«نۇر وتان» پارتياسى ەلىمىزدە الەۋمەتتىك كاسىپكەرلىكتىڭ دامۋىنا قولداۋ كورسەتەدى. بۇل تۋرالى بۇگىن استاناداعى «GreenTAL» الەۋمەتتىك شەبەرحاناسىنا بارعان پارتيا توراعاسىنىڭ ءبىرىنشى ورىنباسارى ماۋلەن اشىمباەۆ ايتتى.
شەبەرحاناعا ارنايى كەلگەن «نۇر وتان» پارتياسى توراعاسىنىڭ ءبىرىنشى ورىنباسارى نىساننىڭ جۇمىسىمەن تانىسىپ, مەكەمە ۇجىمىمەن كەزدەستى. ءوز سوزىندە پارتيا توراعاسىنىڭ ءبىرىنشى ورىنباسارى الەۋمەتتىك باستامالاردىڭ ماڭىزى مەن ولاردىڭ ەل دامۋىنا تيگىزەر اسەرى جونىندە ايتتى.
– ەلباسى قازاقستان حالقىنا ارناعان جولداۋىندا مۇمكىندىگى شەكتەۋلى جاندارعا جۇيەلى قولداۋ كورسەتۋ جانە ولار ءۇشىن كەدەرگىسىز ورتا قالىپتاستىرۋ تۋرالى الدىمىزعا ناقتى مىندەتتەر قويدى. سوعان بايلانىستى پارتيامىز بەلسەندى ارەكەت ەتىپ, ناقتى جۇمىستاردى قولعا الدى. «كەدەرگىسىز كەلەشەك» پارتيالىق جوباسى اياسىندا دا بىرنەشە باعىتتا اۋقىمدى جۇمىستار اتقارىلىپ جاتىر. اتاپ ايتقاندا, ينكليۋزيۆتى ءبىلىم بەرۋ ىسىنە, كەدەرگىسىز ورتا قالىپتاستىرۋعا, مۇمكىندىگى شەكتەۋلى جانداردىڭ ساياسي-الەۋمەتتىك ومىرگە بەلسەنە قاتىسۋىن قامتاماسىز ەتۋگە جانە ولاردى جۇمىسپەن قامتۋعا باسىمدىق بەرىپ وتىرمىز, – دەدى ماۋلەن اشىمباەۆ.
قازىرگى تاڭدا مۇمكىندىگى شەكتەۋلى جانداردى جۇمىسپەن قامتۋ قوعامىمىزداعى ەڭ وزەكتى ماسەلەلەردىڭ ءبىرى ەكەنى ءسوزسىز. ويتكەنى, وكىنىشكە قاراي, مۇنداي ازاماتتاردى بارلىق كاسىپورىن بىردەي جۇمىسقا قابىلداي بەرمەيدى. سول سەبەپتى, «نۇر وتان» پارتياسى وسى ماسەلەنى ءتيىمدى شەشۋدىڭ وزىق ۇلگىلەرىن قاراستىرىپ, ۇتىمدى جولدارىن قولعا الماق.
– ارينە, مۇمكىندىگى شەكتەۋلى ازاماتتار مەملەكەتتەن ءتيىستى جاردەماقى الادى. دەگەنمەن, ولاردىڭ اراسىندا جۇمىسقا قابىلەتتى جانە ەڭبەككە ارالاسقىسى كەلەتىندەرى بار. سوندىقتان ولاردىڭ قوسىمشا تابىس تاۋىپ, ءومىر ءسۇرۋ ساپاسىن ارتتىرۋىنا لايىقتى جاعداي جاسالۋى ءتيىس, – دەگەن ماۋلەن اشىمباەۆ وسى ىستە الەۋمەتتىك كاسىپكەرلىكتىڭ بەرەرى مول ەكەنىن ايتتى.
سونىمەن قاتار ول «نۇر وتان» پارتياسىنىڭ ەلىمىزدە اتالعان كاسىپكەرلىكتى دامىتۋعا ىقپال ەتۋدى جوسپارلاپ وتىرعانىن جەتكىزدى. بۇل ىستە «GreenTAL» سياقتى كومپانيالاردىڭ تاجىريبەلەرىنە ەرەكشە نازار اۋدارىپ, ونى قازاقستاننىڭ وزگە وڭىرلەرىندە دە ىسكە اسىرۋعا جاعداي جاسالۋى ءتيىس.
