تاۋەلسىزدىك مەرەكەسىنەن كەيىن جۇرتشىلىق جاڭا جىلساناۋدىڭ باسى رەتىندە جاڭا جىلدى اسىعا كۇتەتىنى بەلگىلى. الماتىلىقتار ەلىمىزگە قۇت بولعان يت جىلىن العىسپەن شىعارىپ سالىپ, ىرگەمىزدەن ەنىپ كەلە جاتقان تاعى ءبىر جىلدى قۋانىشپەن قارسى الۋعا دايىن.
كوشەلەردى كومكەرگەن نەشە ءتۇرلى جارقىراعان شامدار, شاھاردى ەرەكشە سالتاناتقا بولەپ, كورگەن جانعا مەرەكەلىك كوڭىل كۇي سىيلاپ تۇر. ەلىمىزدەگى ەڭ الىپ مەگاپوليستى جاڭاجىلدىق بەزەندىرۋگە بيىل جەرگىلىكتى بيۋدجەتتەن 75 ملن تەڭگە ءبولىنىپتى. جاۋاپتى مامانداردىڭ سوزىنشە, جۇمسالعان قارجى كولەمى بىلتىرعىدان از. ويتكەنى, قالا كوشەلەرىنە ورناتىلعان شىرشالاردىڭ تەڭ جارىمى وتكەن جىلدان قالعان جاساندى شىرشالار.
كوڭىل قۋانتارلىعى سول, شاھارداعى شىرشا ۇلگىسىندەگى ماكەتتەر تۇگەلدەي دەرلىك ۇلتتىق ويۋ-ورنەكتەرمەن كومكەرىلگەن. «سوندىقتان, ەلباسىنىڭ « ۇلى دالانىڭ جەتى قىرى» ماقالاسىندا ايرىقشا اتالعان اڭ ءستيلىنىڭ مەگاپوليستە جاپپاي كورىنىس تابۋى تاريحي سانانىڭ قالىپتاسۋىنا ىقپال ەتەدى» دەيدى زيالى قاۋىم وكىلدەرى.
قالا اكىمدىگى قوعامدىق ورىندارعا, ياعني اباي مەن ەسكى الاڭ, اتاكەنت پەن تۇڭعىش پرەزيدەنت ساياباعى جانە «الماتى ارەنا» سپورت سارايىنىڭ ماڭىنا شىرشا تىككەن. بۇدان بولەك, قالاداعى 8 اۋداننىڭ اكىمدىگى جوسپارعا ساي بەكىتىلگەن اۋماقتارعا ارلەۋ جۇمىستارىن جۇرگىزگەن.
شاھاردىڭ بىرنەشە جەرىندە ورىن تەپكەن تەگىن سىرعاناۋ الاڭدارى تۇرعىندار ءۇشىن بيىلعى قىستىڭ ەڭ ءبىر كەرەمەت سىيى دەۋگە بولادى. ءداستۇر بويىنشا بارلىق ساۋدا ورتالىقتارىندا جەڭىلدىكتەر ناۋقانى ءجۇرىپ جاتىر. مىڭ قۇلپىرعان مەگاپوليستە قىسقى تۋريزم قىزا تۇسكەن دەرسىز. «مەدەۋ» مۇز ايدىنى مەن «شىمبۇلاق» شاتقالى, ارۋ قالاعا زاۋ بيىكتەن كوز تاستاعان كوركەم «كوكتوبە» كەلۋشىلەرگە قۇشاق اشىپ تۇر.
ارمان وكتيابر,
«ەگەمەن قازاقستان»
الماتى