الماتى قالاسىنداعى جەتىسۋ اۋدانىنىڭ كىشكەنتاي تۇرعىندارى جاڭا جىل قارساڭىندا ءتۇرلى سىيلىقتارعا كەنەلدى. بالدىرعاندارعا ايرىقشا قۋانىش سىيلاعان يگى باستاماعا جەرگىلىكتى اكىمدىك مۇرىندىق بولعان. ءتۇرلى سىي-سياپاتتار ەڭ الدىمەن الەۋمەتتىك تۇرعىدان از قامتىلعان وتباسىلاردىڭ بالالارىنا تاراتىلدى. ۇيىمداستىرۋشىلار ارنايى ءتىزىم بويىنشا ءۇي-ءۇيدى ارالاپ, بالالاردىڭ ونەرىن تاماشالاپ, بازارلىقتارىن ۇلەستىردى. وسىلايشا باس كيىم, قولعاپ, نەشە ءتۇرلى تاتتىلەرگە تولى قوراپشالار مەن كادەسىيلار ءوز يەلەرىن تاپتى. ورەندەردىڭ بال-بۇل جايناعان جۇزىنەن شاتتىقتىڭ لەبى ەسەدى.
بيىل بۇل شارا العاش رەت قولعا الىنىپ وتىر. بۇدان بولەك, پەرۆوماي شاعىن اۋدانىنداعى مادەنيەت ۇيىندە مەرەكەلىك شىرشا شاراسى ءوتتى. وعان تۇرمىس جاعدايى تومەن وتباسىلاردان شىققان 100 بالا شاقىرتىلعان.
«جەتىسۋ اۋدانى بويىنشا 165 از قامتىلعان وتباسى بار. سول وتباسىلاردا 241 بالا تىركەلگەن. نيەتىمىز – بىردە-ءبىر بالانى نازاردان تىس قالدىرماۋ. بالا – ەلدىڭ بولاشاعى. اسىرەسە جاعدايى تومەن وتباسىندا تاربيەلەنىپ جاتقان بالالار مەن اتا-انا قامقورلىعىنان ايىرىلعان جەتكىنشەكتەرگە ۇنەمى قولداۋ كورسەتۋىمىز كەرەك», دەيدى الماتى قالاسى جەتىسۋ اۋدانى اكىمىنىڭ ورىنباسارى ۆياچەسلاۆ ۆاۆيلين.
ارمان وكتيابر,
«ەگەمەن قازاقستان»
الماتى