وتاندىق «كرەمني القابىنىڭ» ءحالى قالاي؟

– تەحنوپارككە شىلدە ايىنان باستاپ ورنالاسا باستادىق. جارتى جىلدىڭ ىشىندە 4 قاب­ات تۇگەل تولدى. كوۆوركينگ ايماق­تارعا ارنالعان 3 قاباتقا  IT-ستارتاپەرلەر – ينكۋباتسيا مەن اكسەلەراتسيالارعا قاتىساتىندار كەلدى, تاعى ءبىر قابات بۇرىننان بار IT- كومپانيالارعا بەرىلدى. حابتا قازىر حالىقارالىق جانە قازاقستاندىق كومپانيالاردىڭ ورتالىقتارى بار,– دەپ حابارلادى بىزگە  Astana Hub وكىلى.

اكسەلەراتسيا مەن ينكۋبا­تسيا­لارعا قاتىسۋعا نيەتتىلەردەن جارتى جىل ىشىندە 513 ءوتىنىش ءتۇستى. 550-گە تارتا ادام تەحنو­پارك­تىڭ ينفرا­قۇرىلىمىن پايدا­لانۋعا مۇمكىندىك الىپتى. 185 جوبا جاسالىپ, 47 اكسەلەراتسيا جوباسى شىعارىلدى. 200-دەن استام ءتۇرلى شارا ءوتىپ, وعان 11 مىڭنان استام ادام قاتىستى. ستار­تاپتارعا 150 ميلليون تەڭگە ينۆەستيتسيا تارتىلعان. ونداعان شەتەلدىك كومپانيامەن ارىپتەستىك بايلانىس جولعا قويىلعان.

جالپى, الەم بويىنشا جىل سايى­ن اشىلعان ءار سالاداعى ستار­تاپ كومپانيالاردىڭ 90 پا­يىزى ءتۇرلى سەبەپتەرمەن سول جى­لى-اق جابىلىپ قالادى ەكەن. بى­رىنە ينۆەستيتسيا جەتپەيدى, ەندى ءبىرىنىڭ يدەياسى ومىر­شەڭ ەمەس دەگەندەي. Astana Hub وسىن­­داي ستارتاپتارعا جول كور­سە­تىپ, ين­فرا­قۇرىلىم ۇسىنىپ, ينۆەس­­تيتسيا تارتۋعا, نارىققا سى­­­ڭۋىنە كومەك­تە­سەتىنىن ايتا كەتەيىك.

BIM SPACE –

ۆيرتۋالدى شىنايى بولمە

سۇلتان ماركەنوۆ ۇسىنعان جاڭا BIM SPACE ۆيرتۋالدى شىنايى بولمە ءالى سالىنباعان, جوباسى عانا جاسالعان قانداي دا ءبىر نىساندى ءىشى-سىرتىنان تا­ماشالاپ كورۋگە مۇمكىندىك بە­رەدى. جوبا اۆتورى ونىڭ قۇ­رى­لىس حولدينگتەرىنە, مۇ­ناي-گاز سەكتورىنا, يندۋس­تريا­­­­­لىق كاسىپورىندارعا, ۋني­­ۆەرسيتەتتەرگە, عىلى­مي-زەرت­تەۋ ور­تا­لىقتارىنا, اكىم­دىك­تەرگە كە­رەك ەكەنىن ايتادى.

سۇلتاننىڭ جاڭالىعى ءۇش قابىرعاسى, توبەسى مەن ەدەنى بار شاعىن بولمەدەن تۇرادى. بولمەگە كىرىپ, كادۋىلگى كينوتەاتر­لاردا كيىپ جۇرگەنگە ۇقساس 3D كوزىلدىرىكتى كيىپ, ۇسىنىلعان نى­ساندى, نە بولماسا كۇردەلى جاڭعىرۋدان وتكەن ءىرى زاۋىتتى كورىپ, اسىقپاي ارالاپ شىعاسىز. كوز ال­­­دىڭىزداعى كورىنىستىڭ اۋقى­­­­­­مى بولاشاق نىسانمەن بىر­دەي. 

BIM SPACE ۆيرتۋالدى شىن­دىق بولمەسىنىڭ ءتيىمدى جاقتارى تۋرالى ونى جاساۋشى جىگىت بىلاي دەيدى:

– ءبىر نىساندى سالۋ كەزىندە, نە بولماسا ءىرى كاسىپورىندى جاڭعىرتۋ بارىسىندا باستاپقى جوبا مەن تاپسىرىس بەرۋشى كۇت­كەن سوڭعى ناتيجە ساي كەلمەي جاتاتىن كەزدەر بولادى. مىسالى, تەح­نيكالىق, ديزاينەرلىك جاعى­نان ەرەكشەلىكتەر بولۋى مۇمكىن. ونى تاپسىرىس بەرۋشىنىڭ تالابىنا ساي قايتا وزگەرتۋ قوسىمشا ۋاقىت پەن شىعىندى قاجەت ەتەتىنى بەلگىلى. ال BIM SPACE ۆيرتۋالدى شىنايى بولمە ارقىلى تاپسىرىس بەرۋشى مەن جوبانى جۇزەگە اسىرۋشى ۆيزۋالدى تۇردە 3D مودەلدە ءبارىن ەگجەي-تەگجەيلى كورىپ شىعا الادى, – دەيدى.

قىسقاسى, BIM SPACE پروەكتسياسىمەن جوبانى الدىن الا كورۋ, قاجەتتى وزگەرىستەردى ەنگىزۋ جۇمىستىڭ تاپسىرىس بەرۋشىنىڭ كوڭىلىنەن شىعۋىنا كومەگىن تيگىزەدى. وعان قوسا ەكى تاراپتىڭ دا ۋاقىتىن ۇنەمدەيدى, ارتىق شىعىننان قۇتقارادى. بۇل, ماسەلەن, قۇرىلىس جۇمىستارىن جىلدامداتۋعا, تاپسىرىس كولەمىن ۇلعايتۋعا, ساپانى كوتەرۋگە سەپ­تىگىن تيگىزەدى.

سۇلتان ماركەنوۆتىڭ جاڭا­لىعى الەم­دە بۇرىن-سوڭدى بول­ماعان دەۋدەن اۋلاقپىز. وسىعان ۇقساس جۇمىستاردى ورىندايتىن كومپانيالار بار. ولاردىڭ نارىقتاعى باعاسى دا بەلگىلى. ماسەلەن, قازاقستاندىق ستارتاپەرگە باسەكەلەس كومپانيالار ءار تاپسىرىس ءۇشىن مىناداي سوما قاراجات تولەۋى كەرەك:  Barco – 1 130 000 – 3400 000 $, imsys 365 000$, Viscon – 340 000$, 3Dims - 325 000$, IC.IDO – 570 000$... ال BIM SPACE ۆيرتۋالدى شىنايى بولمەگە تاپسىرىس بەرۋ اقىسى بۇلاردان الدەقايدا تومەن. بۇعان دەيىن جاڭالىعىن ءبىر مارتە ساتىپ, تابىس تاپقان سۇلتان ماركەنوۆ جىل سوڭىنا دەيىن تاعى 3 تاپسىرىس ورىنداۋدى جوس­پارلاپ وتىر.

ارنۇر اسقار,

«ەگەمەن قازاقستان»