا قانشاما ىستەر جۇزەگە استى. ورىس, قىتاي, پارسى, اراب تىلدەرىندە جازىلىپ قالدىرىلعان كوپتەگەن قازاق تاريحىنا قاتىستى جادىگەرلەر جيناقتالىپ, كىتاپ بولىپ جارىق كوردى. بىراق بۇل ءالى تولىق اتقارىلعان ءىس ەمەس. دۇنيەجۇزىنىڭ كوپتەگەن مۇراعاتتارى مەن مۋزەيلەرىندە قازاق تاريحىنا قاتىستى ءالى كوپ بەيمالىم دەرەكتەر جەتەرلىك. سوندىقتان «ارحيۆ – 2025» جەتى جىلدىق باعدارلاماسىن جۇزەگە اسىرۋ ارقىلى بۇكىل زيالى قاۋىم وكىلدەرى تاريحىمىزدىڭ اقتاڭداقتارىن اشۋعا مۇمكىندىك الىپ وتىر.
«دالا فولكلورىنىڭ انتولوگياسىن» جاساۋعا قازاقستان جازۋشىلار وداعى تىكەلەي ارالاسادى. ويتكەنى كوپتەگەن ەرتەگىلەرىمىز بەن ليرو-ەپوستىق جىرلارىمىزدىڭ, باتىرلىق جىرلار مەن ماقال-ماتەلدەردىڭ, اڭىزدار مەن قيسسالاردىڭ ءالى دە حالىق نازارىنا ۇسىنىلماعان, الەم وقىرمانىنا بەيمالىم نۇسقالارى بارشىلىق. بۇل ىستە قازاقستان جازۋشىلار وداعى نەگىزگى كۇش-قايرات كورسەتۋى كەرەك. تۇركولوگتاردىڭ دۇنيەجۇزىلىك كونگرەسىن 2019 جىلى استانادا وتكىزۋدىڭ ناقتى بەلگىلەنۋى – كوپ جاڭا عىلىمي جۇيەلى ىستەردىڭ جۇزەگە اسۋىنا سەرپىن بەرەرى ءسوزسىز.
ايتا بەرسەك, « ۇلى دالانىڭ جەتى قىرى» ماقالاسىندا كورسەتىلگەن جوبالاردىڭ جۇزەگە اسۋى ارقىلى بارشا الەمگە ءوزىمىزدىڭ ۇلى دالا ەلى ەكەندىگىمىزدى دالەلدەيتىن تاريحي دامۋىمىزداعى جاڭا كەزەڭ باستالىپ وتىر. ءاربىر زيالى قازاق ازاماتى ەلباسى ماقالاسىنداعى كورسەتىلگەن باعىتتاردىڭ ءىس جۇزىنە اسۋىنا بارىنشا قايرات كورسەتىپ, ۇلەس قوسۋى كەرەك دەپ بىلەمىن.
باۋىرجان جاقىپ,
قازاقستان جازۋشىلار وداعى باسقارما توراعاسىنىڭ ورىنباسارى, اقىن