زاماناۋي قازاق كينووندىرىسى سان جاعىنان عانا ەمەس, ساپالىق مازمۇن تۇرعىسىنان جىل سايىن تولىعىپ, ءۇستى-ۇستىنە جاڭارىپ كەلەدى. وسى رەتتە مەيرام كەزىندە كينوتەاترلار كومەديا جانرىنداعى بىرنەشە وتاندىق ءفيلمدى كورەرمەن نازارىنا ۇسىندى.
سوڭعى جىلدارى ساپالى جوبالارىمەن كوزگە ءتۇسىپ جۇرگەن «Nurtas prodactioun» ستۋدياسى جاڭاجىلدىق تارتۋ رەتىندە «قۇدالار» اتتى جاڭا كومەدياسىن ۇسىنادى. فيلمدە شىمكەنتتىك جىگىت پەن الماتىلىق ارۋدىڭ عاشىقتىق حيكاياسى مەن بىردەن ءتىل تابىسا الماعان جاڭا قۇدالاردىڭ اراسىنداعى كيكىلجىڭ باياندالادى.
«بۇل مەنىڭ كينوداعى دەبيۋتىم, سوندىقتان قاتتى ۋايىمدادىم. ءتۇسىرىلىم توبى وتە ۇيىمشىل بولىپ شىقتى. 18 رەت دۋبل تۇسىرگەن قيىن ساحنالار دا بولدى», – دەيدى باس كەيىپكەر دانياردىڭ ءرولىن سومداعان ولجاس رىمباەۆ. سونداي-اق تاسپاداعى ديانانى – دينارا باقتىباەۆا, قالالىق قۇدالاردى – نۇرتاس ادامباي مەن جان ءىزباسار, اۋىلدان كەلگەن قۇدالاردى – رايحان كاليولدينا, دارحان دايىربەك سومدادى.
افريكانىڭ كەنيا مەملەكەتىندە جانە بىرىككەن اراب امىرلىكتەرىنىڭ دۋباي قالاسىندا تۇسىرىلگەن «قازاقشا بيزنەس» سەريالى ءفيلمى افريكادا تۇسىرىلگەن العاشقى قازاق كينوتۋىندىسى رەتىندە تاريحتا قالاتىن سىڭايلى. فيلم پروديۋسەرى نۇرلان قويانباەۆ كورەرمەندەردى كۇلكىگە كەنەلتىپ, العىسىن الۋ ءۇشىن ايانىپ قالمادىق دەيدى. ايتۋىنشا, ءتۇسىرىلىم بيۋدجەتىنە باس-اياعى 500 مىڭ اقش دوللارى جۇمسالعان. ال اكتەرلەر قۇرامىندا جانە كينو مازمۇنىندا ايتارلىقتاي وزگەرىس جوق. «الداعى ۋاقىتتاعى ماقساتىمىز – قازاق كينوسىنىڭ ەڭسەسىن كوتەرىپ, الەمدىك كينو الەمىندەگى الپاۋىتتارمەن يىق تىرەسىپ, وتاندىق كينەماتوگرافيانى گولليۆۋد دەڭگەيىنە جەتكىزۋ», دەگەن نۇرلان قويانباەۆ كينو وندىرىسىندەگى ىزدەنىسىن قارقىندى جالعاستىرا تۇسەتىنىن بايقاتتى.
ايا ءومىرتاي,
«ەگەمەن قازاقستان»