باقىت سۇلتانوۆ «نۇرلى جۇرەك» الەۋمەتتىك قىزمەت كورسەتۋ ورتالىعىنىڭ جۇمىسىمەن تانىستى

استانا قالاسىنىڭ اكىمى باقىت سۇلتانوۆ الەۋمەتتىك قىزمەت كورسەتۋ ورتالىعىنىڭ جۇمىسىمەن تانىستى. «بالالارعا تەرەڭ جانە جان-جاقتى ءبىلىم الۋ كەرەك. ءبىز بۇنداي ورتالىقتاردى قولدايمىز. سەبەبى مۇمكىندىگى شەكتەۋلى بالالاردىڭ قوعامدا ءوز ورىندارىن تاپقانى وتە ماڭىزدى, ولار الەۋمەتتىك بەيىمدەلۋى ءتيىس. وسى باعىتتا «نۇرلى جۇرەك» ورتالىعى جۇمىسىن دۇرىس اتقارۋدا», دەدى باقىت سۇلتانوۆ.

ورتالىقتا بالالاردى ساۋىقتىرۋعا بارلىق جاعداي جاسالعان. مۇندا سەنسورلىق بولمە, مونتەسسوري ءادىسىنىڭ ارنايى كابينەتى, فيزيوكابينەت (لفك), لوگوپەد, پسيحولوگ, دەفەكتولوگ كابينەتتەرى, الەۋمەتتىك – تۇرمىستىق بەيىمدەۋ بولمەسى, لەكوتەكا, كىتاپحانا, ارت-تەراپيا كابينەت, مۋزىكالىق زال, تىگىن, ۇستا شەبەرحاناسى, قىسقى باق, ويىن, سپورت الاڭى, دەنە شىنىقتىرۋ زالى, سپورت الاڭى بار. ورتالىق ماماندارى سەگىز ءتۇرلى الەۋمەتتىك قىزمەت ءتۇرىن كورسەتەدى. اتاپ ايتقاندا, مەديتسينالىق, تۇرمىستىق, پسيحولوگيالىق, پەداگوگيكالىق, ەكونوميكالىق, قۇقىقتىق, مادەني قىزمەتتەر, ەڭبەك قىزمەتى.

وسى جىلدىڭ قاڭتار ايىندا جاسوسپىرىمدەر مەن جاستار كورپۋسى اشىلدى, ونداعى ماڭىزدى مىندەت جۇمىسقا ورنالاستىرۋ باعىتىندا وقىتۋ. «بۇرىن ءبىز بالالاردى ءۇش جاستان 18 جاسقا دەيىن قابىلدايتىن ەدىك, بيىلدان باستاپ 29 جاسقا دەيىنگى ءتۇرلى دياگنوزى بار جاستارعا دا قىزمەت كورسەتەمىز.  بىزدە تىرەك-قوزعالىس اپپاراتى بۇزىلعان 134 بالا بار. ولار كۇتىمگە, قىزمەتتەردى الۋعا ءاردايىم مۇقتاج. ءبىلىم بەرۋ باعدارلامالارىنان بولەك, ءبىز بالالارىمىزدى وزىنە-ءوزى قىزمەت ەتۋ, وزىنە كۇتىم جاساۋ داعدىلارىنا, قورشاعان ورتادا دۇرىس باعىت الۋ, اينالاسىنداعى ادامدار مەن دۇرىس قارىم قاتىناس جاساۋدى ۇيرەتەمىز. سونداي-اق, بالالار ەسەيگەن سايىن ولاردى ەڭبەككە ماشىقتاندىرامىز», - دەدى ورتالىق ديرەكتورى سەرىك بوپەجانوۆ. ورتالىقتىڭ تاربيەلەنۋشىلەرى سپورت ورتالىقتارىنا, مادەني ءىس-شارالارعا, تسيرك, كينوتەاترلارعا, ويىن-ساۋىق ورتالىقتارىنا, كونتسەرتتەرگە بارادى. «مەن ءبىزدىڭ ورتالىق قىزمەتكەرلەرىنە جانە اكىمگە العىسىمدى ايتقىم كەلەدى.

ءبىزدىڭ بالالارىمىز 18 جاستان كەيىن دە دالادا قالمايتىنىنا ريزامىن. بۇل اتا-انالارعا كورسەتىلەتىن وتە ۇلكەن قولداۋ, كومەك. مىنە, وسى جىلى 18-29 جاس ارالىعىنداعى ەرەسەكتەرگە ارنالعان كورپۋس اشىلدى. مەنىڭ بالام جەتى جاسىنان وسى ورتالىققا كەلەدى. ول 18 –گە تولعاندا نە ىستەيمىز؟ سۇراق مازالادى. قازىر مەنىڭ قىزىمدى سۋرەت سالۋعا, تىگۋگە ۇيرەتىپ جاتىر. بىزگە وسى ورتالىقتىڭ ءار قىزمەتكەرى تۋىسىمىزداي بولىپ كەتتى», - دەپ ءبىلدىردى ءوز العىسىن «نۇرلى جۇرەك» ورتالىعىندا تاربيە الىپ جاتقان بالانىڭ اتا-اناسى. بۇگىن «ينۆاتاكسي» اۋقىمدى الەۋمەتتىك جوباسىنىڭ شەڭبەرىندە «حالىق» قايىرىمدىلىق قورى مەن قازاقستان حالىق بانكىنىڭ اتىنان «نۇرلى جۇرەك» الەۋمەتتىك قىزمەت كورسەتۋ ورتالىعىنا مۇمكىندىكتەرى شەكتەۋلى ازاماتتاردى تاسىمالداۋعا مۇمكىندىك بەرەتىن ارنايى كولىكتىڭ كىلتى تابىس ەتىلدى.