ەلباسى جولداۋى ءبىلىم سالاسىندا تەر توگىپ جۇرگەن ازاماتتاردىڭ جۇمىسقا دەگەن قۇلشىنىسىن وياتىپ, كوڭىلدەرىنە ءۇمىت وتىن جاققانى انىق. بيىل قابىلداناتىن «پەداگوگ مارتەبەسى تۋرالى» زاڭعا قازىر بالاباقشا, مەكتەپ, كوللەدج, ۋنيۆەرسيتەت وكىلدەرى, وسى سالاعا قاتىستى باسقا دا ادامدار تاراپىنان ءتۇرلى ۇسىنىستار, وي-پىكىرلەر ايتىلىپ جاتىر.
الپىس بەس جىلدىق تاريحى بار ءبىلىم ورداسىندا ەڭبەك ەتەتىندىكتەن, ءبىلىم سالاسىنىڭ قازانىندا قايناپ جۇرگەندىكتەن جولداۋعا وي قوسسام دەيمىن.
جاسىراتىنى جوق, جالاقى از بولعاننان كەيىن جاستاردىڭ كوبى مۇعالىمدىككە كەلگىسى كەلمەيدى. جاستار بولعاندا قانداي جاستار؟ مەكتەپتى ۇزدىك بىتىرگەن, ءبىلىمدى, العىر, وزگەشە ويلايتىن جاڭاشىل جاستار. ءبىلىم وردالارىنا وسىنداي جاستار كەلسە كەرەك ەدى. ونداي جاستار مۇعالىم بولعىسى كەلمەيدى. كەلسە دە سيرەك. ءوزىن قۇرمەتتەيتىن, ءوزىنىڭ ءبىلىمىن, دەڭگەيىن باعالايتىن جاستار جالاقىسى جوعارى جەرلەرگە بارادى. سودان كەيىن مۇعالىمدىككە كىمدەر كەلەدى؟ كوبىنە ءوز ماماندىعى بويىنشا جۇمىس تاپپاعان, ءبىلىم دەڭگەيى ورتاشا جاستار كەلەدى. مۇنداي ادامدار بالانى قالاي تاربيەلەيدى؟ ماسەلەن, ءبىزدىڭ كوللەدجدە ەر مۇعالىمدەر جەتىسپەيدى. ولاردىڭ ۇلەسى 10 پايىزدان اسپايدى. ۇلدار از جالاقىعا شىداماي كەتىپ قالادى. ال قىزدار ۇيرەنىپ, كوندىگىپ كەتەدى. بىزگە ۇستازدىققا نەگىزىنەن قىزدار كەلەدى. ال ستۋدەنتتەردىڭ دەنى – ۇلدار. بيىل مۇعالىمدەردىڭ مارتەبەسى تۋرالى زاڭ قابىلدانىپ, زاڭ شەڭبەرىندە كوللەدج مۇعالىمدەرىنىڭ جالاقىسى كوتەرىلسە, بۇل ماسەلە شەشىمىن تاباتىن شىعار دەپ ويلايمىز. بىزگە تاجىريبەلى, بىلىكتى ماماندار كەلسە, كوللەدجدىڭ دە دەڭگەيى كوتەرىلەرى انىق. ءبىزدىڭ ويىمىز – زاڭ اياسىندا مۇعالىمدەرگە جەڭىلدىكتەر كوبەيسە دەيمىز. ماسەلەن, اسكەريلەرگە باسپانا الۋعا بەرىلەتىن جەڭىلدىك نەگە مۇعالىمدەرگە جاسالماسقا؟! كوپ دۇنيە جالاقىعا كەلىپ تىرەلەدى. كوللەدجگە كەلگەن جاس مۇعالىم 40-50 مىڭ تەڭگە الادى. ءبىر-ەكى جىل ىستەگەننەن كەيىن بارىپ كوەففيتسيەنت قوسىلادى. جالاقىسى از بولعاننان كەيىن ساعاتىن ارتتىرىپ, كوبىرەك جۇكتەمە بەرۋگە تىرىسامىز. بىراق بۇدان ءبىلىم ساپاسى جاقسارمايدى. ەگەر جالاقى جوعارى بولسا, ۇستازداردىڭ ساعاتىن قىسقارتىپ, ساپاعا ءمان بەرەر ەدىك.
تاعى ءبىر ەسكەرەر دۇنيە, جوعارى وقۋ ورىندارىندا بولاشاقتا مۇعالىم بولاتىن جاندارعا تالاپتى كۇشەيتىپ, ىرىكتەپ العان ءجون سەكىلدى. ىرىكتەۋدەن ۇرپاق تاربيەلەي الۋعا قابىلەتتى, ەلدى, جەردى سۇيەتىن ءبىلىمدى, العىر جاستار وتسە, نۇر ۇستىنە نۇر بولار ەدى. قازىر مۇعالىمدىك قاسيەتى جوق بولسا دا, ساباق بەرىپ جۇرگەندەر كوپ. ودان كىم زارداپ شەگەدى؟ وقۋشىلار مەن ستۋدەنتتەر زارداپ شەگەدى.
ويىمىزدى ۇلى مۇحاڭنىڭ, مۇحتار اۋەزوۆتىڭ سوزىمەن تۇيىندەر بولساق, ادام مەن ادامدى, حالىق پەن حالىقتى ءبىلىم تەڭەستىرەدى. ءبىلىم سالاسى قۇلدىراعان ەلدىڭ كۇندەردىڭ كۇنىندە ءوزىنىڭ دە قۇلدىرايتىنى انىق. سوندىقتان «پەداگوگ مارتەبەسى تۋرالى» زاڭنان كوپ ءۇمىت كۇتەمىز.
يساتاي يسين,
وسكەمەن پوليتەحنيكالىق كوللەدجىنىڭ ديرەكتورى