«قازاقستان تەمىر جولى ۇلتتىق كومپانياسى» اكتسيونەرلىك قوعامىنىڭ «سەمەي ماگيسترالدىق جەلى بولىمشەسى» فيليالى سەرەبريانكا جول ديستانتسياسىنىڭ ۇستىڭگى قاباتىنىڭ ەلەمەنتتەرىن جوندەۋ جانە قايتا قالىپتاستىرۋ جونىندەگى تەلىم شەبەرى, كاسىپوداق كوميتەتىنىڭ توراعاسى ۆيكتور ميلتس پرەزيدەنت جارلىعىمەن ءۇشىنشى دارەجەلى «ەڭبەك داڭقى» وردەنىمەن ماراپاتتالدى.
1962 جىلى شىعىس قازاقستان وبلىسى سەرەبريانسك قالاسىندا قاراپايىم جۇمىسكەر وتباسىندا دۇنيەگە كەلگەن ۆيكتور ميلتس 1985 جىلدان بەرى ءبىر ورىندا تابان اۋدارماي ەڭبەك ەتىپ كەلەدى ەكەن. وسى جىلدار ارالىعىندا ول سەرەبريانكا جول ديستانتسياسىنىڭ 2-ءشى رازريادتاعى كوپىر جۇمىسشىسى, پم-چ تسەحىنىڭ بريگاديرى, قۇرىلىس جانە جول عيماراتتارىن جوندەۋ تسەحىنىڭ باستىعى قىزمەتتەرىن اتقارىپتى. «قازاقستان رەسپۋبليكاسى كاسىپوداقتار فەدەراتسياسىنىڭ باستاماسىمەن ۇزاق جىلعى جەمىستى ەڭبەگى ءۇشىن رەسپۋبليكا بويىنشا 7 كاسىپوداق مۇشەلەرى وسى ماراپاتقا لايىق دەپ تابىلدى. ەرەن ەڭبەگىمەن ارىپتەستەرى اراسىندا قۇرمەتكە بولەنگەن ۆيكتور ميلتسكە وردەندى قازاقستان رەسپۋبليكاسى كاسىپوداقتار فەدەراتسياسى توراعاسىنىڭ ورىنباسارى مۇحتار تىنىكەەۆ تابىس ەتتى», - دەيدى شقو اۋماقتىق كاسىپوداقتار بىرلەستىگىنىڭ توراعاسى مەيىرحان تولەۋباەۆ.
ازامات قاسىم,
«ەگەمەن قازاقستان»
شىعىس قازاقستان وبلىسى