سپيدكۋبينگ – زياتكەرلىك دودا

60-تان استام قاتىسۋشى باق سىناعان بايقاۋدا جۇلدەگەر اتانۋ دا وڭاي ەمەس, بىراق اتىراۋداعى نازارباەۆ زياتكەرلىك مەكتەبىنە جينالعان جاستاردىڭ جەڭىسكە دەگەن جىگەرلەرى ايرىقشا كورىندى. WCA قاۋىمداستىعىنىڭ ۋكرايناداعى وكىلى ستەپان دجۋريلو: «بۇل مەنىڭ قازاقستانعا العاش رەت كەلۋىم. رۋبيكتى قۇراستىرۋ قارقىندى دامىپ كەلەدى ەكەن, دەيدى.

- وسىدان بەس - ون جىل بۇرىن فەدەراتسيا بولىمشەلەرى تەك استانا مەن الماتى قالالارىندا بولعان. ال قازىر ەلدىڭ بارلىق ايماقتارىندا KSF وكىلدەرى جۇمىس ىستەيدى. بۇل مەملەكەتتىڭ جاستارعا, ولاردىڭ بولاشاعىنا جاساپ وتىرعان قامقورلىعى دەپ ەسەپتەيمىن. قازاقستاندا مىقتى سپيدكۋبەرلەر كوبەيىپ كەلە جاتقانىن بايقادىم. ال اتىراۋداعى چەمپيوناتقا قاتىسۋشىلاردىڭ باسىم بولىگى مەكتەپ وقۋشىلارى بولدى. بالالار ءۇشىن بۇل العاشقى تاجىريبە, ولاردىڭ بوس ۋاقىتتارىن وي-ءورىستى دامىتاتىن وسىنداي ىستەرگە ارنايتىندارى قۋانتتى.

ەكى كۇنگە سوزىلعان سايىستا 2ح2, 3ح3, «مەگاميكس», «پيراميدا» ساناتتارى بويىنشا ءازيز ولجاعالي, سامالبەك كەلىموۆ, ءامىرحان يسلاموۆتار جەڭىس تۇعىرىنان كورىندى. ءازيز كۇردەلەنگەن رۋبيك تەكشەسىن 12 سەكۋندتا قۇراستىردى. ساراپشىلاردى اتىراۋلىق دوسىمجان جۇمابيدەنوۆتىڭ كوزىن جۇمىپ وتىرىپ,  ءتۇرلى ءتۇستى تەكشەنى ءاپ-ساتتە جيناپ بەرگەن ونەرى ءتانتى ەتتى. ال ەڭ جاس قاتىسۋشى دياس قاراعۇلدىڭ جاسى سەگىزدە. كىشكەنە كۇنىنەن بەرى سپيدكۋبينگكە دەگەن قىزىعۋشىلىعى جوعارى بولعان دياس تا باسقا قاتىسۋشىلاردان قالىسقان جوق.

شارانىڭ باستاماشىسى - «KSF»  قوعامدىق بىرلەستىگىنىڭ توراعاسى ارمان ءماشىموۆ قازىر الەمدە سپيدكۋبينگ جۇيرىك ويلاۋ مەن شاپشاڭ شەشىم قابىلداۋ داعدىلارىن قالىپتاستىراتىن شاحمات, روبوتتەحنيكامەن قاتار وقىتىلاتىن قوسىمشا ءبىلىم بەرۋدىڭ ءبىر تۇرىنە اينالعانىن ايتادى.

«سپيدكۋبينگتى مەكتەپتەرگە ەنگىزۋ ءۇشىن قر ءبىلىم جانە عىلىم مينيسترلىگىنە ۇسىنىس جاسادىق. الداعى ۋاقىتتا بۇل ۇسىنىسىمىز قولداۋ تاپسا, مىڭداعان قازاقستاندىق بالالار ءۇشىن رۋبيكتى جىلدامدىققا قۇراستىرۋ جانە حالىقارالىق چەمپيوناتتارعا قاتىناسۋ مۇمكىندىگى ارتادى», - دەيدى ا.ءماشىموۆ.

باقىتگۇل باباش,

«ەگەمەن قازاقستان»

اتىراۋ