مادەنيەت جانە سپورت مينيسترلىگىنىڭ ءباسپاسوز ورتالىعىندا وتكەن اپتانىڭ سوڭىندا ۇيىمداستىرىلعان كەزەكتى جيىندا تۇركىستان وبلىسى اۋماعىندا ورنالاسقان وتىرار مەملەكەتتىك ارحەولوگيالىق مۋزەي-قورىعى مەن «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ اتقارعان شارۋالارى جايلى تانىستىرىلىم بولدى.
وسىدان ءدال 40 جىل بۇرىن شاڭىراق كوتەرگەن «ازىرەت سۇلتان» مەملەكەتتىك تاريحي-مادەني قورىق-مۋزەيى - قازىرگى تاڭدا ەلىمىزدەگى ەڭ تانىمال مادەني وشاقتاردىڭ ءبىرى. وندا ارحەولوگيا جانە ەسكەرتكىشتەردى قورعاۋ, عىلىمي-زەرتتەۋ, قور ساقتاۋ, ەكسكۋرسيا جانە ناسيحات, شارۋاشىلىق قاتارلى بولىمدەر بار. العاش قۇرىلعاندا مەكەمەنىڭ جادىگەر قورى شامامەن 700 بىرلىك بولسا, قازىرگى سانى – 24 421 دانا.
قورىق-مۋزەيدىڭ تاريحي تامىرىن تەرەڭدەتىپ تۇرعان: ۇكاشا اتا, ءجۇسىپ اتا, گاۋھار انا كەسەنەلەرى مەن ساۋران قالاشىعى تۋريستەر تابان تىرەيتىن كورىكتى نىسان دەسەك, مۋزەي قورىندا ساقتالعان اسا قۇندى دۇنيەلەر: ءحىV عاسىر تۋىندىلارى – تايقازان, تۋدىڭ ۇشارىنداعى لاۋھا, كونە شىراعدان (سۋرەتتە) مەن ءياساۋيدىڭ «ديۋاني حيكمەت» كىتابىنىڭ تۇپنۇسقاسىن قىزىقتاۋشىلار وتە كوپ.
وتكەن جىل بۇل مۇرالاردى 1 095 533 ادام كەلىپ تاماشالاپتى. سونداي-اق جوعارىداعى تاريحي نىسانداردىڭ ءۇش تىلدە جاسالعان 3D تۋر تانىستىرىلىم نۇسقاسى دا تۋريست تارتۋعا قولايى. ەرەكشەلەپ ايتۋعا تۇراتىن وقيعا قورىق-مۋزەي تاريحتا تۇڭعىش رەت تۇركيا, گرەكيا, رەسەي, وزبەكستان قاتارلى ەلدەرگە كوشپەلى كورمە ۇيىمداستىرعان.
– مەملەكەت باسشىسىنىڭ « ۇلى دالانىڭ جەتى قىرى» باعدارلامالىق ماقالاسىن جانداندىرۋ ماقساتىندا بيىل «حان مەشىتى», «حان ورداسى» «كۇلتوبە قالاشىعى», «جەتى اتا», «داربازا», ء«مۇساللا», «تاكيا» قاقپالارى قالپىنا كەلتىرىلىپ, ورتاعاسىرلىق ماگيسترالدى جۇيەلەرگە قازبا جۇمىستارى جۇرگىزىلىپ, ساۋدا-ساتتىق ورىندارى تۋريستەرگە قىزمەت كورسەتەتىن بولادى, – دەدى جيىندى قورىتىندىلاعان مەكەمە باسشىسى نۇربولات احمەتجانوۆ.
بەكەن قايرات ۇلى,
«ەگەمەن قازاقستان»