بۇگىننەن باستاپ باتىس قازاقستان وبلىسىنداعى مەكتەپتەردىڭ 5-7 سىنىپتارىندا «ولكەتانۋ» ءپانى وقىتىلا باستادى. بۇل تۋرالى وبلىستىق ءبىلىم باسقارماسىنىڭ باسشىسى شولپان قادىروۆا حابارلادى.
جاڭا ءپان قازاقستان رەسپۋبليكاسى پرەزيدەنتىنىڭ جانىنداعى رۋحاني جاڭعىرۋ باعدارلاماسىن ىسكە اسىرۋ جونىندەگى ۇلتتىق كوميسسيا وتىرىسىنىڭ حاتتامالىق تاپسىرماسىنا سايكەس پايدا بولدى. ول «قازاقستان تاريحى», «قازاق ءتىلى مەن ادەبيەتى», «گەوگرافيا» جانە «مۋزىكا» پاندەرىنىڭ اياسىندا كىرىكتىرىلىپ وقىتىلادى. «وقۋ جۇكتەمەسىنىڭ جالپى كولەمى – 20 ساعات, ياعني 5-سىنىپتا – 5 ساعات, 6-سىنىپتا – 7 ساعات, 7-سىنىپتا – 8 ساعات بولماق, - دەيدى شولپان قادىروۆا.
بۇل كۋرستى ەنگىزۋ ءۇشىن قازاقستان رەسپۋبليكاسى ءبىلىم جانە عىلىم مينيسترلىگىنىڭ ى.التىنسارين اتىنداعى ۇلتتىق ءبىلىم اكادەمياسى وقۋ باعدارلاماسىن جاساقتاعان. وسى باعدارلاماعا سايكەس ءار ءوڭىردىڭ كۋرس بويىنشا وقۋلىعى دايىندالدى. وقۋلىق تۋعان ولكەنىڭ تابيعاتى مەن تابيعي ەرەكشەلىگىن, ولكە تاريحى مەن حالىقتىڭ دامۋ تاريحىن, ەتنوگرافيالىق ۇلتتىق ەرەكشەلىكتەرى مەن دەموگرافياسىن, توپونيميكاسىن, ونەرىن, مəدەنيەتىن ت.ب. قامتيدى. وقۋلىقتى قۇراستىرۋعا ورال قالاسىنداعى جوعارى وقۋ ورىندارى عالىمدارى, تاجىريبەلى پەداگوگتەر, ادىسكەرلەر, بارلىعى 17 قىزمەتكەر تارتىلدى. سونىمەن قاتار, 11 قىزمەتكەردەن قۇرالعان ساراپشى توپ قۇرىلىپ, وقۋلىقتىڭ مازمۇنىنا ساراپتاما جاسالدى.
شولپان ماراتقىزىنىڭ ايتۋىنشا, باتىس قازاقستان وبلىسى اكىمىنىڭ ورىنباسارى ع.وسپانقۇلوۆتىڭ قاتىسۋىمەن اۆتورلار جانە ساراپشىلار توبىنىڭ جۇمىسى بارىسىندا بىرنەشە وتىرىس وتكىزىلىپ, بارلىق ماتەريالدار رەداكتسيالانعان. سونداي-اق وقۋلىق ماتەريالدارى ءبىلىم باسقارماسىنىڭ رەسمي سايتىندا جاريالانىپ, كوپشىلىكتىڭ تالقىلاۋىنا سالىنعان.
24 مىڭ دانامەن باسىلىپ شىققان جاڭا وقۋلىقتا قازاقستاننىڭ جالپىۇلتتىق قاسيەتتى نىساندارى تىزىمىنە كىرگەن تاريحي ەسكەرتكىشتەر, بيلەر, باتىرلار, پالۋاندار, عىلىم, ونەر, مادەنيەت سالاسىنداعى ولكەنىڭ تانىمال تۇلعالارى تۋرالى, توپونيمدەر, تۋريستىك مارشرۋتتار تۋرالى جان-جاقتى مالىمەت بەرىلگەن.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان