13 قاڭتار كۇنى اقش-تىڭ مەملەكەتتىك حاتشىسى مايك پومپەو ساۋد ارابياسىنىڭ استاناسى ەر-ريادقا ايماقتىق تۋرنە اياسىندا كەلدى. ساۋد ارابياسىنىڭ ءسىم مالىمدەگەندەي, مەملەكەتتىك حاتشىنى سىرتقى ىستەر ءمينيسترى اديل ال-دجۋبەير جانە ساۋد ارابياسىنىڭ ۆاشينگتونداعى ەلشىسى حانزادا حاليد بين سالمان ال-ساۋد كۇتىپ العان.
مايك پومپەونىڭ دوحاعا ساپارى بارىسىندا اقش پەن كاتار امەريكالىق ەل-ۋدەيد اسكەري بازاسىن كەڭەيتۋ تۋرالى مەموراندۋمعا قول قويدى. ەل-ۋدەيد بازاسىندا اقش قارۋلى كۇشتەرىنىڭ سيريا, يراك جانە اۋعانستانداعى وپەراتسيالارىنا جۇرگىزەتىن ورتالىق قولباسشىلىعى جانە 10 مىڭ امەريكالىق اسكەري قىزمەتكەر ورنالاسقان.
مايك پومپەو كاتار مەن پارسى شىعاناعىنداعى وزگە ەلدەردى ءوزارا كيكىلجىڭدى مۇمكىن بولعانىنشا تەز ارادا شەشۋگە شاقىردى. ونىڭ ايتۋىنشا, ماقساتى ورتاق ەلدەر اراسىنداعى داۋ تابىسقا جەتكىزبەيدى.
مەملەكەتتىك حاتشى كاتاردان ساۋد ارابياسىنا ۇشار الدىندا جۋرناليستەرگە حاشوگگي ءولىمى تۋرالى مالىمدەمە جاسادى. امەريكالىق اكىمشىلىكتىڭ جوعارى لاۋازىمدى وكىلىنىڭ جۋرناليست جامال حاشوگگيدىڭ ولىمىنەن كەيىن ساۋد ارابياسىنا جاساعان العاشقى ساپارى.
ء«بىز تاق مۇراگەرىمەن جامال حاشوگگيدىڭ ولىمىنە قاتىستى كىنالىلەردى جاۋاپقا تارتۋ ماسەلەسىن تالقىلايمىز» دەدى م.پومپەو.