اقش-تىڭ اتاقتى سپورت ءجۋرناليسى, ايگىلى كوممەنتاتور دەن رافاەل 45 جىلدىق تاريحى بار ESPN ارناسىندا كورسەتىلگەن كاسىپقوي بوكسشىلار اراسىنداعى ەڭ ۇزدىك جەكپە-جەكتەردىڭ رەيتينگىن جاريالادى.
كاسىپقوي رينگتەگى ەڭ كەرەمەت ءارى ىمىراسىز باسەكەلەر قاتارىنا قازاقستاننىڭ داڭقتى بىلعارى قولعاپ شەبەرلەرىنىڭ قاتىسۋىمەن وتكەن قوس جەكپە-جەك ەنىپ وتىر. تارقاتىپ ايتساق, 2017 جىلدىڭ 16 قىركۇيەگى مەن 2018 جىلدىڭ 15 قىركۇيەگىندە ورتا سالماقتاعى گەننادي گولوۆكين مەن ساۋل الۆارەستىڭ ايقاسى بۇل تىزىمدە 16-ورىندا تۇر. لاس-ۆەگاستا وتكەن بۇل كەزدەسۋلەردىڭ العاشقىسىندا تەڭ ەسەپ تىركەلسە, ەكىنشىسى مەكسيكالىق بوكسشىنىڭ پايداسىنا شەشىلدى.
2003 جىلدىڭ 26 ساۋىرىندە اقش-تىڭ كوننەكتيكۋت شتاتىندا قازاقستاندىق ۆاسيلي جيروۆ پەن امەريكالىق دجەيمس توني اراسىنداعى جەكپە-جەك جوعارىداعى رەيتينگتە 22-ورىندا تۇر. ءبىرىنشى اۋىر سالماق دارەجەسىندە وتكەن بۇل باسەكەدە جەرلەسىمىز جەڭىلىپ قالعان ەدى.
ال ەڭ ۇزدىك وندىقتىڭ قاتارىنا مىنا جەكپە-جەكتەر ەندى:
باستەر دۋگلاس (اقش) – مايك تايسون (اقش). 11.02.1990 جىل, توكيو. بۇل باسەكە 10 راۋندتا دۋگلاستىڭ ايقىن جەڭىسىمەن اياقتالدى.
مارۆين-حاگلەر (اقش) – توماس حيرنس (اقش). 15.04.1985 جىل, لاس-ۆەگاس. كەزدەسۋدىڭ 3 راۋندىندا حاگلەر قارسىلاسىن نوكاۋتقا جىبەردى.
ريدديك بوۋ (اقش) – ەۆاندەر حولليفيلد (اقش). 1992-1995 جىلدار ارالىعىندا قوس بوكسشى اراسىندا ءۇش جەكپە-جەك ۇيىمداستىرىلدى. ونىڭ ەكەۋىندە بوۋ باسىم تۇسسە, بىرەۋىن حولليفيلد ۇتتى.
مەنني پاكياو (فيليپپين) – حۋان مانۋەل ماركەس (مەكسيكا). 2004-2011 جىلدار ارالىعىندا ايتۋلى بوكسشىلار اراسىندا ءۇش جەكپە-جەك ءوتتى. ەكەۋى دە ءبىر-ءبىر رەتتەن جەڭىسكە جەتىپ, تاعى ءبىر كەزدەسۋدە تەڭ ەسەپ تىركەلدى.
اارون پرايور (اقش) – الەكسيس ارگۋەلو (نيكاراگۋا). 12.11.1982 جىل, مايامي. 14-راۋندتا پرايور قارسىلاسىن ەسىنەن تاندىردى.
ەريك مورالەس (مەكسيكا) – ماركو انتونيو باررەرا (مەكسيكا). 2000-2004 جىلدار ارالىعىندا قوس بوكسشى ءۇش مارتە ءبىر-بىرىنە قارسى كەلدى. ەكى رەت باررەرا جەڭسە, ءبىر رەت مورالەستىڭ باعى جاندى.
ميككي ۋورد (اقش) – ارتۋرو گاتتي (كانادا). 2002-2003 جىلدار ارالىعىندا ولاردىڭ جولى ءۇش مارتە قيىستى. ەكى رەت گاتتي, ءبىر مارتە ۋورد باسىم ءتۇستى.
شۋگار رەي لەونارد (اقش) – توماس حيرنس (اقش). 16.09.1981 جىل, لاس-ۆەگاس. بۇل باسەكە 14-راۋندتا العاشقىسىنىڭ ايقىن جەڭىسىمەن اياقتالدى.
حۋليو سەزار چاۆەس (مەكسيكا) – مەلدريك تەيلور (اقش). 17.04.1990 جىل, لاس-ۆەگاس. 14-راۋندتا چاۆەس تەحنيكالىق نوكاۋتپەن جەڭىسكە جەتتى.
فەليكس ترينيداد (پۋەرتو-ريكو) – فەرناندو ۆارگاس (اقش). 02.12.2000 جىل, لاس-ۆەگاس. كەزدەسۋدىڭ 12-راۋندىندا ترينيداد قارسىلاسىن تىزە بۇكتىردى.
عالىم سۇلەيمەن,
«ەگەمەن قازاقستان»