الەۋمەتتىك مەكەمەنىڭ جۇمىسىمەن تانىسۋ بارىسىندا ماۋلەن اشىمباەۆ ءالى دە جەتىلدىرۋدى قاجەت ەتەتىن تۇستارعا دا نازار اۋداردى. ونىڭ سوزىنە قاراعاندا, بۇل ىستە مەملەكەتتىك ورگاندار مەن الەۋمەتتىك كاسىپكەرلەردىڭ اراسىنداعى ءوزارا ءىس-ارەكەتتى جانداندىرۋ كەرەك. سوندىقتان پارتيا تاراپىنان وسى باعىتتا ءتيىستى جۇمىستار قولعا الىنباق.
– اتالعان ىستە الەۋمەتتىك كاسىپكەرلىكتى دامىتۋدىڭ ناقتى ەرەجەسىن قالىپتاستىرۋعا جانە نورماتيۆتىك-قۇقىقتىق بازانى جەتىلدىرۋگە كوڭىل ءبولۋ كەرەك. ول الەۋمەتتىك كاسىپكەرلەر مەن جۇمىس ىستەيتىن مۇمكىندىگى شەكتەۋلى جانداردىڭ مۇددەسىن قورعاپ قانا قويماي, مەملەكەتتىك ورگانداردىڭ ساياساتىنا دا ساي بولۋى ءتيىس. سوندىقتان وسىنداي ماسەلەلەردى ەڭبەك جانە حالىقتى الەۋمەتتىك قورعاۋ مينيسترلىگىنىڭ الدىنا قويىپ, ءتيىستى جۇمىستاردىڭ قولعا الىنۋىنا ىقپال ەتەتىن بولامىز, – دەدى «نۇر وتان» پارتياسى توراعاسىنىڭ ءبىرىنشى ورىنباسارى.
ايتا كەتەيىك, «GreenTAL» الەۋمەتتىك شەبەرحاناسى جاس كاسىپكەر ەمين اسكەروۆتىڭ باستاماسىمەن وسىدان ءتورت جىل بۇرىن اشىلعان. وندا مۇمكىندىگى شەكتەۋلى جانداردى وقىتىپ, جۇمىسقا ورنالاستىرۋعا قاجەتتى جاعداي جاسالعان. شەبەرحانا پسيحيكالىق دەنساۋلىقتىڭ مەديتسينالىق ورتالىعى جانىنداعى پسيحوالەۋمەتتىك وڭالتۋ ورتالىعىندا ورنالاسقاندىقتان, مۇنداعى قىزمەتكەرلەردىڭ باسىم بولىگى سوزىلمالى مەنتالدى اۋىتقۋشىلىققا شالدىققان جاندار.
– الەۋمەتتىك كاسىپكەرلىكپەن اينالىسقىسى كەلگەن جان الدىمەن بۇل ءىستىڭ قوعامعا قانداي پايداسى بار ەكەنىن انىقتاپ الۋى كەرەك. كاسىبىڭ مەن ىشكى جان-دۇنيەڭدە دە ۇيلەسىم بولۋى ءتيىس. مەن قانداي كاسىپپەن اينالىسسام دا بايلىققا بەلشەمنەن باتۋدى كوزدەگەن جوقپىن. قايتا بيزنەسىم ارقىلى حالىققا قانداي دا ءبىر كومەگىمدى تيگىزۋدى ماقسات تۇتتىم. وسىلايشا, الەۋمەتتىك كاسىپكەرلىككە بەت بۇردىم, – دەيدى ەمين اسكەروۆ.
بۇگىندە اتالعان الەۋمەتتىك شەبەرحانادا تەمىر, اعاش, دانەكەرلەۋ, تىگىن جانە بەزەندىرۋ تسەحتارى, كوركەمونەر ستۋدياسى, سونداي-اق, تيپوگرافيا جۇمىس ىستەيدى. وسى جەردە دايىندالعان ونىمدەر استانا نارىعىندا جوعارى سۇرانىسقا يە. سونداي-اق تاياۋدا مۇندا ترەننيگ-كافەگە ارنالعان ءبولىم دە اشىلعان. ول جەردە داياشىلار, بارمەندەر جانە اس ءۇي قىزمەتكەرلەرىن دايارلايتىن كۋرستار جۇمىس ىستەيدى.