ورال قالاسىندا 126 پاتەرلىك 9 قاباتتى جاڭا ءۇي پايدالانۋعا بەرىلدى. بۇرىنعى اپاتتى ءۇيدىڭ ورنىنا كوتەرىلگەن, مەملەكەت- جەكەشەلىك ارىپتەستىگى نەگىزىندە سالىنعان بۇل ءۇيدىڭ 12 پاتەرىنە وسى جەردەگى كونە ءۇيدىڭ تۇرعىندارى كىردى.
توزىعى جەتكەن, اپاتتى ۇيلەر – كەز كەلگەن قالانىڭ باس اۋرۋى. ويتكەنى ونداي عيماراتتار شاھار ءسانىن بۇزعانىنان بولەك, ەسكى ءۇي تۇرعىندارىن باسپانامەن دە قامتاماسىز ەتۋ كەرەك. ۇيرەنشىكتى ءۇي, باۋىر باسقان اۋدانىنان كەتكىسى كەلمەيتىن ادام كوڭىلى تاعى بار. وسىنىڭ ءبارى ورال قالاسىندا ورايىمەن شەشىلىپ جاتىر. اپاتتى ۇيلەردى اۋىستىرۋدىڭ ورالدىق تاجىريبەسى بۇگىندە ەلىمىزدىڭ بارلىق وڭىرىنە ۇسىنىلۋدا.
2016 جىلى ورال قالاسىندا توزىعى جەتكەن, قۇلاعالى تۇرعان 52 ءۇي بولاتىن, وندا 1448 وتباسى الاڭ كوڭىل بولىپ تۇرىپ جاتتى.
ەلىمىزدە مەملەكەت-جەكەشەلىك ارىپتەستىگى باعدارلاماسى قولعا الىنعان تۇستا تىڭ يدەيا تۋدى: قالانىڭ قاق ورتاسىندا, كوممۋنيكاتسيا جەلىلەرىن تارتۋعا شىعىن كەتپەيتىن ىڭعايلى جەردە تۇرعان اپاتتى ءۇيدى قيراتىپ, ورنىنا جاڭا عيمارات تۇرعىزۋدى قۇرىلىس كومپانيالارى دا قىزۋ قولدادى. ءۇي تۇرعىندارى ۋاقىتشا, قۇرىلىس اياقتالعانشا باسقا جەردە تۇرا تۇرادى, ولاردىڭ باسپانا جالداۋ شىعىنىن جەرگىلىكتى اتقارۋشى ورگاندار نەمەسە قۇرىلىس كومپانياسىنىڭ ءوزى كوتەرەدى. جاڭا ءۇي سالىنىپ بىتكەن سوڭ تۇرعىندار بۇرىنعى پاتەر كولەمىنە ساي باسپاناعا تەگىن يە بولادى. قالعان پاتەرلەردى كومپانيا ءوزى ساتادى. ەكى جاققا دا ءتيىمدى دەگەن وسى ەمەس پە؟!
مىنە, سوڭعى ءتورت جىل ىشىندە ورالدا وسىنداي 11 اپاتتى ءۇي سۇرىلگەن ەكەن. 113 پاتەردىڭ تۇرعىندارى باسقا جەرگە كوشىرىلىپ, كونە ءۇي ورىندارىندا قۇرىلىس قايناپ جاتىر. ەكى ءۇي قۇرىلىسى اياقتالىپ, جاڭا تۇرعىندارى ورنالاسىپ تا ۇلگەردى: 2017 جىلى دەپو كوشەسىندەگى №18 ءۇيدىڭ قۇرىلىسى ءبىتىپ, 16 وتباسى جاڭا پاتەر كىلتىن السا, وتكەن جىلى 2-شاقىرىم كوشەسىندە دە كونە ءۇيدىڭ ورنىنا جاڭا عيمارات بوي كوتەرىپ, اپاتتى ۇيدەگى 32 وتباسى جاڭا پاتەرگە كوشتى. ءسويتىپ ەكى جىلدا ورال قالاسى اكىمدىگىنىڭ باسپانا كەزەگىندە تۇرعان اپاتتى ۇيلەردىڭ 48 تۇرعىنى پاتەرىن جاڭارتىپ الدى.
ال پايدالانۋعا بەرىلگەن 9 قاباتتى, 126 پاتەرلىك ءزاۋلىم ءۇيدىڭ ورنىندا 12 پاتەرلىك جەرتابان ءۇي بولدى دەۋدىڭ ءوزى قيىن.
جوعارىدا ايتقانىمىزداي, ەلباسىنىڭ «بەس الەۋمەتتىك باستاماسىن» جۇزەگە اسىرۋ اياسىندا «7-20-25» باعدارلاماسى ورال قالاسىندا بىرتىندەپ ىسكە اسىرىلۋدا. «كاراۆاننىي پۋت» قۇرىلىس كومپانياسى تاپسىرعان 126 پاتەرلىك تۇرعىن ءۇي 11 ايدىڭ ىشىندە سالىنىپ ءبىتتى. ول «نۇرلى جەر» ينفراقۇرىلىمدى دامىتۋ مەملەكەتتىك باعدارلاماسى بويىنشا اپات جاعدايىندا تۇرعان ءۇيدىڭ پاتەر يەلەرىنە, تۇرعىن ءۇي كەزەگىندە تۇرعان وتباسىلارعا جانە «تۇرعىنۇيقۇرىلىسجيناقبانكى» سالىمشىلارىنا بەرىلەتىن بولدى.
پايعامبار جاسىنان اسقان وتەگەن سۇلتانعاليەۆ اقساقال بۇرىن ورال ەت كومبيناتىندا دارىگەر بولىپ قىزمەت ەتكەن ەكەن. ءوزى دە, جارى دا زەينەت دەمالىسىنا شىققان قاريالار وسى جەردەگى كونە پاتەردە ءۇش بالا تاربيەلەپ ءوسىرىپتى. اپاتتى ءۇي ورنىندا بوي كوتەرگەن جاڭا ءۇيدىڭ №102 پاتەرى وتەگەن ايۋپ ۇلىنىڭ ەنشىسىنە تيگەنىنە ەرەكشە قۋانىشتى.
بۇگىندە ورال قالاسىندا وسىنداي كوپپاتەرلى 5 ءۇي سالىنىپ جاتىر. ول ۇيلەردىڭ قۇرىلىسى 2019-2020 جىلدارى اياقتالماق.
«بولاشاقتا قۇلاعالى تۇرعان 7 كونە ۇيدەگى 76 پاتەر تۇرعىندارى دا وسىنداي جولمەن جاڭا باسپاناعا يە بولادى», دەيدى وبلىستىق قۇرىلىس باسقارماسى ماماندارى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى