كەشە وتكەن اكىمدىك جيىنىندا شىمكەنت قالالىق اقپاراتتاندىرۋ, مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ 2018 جىلعى اتقارعان جۇمىستارى جونىندە ەسەبى تىڭدالدى. بىلتىر شىمكەنتتە تۇرعىندارعا 6,5 ميلليون مەملەكەتتىك قىزمەت كورسەتىلگەن. ونىڭ ىشىندە 4,9 ميلليون قىزمەت ەلەكتروندى تۇردە جۇرگىزىلگەن. بۇل جونىندە اتالعان باسقارما باسشىسىنىڭ مىندەتىن اتقارۋشى اينۇر يۋسۋپوۆا باياندادى.
«مەملەكەتتىك قىزمەتتەردى اۆتوماتتاندىرۋ جانە وڭتايلاندىرۋ بويىنشا ۆەدوموستۆوارالىق كوميسسيا وتىرىستارى وتەدى. ناتيجەسىندە جەرگىلىكتى اتقارۋشى ورگاندار تاراپىنان كورسەتىلەتىن 191 مەملەكەتتىك قىزمەتتىڭ 152-ءىن اۆتوماتتاندىرۋ جانە وڭتايلاندىرۋ جوسپارلانۋدا. وسى ماقساتتا ورتالىق مەملەكەتتىك ورگاندارمەن 144 جول كارتاسى ازىرلەنىپ, كەلىسىلۋدە. سونىمەن قوسا حالىقتىڭ تسيفرلىق ساۋاتتىلىق دەڭگەيىن ارتتىرۋ جۇمىستارى قولعا الىنعان. ەسەپتىك جىلى 3500 ادام وقىتىلۋ جوسپارلانىپ, 4406 قالا تۇرعىنى 4 باعىت بويىنشا وقىتىلدى», - دەدى اينۇر ابدۋاحاسقىزى.
قازىرگى تاڭدا, شىمكەنت قالاسىنىڭ اكىمدىگى تاراپىنان 191 مەملەكەتتىك قىزمەت ۇسىنىلادى. ونىڭ 94-ءى ەلەكتروندى نىساندا, ال 69 قىزمەتتى مەملەكەتتىك كورپوراتسيا ارقىلى الۋ مۇمكىندىگى بار.
نۇرشات توكەن,
«ەگەمەن قازاقستان»